Adani-TotalEnergy: అదానీ ఆశలు బుగ్గిపాలేనా..! ఫ్రాన్స్ సంస్థ ఝలక్.. తక్షణం నిలిపివేత..

Adani-TotalEnergy: బంగారు బాతు గుడ్డు లాంటి ప్రాజెక్ట్ హైడ్రోజన్ ఇంధన తయారీ. ఎందుకంటే ఇది భవిష్యత్తులో పెట్రోల్, డీజిల్ కు ప్రత్యామ్నాయం కావటమే. పైగా గ్రీన్ ఎనర్జీని వినియోగించటం ద్వారా కర్బన ఉద్గారాలను తగ్గించేందుకు కేంద్రం ముందువరుసలో ఉందని ఇటీవలి బడ్జెట్ కేటాయింపులు సైతం చెబుతున్నాయి. ప్రస్తుతం ఈ రంగంలో దేశంలోని దిగ్గజ వ్యాపార సంస్థ రిలయన్స్ నాలుగు అడుగులు ముందే ఉందని చెప్పుకోవాలి.

ఫ్రాన్స్ సంస్థ..

ఫ్రాన్స్ కు చెందిన టోటల్ ఎనర్జీ కంపెనీ అదానీ గ్రూప్ తో కలిసి హైడ్రోన్ వ్యాపారంలో ముందుకెళ్లేందుకు జతకట్టినున్నట్లు ప్రకటించిన విషయం తెలిసిందే. అయితే హిండెన్ బర్గ్ రిపోర్ట్ ప్రకంపనల తర్వాత ఈ డీల్ ప్రశ్నార్థకంగా మారింది. ఈ పార్ట్నర్ షిప్ విషయంలో ముందుకు వెళ్లటాన్ని ప్రస్తుతానికి నిలిపివేస్తున్నట్లు టోటల్ ఎనర్జీస్ తాజాగా ప్రకటించింది. దీంతో అదానీ ఆశలపై నీలిమేఘాలు అలుముకున్నాయి.

చీఫ్ ఎగ్జిక్యూటివ్ ఏమన్నారంటే..

దిగ్గజ ఫ్రెంచ్ ఆయిల్ కంపెనీ టోటల్ ఎనర్జీ చీఫ్ ఎగ్జిక్యూటివ్ పాట్రిక్ పౌయాన్నే దీనిపై ప్రకటన చేశారు. విలేకరుల ప్రకటనలో అదానీ గ్రూప్ హిండెన్ బర్గ్ రిపోర్ట్ తర్వాత ఆర్థిక అవకతవకల వ్యవహారంలో ఆడిట్ నిర్వహిస్తున్నట్లు వెల్లడించారు. అయితే ఈ ఆడిట్ కు సంబంధించిన ఫలితాలు ఇంకా తమకు అందలేదని వాటి కోసం వేచి ఉన్నట్లు స్పష్టం చేశారు. అదానీతో కొత్త హైడ్రోజన్ వెంచర్‌ గురించి ప్రస్తుతానికి ప్రకటన మాత్రమే జరగిందని.. దీనికి సంబంధించి ఎలాంటి డీల్ సంతకాలు జరగలేదని పౌయాన్నే తెలిపారు. ఆడిట్ ముందుకు సాగుతున్నప్పుడు విషయాలను పాజ్ చేయడం మంచిదని భావిస్తున్నట్లు పేర్కొన్నారు.

ప్రస్తుత పెట్టుబడులు..

అదానీ టోటల్ గ్యాస్, అదానీ గ్రీన్ ఎనర్జీ కంపెనీల్లో ఫ్రెంచ్ కంపెనీ టోటల్ ఎనర్జీకి వాటాలు ఉన్నాయి. ఈ క్రమంలో అదానీ గ్రీన్ ఇప్పటికీ మనం పెట్టుబడి పెట్టిన దానికంటే రెండింతలు విలువైనది, అదానీ గ్యాస్ ఇంకా ఎనిమిది రెట్లు ఎక్కువని తెలిపింది. ప్రస్తుతం వారి అకౌంట్స్ ఆరోగ్యకరంగానే ఉన్నాయని తెలిపారు.

వారం కిందట..

టోటల్ ఎనర్జీస్ ప్రపంచంలోని అతిపెద్ద ఇంధన సంస్థల్లో ఒకటిగా గుర్తింపు పొందింది. పైగా దేశంలోని నాలుగు జాయింట్ వెంచర్లలో అదానీ గ్రూప్‌కు భాగస్వామిగా ఉంది. అయితే అదానీ గ్రూప్ కంపెనీల్లో అకౌంటింగ్ మోసాలు జరిగాయంటూ వచ్చిన ఆరోపణలతో.. ఆడిటర్లలో ఒకరిని జనరల్ ఆడిట్ కోసం నియమించుకోవాలని తీసుకున్న నిర్ణయాన్ని టోటల్ ఎనర్జీ స్వాగతించింది.