బంగారం కొనేవారికి మైండ్ బ్లోయింగ్ ఆప్షన్.. 24 గంటలూ ట్రేడింగ్ చేసుకునే అవకాశం! ఎలాగంటే..

సాధారణంగా మనం బంగారం కొనాలంటే జ్యువెలరీ షాపుకు వెళ్తాం, లేదా మార్కెట్ సమయాల్లో డిజిటల్ గోల్డ్, ఈటీఎఫ్‌లు (ETFs) కొంటాం. కానీ ఇప్పుడు వీటన్నింటికంటే భిన్నంగా, సరికొత్త టెక్నాలజీతో 'టోకెనైజ్డ్ గోల్డ్' (Tokenised Gold) మార్కెట్లోకి వచ్చింది.

అసలు ఏంటిది అంటే.. భౌతిక బంగారాన్ని (Physical Gold) డిజిటల్ టోకెన్లుగా మార్చడమే ఈ పద్ధతి. ఇది పూర్తిగా బ్లాక్‌చైన్ టెక్నాలజీపై పనిచేస్తుంది. మీరు కొనే ప్రతి టోకెన్‌కు సమానమైన నిజమైన బంగారం, అత్యంత సురక్షితమైన వాల్ట్‌లలో భద్రపరచబడి ఉంటుంది. దీనివల్ల లాభాలు ఏంటి? ఎలాంటి రిస్క్‌లు ఉన్నాయి? మన దేశంలో దీనిపై ట్యాక్స్ ఎలా ఉంటుందో క్లియర్ గా చూద్దాం.

టోకెనైజ్డ్ గోల్డ్ ప్రత్యేకతలు ఏంటి?

• 24 గంటలూ ట్రేడింగ్: సాధారణ గోల్డ్ మార్కెట్ లాగా దీనికి టైమింగ్స్ ఉండవు. శని, ఆదివారాలతో కలిపి వారంలో 7 రోజులు, రోజులో 24 గంటలూ దీనిని ఎప్పుడైనా కొనుగోలు చేయవచ్చు, అమ్ముకోవచ్చు.
• చిన్న మొత్తంలో పెట్టుబడి (Fractional Ownership): దీనికోసం వేల రూపాయలు పెట్టక్కర్లేదు. కేవలం ఒక గ్రాములో వందో వంతును కూడా చాలా తక్కువ డబ్బుతో కొనుక్కోవచ్చు.
• రియల్-టైమ్ వెరిఫికేషన్: ఇది పబ్లిక్ బ్లాక్‌చైన్‌పై ఉండటం వల్ల మీ లావాదేవీలు పారదర్శకంగా ఉంటాయి. ఎప్పుడైనా చెక్ చేసుకోవచ్చు.

లాభాలే కాదు.. ఈ రిస్క్‌లు కూడా ఉన్నాయి!

ముద్రెక్ (Mudrex) బిజినెస్ హెడ్ ప్రతీక్ గుప్తా తెలిపిన వివరాల ప్రకారం.. ఈ టోకెనైజ్డ్ గోల్డ్ అనేది చూడటానికి ఆకర్షణీయంగా ఉన్నా, ఇందులో కొన్ని పెద్ద రిస్క్‌లు దాగున్నాయి..

• కంపెనీ నమ్మకత్వం (Counterparty Risk): ఈ టోకెన్లు జారీ చేసే సంస్థ నిజంగానే వాల్ట్‌లో బంగారం దాచిందా లేదా అనేది ముఖ్యం. ఒకవేళ ఆ సంస్థ దివాలా తీస్తే, మీ టోకెన్ల విలువ సున్నా అయిపోతుంది.
• సెబీ (SEBI) రక్షణ లేదు: మన దేశంలో దీనికి ఇంకా సరైన చట్టపరమైన నిబంధనలు రాలేదు. కాబట్టి సెబీ ఇన్వెస్టర్ ప్రొటెక్షన్ రూల్స్ దీనికి వర్తించవు.
• భారీగా పన్ను పోటు (30% VDA Tax): ఇండియాలో ఈ టోకెనైజ్డ్ గోల్డ్‌ను 'వర్చువల్ డిజిటల్ అసెట్' (VDA) గా పరిగణిస్తారు. అంటే క్రిప్టోకరెన్సీ లాగే, దీని ద్వారా వచ్చే లాభాలపై ఏకంగా ఫ్లాట్ 30% టాక్స్ కట్టాలి. సావరిన్ గోల్డ్ బాండ్స్ (SGB) లాగా దీనికి ఎలాంటి పన్ను మినహాయింపులు ఉండవు.

ఎవరు ఇన్వెస్ట్ చేయవచ్చు? ఎలా కొనాలి?

క్రిప్టోకరెన్సీ మార్కెట్ గురించి అవగాహన ఉండి, 24 గంటలూ లిక్విడిటీ కావాలనుకునే వారికి, అలాగే ఒక గ్రాము కంటే తక్కువ పరిమాణంలో బంగారం కొనాలనుకునే వారికి ఇది సెట్ అవుతుంది. కానీ రిటైర్మెంట్‌కు దగ్గరగా ఉన్నవారు, ప్రభుత్వ రక్షణ కోరుకునే వారికి ఇది కరెక్ట్ కాదు.

కొనే విధానం చాలా సింపుల్..

• స్టెప్ 1: ఈ టోకెన్లను ఆఫర్ చేసే అప్లికేషన్‌ను డౌన్‌లోడ్ చేసుకోండి.
• స్టెప్ 2: పాన్ కార్డ్, ఇతర కేవైసీ (KYC) వివరాలు , బ్యాంక్ అకౌంట్ లింక్ చేసి వెరిఫికేషన్ పూర్తి చేయండి (ఇందుకోసం నిర్దేశిత గుర్తింపు పత్రాలు అవసరమవుతాయి).
• స్టెప్ 3: యూపీఐ (UPI) లేదా నెట్ బ్యాంకింగ్ ద్వారా యాప్ వాలెట్‌లో డబ్బులు యాడ్ చేయండి.
• స్టెప్ 4: మార్కెట్ ప్లేస్‌లో PAXG (పాక్స్ గోల్డ్) లేదా XAUT (టెథర్ గోల్డ్) అని సెర్చ్ చేయండి.
• స్టెప్ 5: మీకు కావాల్సిన అమౌంట్ ఎంటర్ చేసి కొనుగోలును కన్ఫర్మ్ చేయండి.

వెంటనే ఆ టోకెన్లు మీ వాలెట్‌లోకి వచ్చేస్తాయి. అయితే ఇన్వెస్ట్ చేసే ముందు ఆ యాప్ నిబంధనలు, నమ్మకత్వాన్ని పూర్తిగా పరిశీలించుకోవడం మాత్రం మర్చిపోకండి!