దిగ్గజ కంపెనీ కీలక నిర్ణయం.. వేలాది మందికి లేఆఫ్స్.. వరుస కోతలతో ఉద్యోగార్థుల్లో ఆందోళన

Layoffs News: రోజులు గడుస్తున్నా కానీ కరోనా వల్ల ఏర్పడిన విఘాతం కొనసాగుతూనే ఉంది. ఇప్పటికే లక్షల సంఖ్యలో ఉద్యోగాలు కోల్పోగా ఈ సంఖ్య అంతకంతకూ పెరుగుతూ వస్తోంది. ఒకదాని తర్వాత ఇంకో కంపెనీ వరుస లేఆఫ్స్‌తో ఉద్యోగార్థులకు కంటి మీద కునుకు లేకుండా చేస్తున్నాయి.

ప్రముఖ ఆన్‌లైన్ ట్రావెల్ ఏజెన్సీ ఎక్స్‌పీడియా భారీ స్థాయిలో లేఆఫ్స్ ప్రకటించింది. సాంకేతిక పరివర్తనలో భాగంగా దాదాపు 1,500 మంది ఉద్యోగులను తొలగించనున్నట్లు తెలిపింది. మొత్తం 17,100 మంది గ్లోబల్ వర్క్‌ఫోర్స్‌లో దాదాపు 9 శాతం మందిపై ఈ కోతలు ప్రభావం చూపించనున్నాయి. పోస్ట్-పాండమిక్ బూమ్ తర్వాత ప్రయాణ డిమాండ్ మందగించిన నేపథ్యంలో ఈ చర్యలు తీసుకున్నట్లు తెలుస్తోంది.

'ఎక్స్‌పీడియా గ్రూప్ పరివర్తనలో అనేక ముఖ్యమైన సాంకేతిక మైలురాళ్లను ఇటీవల పూర్తి చేసింది. అత్యంత ముఖ్యమైన పనికి ప్రాధాన్యత ఇవ్వాలని నిర్ణయించింది. వనరుల సముచిత కేటాయింపును మూల్యాంకనం చేస్తూనే ఉంది' అని కంపెనీ ప్రతినిధి ఒక ప్రకటనలో తెలిపారు. అయితే ఏ విభాగం నుంచి తొలగింపులు ఉంటాయి అనే నిర్ధిష్ట వివరాలు ఇంకా తెలియాల్సి ఉంది.

వీర్‌బో, ఆర్బిట్జ్, హాట్‌వైర్.కాం మరియు ట్రావెలోసిటీ వంటి అనేక ఆన్‌లైన్ ట్రావెల్ బుకింగ్ ప్లాట్‌ఫారమ్‌లను ఎక్స్‌పీడియా హోటల్స్.కాం గతంలో కొనుగోలు చేసింది. కాగా కంపెనీ వృద్ధి కోసం ప్రధాన వ్యూహాత్మక రంగాలలో పెట్టుబడి పెట్టాలని చూస్తున్నట్లు సంస్థ ప్రతినిధి వెల్లడించారు. ఈ ప్రయాణం కొన్ని పాత్రల తొలగింపుకు దారితీస్తాయని పేర్కొన్నారు.