Byju’s: ఒకపక్క లేఆఫ్స్.. మరోపక్క అప్పులు, వరుస రాజీనామాలు.. బైజూస్ పరిస్థితి ఏంటి..?

Byju's: దేశంలో అతిపెద్ద ఎడ్‌టెక్ స్టార్టప్ బైజూస్ పరిస్థితి రోజురోజుకూ దయనీయంగా మారుతోంది. ఒకపక్క అప్పుల కుప్పలు పెరిగిపోతోంటే మరోపక్క ఫండింగ్ ఇబ్బందులు కంపెనీని చుట్టుముట్టాయి.

ఇదే క్రమంలో కంపెనీ ఇటీవల అమెరికా ఇన్వెస్టర్లకు చెల్లింపులు చేయటం నిలిపివేసింది. ఈ వివాదం కాస్త యూఎస్ కోర్టుదాకా వెళ్లింది. ఇదే సమయంలో ఐటీ అధికారులు బెంగళూరులోని కార్యాలయాల్లో సోదాలు కూడా చేపట్టారు. కానీ.. ఇప్పుడు కంపెనీని రాజీనామాలు చుట్టుముట్టాయి. కీలక బాధ్యతలు చేపడుతున్న ప్రతినిధులు కంపెనీని వీడుతున్నారు.

ఎడ్టెక్ మేజర్‌ బైజు బోర్డులోని ముగ్గురు సభ్యులతో పాటు కంపెనీ అధికారిక ఆడిటర్ డెలాయిట్ రాజీనామా చేయటం ఇప్పుడు సంచలనంగా మారింది. రస్సెల్ డ్రేసెన్‌స్టాక్, వివియన్ వు, జీవీ రవిశంకర్ వైదొలిగినట్లు తెలుస్తోంది. రాజీనామాలను బోర్డు సభ్యులు ఇంకా ఆమోదించాల్సి ఉందని సంబంధిత వర్గాలు తెలిపాయి. అయితే బోర్డు సభ్యులు రాజీనామా చేయడాన్ని బైజూ ఒక ప్రకటనలో ఖండించింది.

బైజూస్ ఆడిటర్ గా ఉన్న డెలాయిట్ మార్చి 2021, మార్చి 2022తో ముగిసిన కాలానికి సంబంధించిన ఆడిట్ నివేదికలను ఫైనలైజ్ చేయడంలో అసమర్థత కారణంగా రాజీనామా చేసింది. దీంతో కంపెనీ BDO (MSKA & Associates)ని నియమించుకుంది. FY21లో బైజూస్ రూ.4,564 కోట్ల నష్టాన్ని నమోదు చేసింది. ఆదాయాలు 3.3% తగ్గి రూ.2,428 కోట్లకు చేరుకున్నాయి.