Truecaller: ట్రూకాలర్ రీబ్రాండింగ్.. AI వినియోగంతో మరిన్ని ఫీచర్స్

Truecaller: కాలర్ IDని గుర్తించడానికి ఎక్కువ మంది 'ట్రూకాలర్‌' యాప్‌ ని వినియోగిస్తుంటారు. స్పామ్ కాల్స్‌ ను నోటిఫై చేసి వాటిని బ్లాక్ చేయడం దీనిలో స్పెషాలిటీ. అయితే పెరుగుతున్న టెక్నాలజీకి అనుగుణంగా పలు కొత్త ఫీచర్లను యాప్‌ కు యాడ్ చేసినట్లు ట్రూకాలర్ చెబుతోంది.

గూగుల్ ప్లే మరియు ఆపిల్ యాప్ స్టోర్లలో తక్షణమే గుర్తించగలిగే సరికొత్త ఐకాన్‌ తో ట్రూకాలర్ రీబ్రాండింగ్‌ ప్రకటించింది. ఇందులో ఆర్టిఫిషియల్ ఇంటెలిజెన్స్(AI) ఆధారిత సెర్చింగ్, యాంటీ ఫ్రాడ్ ఫీచర్ యూజర్లకు లభిస్తోందని పేర్కొంది. తద్వారా ఏదైనా నంబర్ కోసం వెతుకుతున్నప్పుడు.. లేటెస్ట్‌ గా మార్చిన పేరుని తక్షణమే తెలియజేస్తుందని వెల్లడించింది.

ఈ యాప్ ఆయా నంబర్లను మూడు రంగులుగా వర్గీకరిస్తుంది. సాధారణ పేరు మార్పుకు నీలం, అనుమానాస్పదంగా కనిపిస్తే పసుపు, మోసపూరిత మరియు స్కామర్ కార్యకలాపాలను గుర్తిస్తే ఎరుపు రంగు సూచిస్తూ అలర్ట్ చేస్తుంది. అండ్రాయిడ్ సహా iOS ఆపరేటింగ్ సిస్టమ్స్‌ కూ కంపెనీ ఈ ఫీచర్ అందించింది.

'యాప్‌ ద్వారా జరిగే కమ్యూనికేషన్‌ ను సురక్షితంగా ఉంచాల్సిన బాధ్యత మాపై ఉంది. అందుకోసం సెర్చ్ అనుభవంతో పాటు గోప్యతను మెరుగుపరచేందుకు, మోసాలను నిరోధించేందుకు పరిష్కారాలను అభివృద్ధి చేయడమే మా లక్ష్యం' అని CEO అలాన్ మామెడి తెలిపారు. ప్రపంచవ్యాప్తంగా 356 మిలియన్ యూజర్లతో, గత 14 ఏళ్లుగా ఐడెంటిఫికేషన్ సొల్యూషన్స్‌లో ట్రూకాలర్ మార్కెట్ లీడర్‌గా కొనసాగుతుండటం విశేషం.