కాల్పుల విరమణపై ఇరాన్ కీలక నిర్ణయం.. పిచ్చెక్కిపోతున్న ట్రంప్.. ఈ రోజు రాత్రే అసలు కథ..

పశ్చిమాసియాలో ముదురుతున్న ఉద్రిక్తతల నేపథ్యంలో అమెరికా పంపిన తాత్కాలిక కాల్పుల విరమణ ప్రతిపాదనను ఇరాన్ సోమవారం తిరస్కరించింది. ఈ మేరకు పాకిస్థాన్ మధ్యవర్తిత్వం ద్వారా తన నిర్ణయాన్ని అమెరికాకు చేరవేసింది. కేవలం తాత్కాలికంగా యుద్ధాన్ని నిలిపివేయడం ఇరాన్‌కు ఇష్టం లేదని, దీనికి శాశ్వత పరిష్కారం కావాలని ఇరాన్ అధికారిక వార్తాసంస్థ 'ఇర్నా' స్పష్టం చేసింది.

తక్షణ కాల్పుల విరమణతో పాటు పది నిబంధనలతో కూడిన ఒక ప్రణాళికను ఇరాన్ అమెరికా ముందుంచింది. ఇందులో ప్రధానంగా హార్ముజ్ జలసంధిలో సురక్షిత ప్రయాణం, ఇరాన్‌పై ఉన్న ఆర్థిక ఆంక్షల తొలగింపు, భవిష్యత్తులో తమపై దాడులు జరగవనే గట్టి హామీలను ఇరాన్ డిమాండ్ చేస్తోంది. తాము కేవలం కాల్పుల విరమణకు తలొగ్గబోమని, గౌరవప్రదమైన యుద్ధ ముగింపునే కోరుకుంటున్నామని ఇరాన్ దౌత్యవేత్త మొజ్తబా ఫిర్దౌసీ స్పష్టం చేశారు.

ఇరాన్ ప్రతిస్పందనపై అమెరికా అధ్యక్షుడు డొనాల్డ్ ట్రంప్ తీవ్ర ఆగ్రహం వ్యక్తం చేశారు. తాను విధించిన మంగళవారం రాత్రి 8 గంటల (ఈడీటీ) గడువులో ఎలాంటి మార్పు ఉండబోదని, అది ఫైనల్ అని ఆయన తేల్చి చెప్పారు. ఇరాన్ గనుక ఒప్పందానికి రాకపోతే ఆ దేశం భారీ మూల్యం చెల్లించుకోవాల్సి ఉంటుందని హెచ్చరించారు.

ఒక్క రాత్రిలో ఇరాన్‌ను నామరూపాలు లేకుండా చేయగల శక్తి మాకుంది, అది మంగళవారం రాత్రే జరగవచ్చని ట్రంప్ సంచలన వ్యాఖ్యలు చేశారు. ఇరాన్ ప్రజలు తెలివైన వారని, వారు సరైన నిర్ణయం తీసుకుంటారని ఆశిస్తున్నానని అంటూనే, తన హెచ్చరికలను బూతు పదాలతో నొక్కి చెప్పడాన్ని ఆయన సమర్థించుకున్నారు. ఒకవేళ యుద్ధం మొదలైతే అది ఇరాన్‌కు నరకం చూపిస్తుందని ఆయన హెచ్చరించారు.

ఈ రోజు రాత్రి ఇరాన్ శ్మశానంగా మారుతుంది.. ట్రంప్ సంచలన వ్యాఖ్యలు.. ప్రపంచవ్యాప్తంగా తీవ్ర ఆందోళన..

ప్రస్తుతం ఇరాన్, అమెరికా మధ్య నేరుగా చర్చలు జరగకపోయినప్పటికీ, పాకిస్థాన్, ఈజిప్ట్, తుర్కియే దేశాలు మధ్యవర్తులుగా వ్యవహరిస్తున్నాయి. ట్రంప్ దూత స్టీవ్ విట్కాఫ్, ఇరాన్ విదేశాంగ మంత్రి అబ్బాస్ అరాగ్చీ మధ్య సందేశాల మార్పిడి జరుగుతోంది. అయితే, వైట్ హౌస్ వర్గాల సమాచారం ప్రకారం, పాకిస్థాన్ ప్రతిపాదించిన శాంతి ఒప్పందాన్ని ట్రంప్ ఇంకా ఆమోదించలేదు.

అమెరికా సైన్యం చేపట్టిన 'ఆపరేషన్ ఎపిక్ ఫ్యూరీ' కొనసాగుతూనే ఉంటుందని అధికారులు స్పష్టం చేశారు. అమెరికా తన సైనిక శక్తిని ప్రదర్శిస్తూ, ఇటీవల కూలిపోయిన ఎఫ్-15 ఫైటర్ జెట్ పైలట్‌ను రక్షించేందుకు 155 ఎయిర్‌క్రాఫ్ట్‌లతో ఇరాన్ గడ్డపై నిర్వహించిన సాహసోపేతమైన ఆపరేషన్‌ను ట్రంప్ ఈ సందర్భంగా గుర్తుచేశారు.

ట్రంప్ హెచ్చరికలపై Iran సుప్రీం నేత మొజ్తబా ఖమేనీ ధీటుగా స్పందించారు. ఇరాన్‌ను రాతియుగానికి పంపుతామన్న ట్రంప్ వ్యాఖ్యలు ఆయన నిర్లక్ష్య వైఖరిని సూచిస్తున్నాయని విమర్శించారు. అమెరికా, ఇజ్రాయెల్ దళాలు పాఠశాలలు, వంతెనలు, విద్యుత్ కేంద్రాల వంటి పౌర మౌలిక సదుపాయాలను లక్ష్యంగా చేసుకుని దాడులు చేస్తున్నాయని, ఇది మానవత్వానికి వ్యతిరేకమైన నేరమని ఆయన మండిపడ్డారు.

తమ కమాండర్లను హత్య చేయడం ద్వారా లేదా బెదిరింపులకు గురిచేయడం ద్వారా ఇరాన్ సైనిక బలాన్ని బలహీనపరచలేరని ఆయన స్పష్టం చేశారు. ఉద్రిక్తతలు పతాక స్థాయికి చేరిన ఈ తరుణంలో, మంగళవారం రాత్రి గడువు ముగిశాక ఏం జరుగుతుందనేది ప్రపంచవ్యాప్తంగా ఉత్కంఠ రేపుతోంది.