గూగుల్ Torch TPU సీక్రెట్ మిషన్.. AI రంగంలో Nvidia ఆధిపత్యం ముగిసినట్లే..

కృత్రిమ మేధస్సు (AI) కంప్యూటింగ్ రంగంలో ఎన్విడియా (Nvidia) దాదాపు ఏకపక్ష ఆధిపత్యాన్ని కొనసాగిస్తోన్న సంగతి విదితమే. పెద్ద భాషా మోడళ్ల నుంచి జనరేటివ్ AI వరకు.. ప్రపంచవ్యాప్తంగా ఉపయోగిస్తున్న చాలా AI సిస్టమ్స్ ఎన్విడియా తయారు చేసిన గ్రాఫిక్స్ ప్రాసెసింగ్ యూనిట్ల (GPUలు)పై ఆధారపడుతున్నాయి. అయితే, ఈ పరిస్థితిని మార్చేందుకు గూగుల్ (Google), మెటా (Meta) కీలక అడుగులు వేయనున్నట్లుగా వార్తలు వస్తున్నాయి. రాయిటర్స్ నివేదిక ప్రకారం.. ఎన్విడియా ఆధిపత్యాన్ని తగ్గించాలనే లక్ష్యంతో గూగుల్, మెటాతో కలిసి పని చేయాలని యోచిస్తోంది.

ఈ సహకారంలో ప్రధాన అంశం గూగుల్ రూపొందించిన టెన్సర్ ప్రాసెసింగ్ యూనిట్లు (TPUలు). ఇవి ప్రత్యేకంగా AI, మెషిన్ లెర్నింగ్ పనిభారాల కోసం రూపొందించిన చిప్‌లు. ప్రస్తుతం ఈ TPUలు ఎక్కువగా గూగుల్ స్వంత AI ఫ్రేమ్‌వర్క్ అయిన JAX కోసం ఆప్టిమైజ్ చేయబడ్డాయి. కానీ ప్రపంచవ్యాప్తంగా ఎక్కువ మంది డెవలపర్లు ఉపయోగించే AI డెవలప్‌మెంట్ ఫ్రేమ్‌వర్క్ PyTorch. ఈ PyTorchను 2016లో మెటా ఓపెన్-సోర్స్‌గా విడుదల చేసింది.

Photo Credit:

Reuters

PyTorch ప్రధానంగా ఎన్విడియా GPUలతో సమర్థవంతంగా పనిచేసేలా రూపొందించబడింది. అందువల్ల TPUలు వంటి ప్రత్యామ్నాయ చిప్‌లను ఉపయోగించాలనుకునే కంపెనీలకు సాంకేతిక అడ్డంకులు ఎదురవుతున్నాయి. ఇదే సమస్యను పరిష్కరించేందుకే గూగుల్ కొత్తగా టార్చ్ TPU (Torch TPU) అనే ప్రాజెక్టును ప్రారంభించినట్లు తెలుస్తోంది. ఈ టార్చ్ TPU ప్రాజెక్ట్ లక్ష్యం PyTorch ఫ్రేమ్‌వర్క్‌ను గూగుల్ TPUలతో మరింత అనుకూలంగా మార్చడం. దీని ద్వారా కంపెనీలు తమ AI మోడళ్లను పెద్దగా కోడ్ మార్చకుండానే లేదా హార్డ్‌వేర్‌ను పూర్తిగా మార్చకుండానే Nvidia GPUల నుంచి Google TPUలకు మార్చుకునే అవకాశం కలుగుతుంది. ఈ మార్పు పరిశ్రమలో ఎన్విడియాపై ఉన్న అధిక ఆధారాన్ని తగ్గించగలదని గూగుల్ భావిస్తోంది.

ఈ ప్రయత్నంలో మెటా కీలక పాత్ర పోషిస్తోంది. మెటా ఇప్పటికే బిలియన్ డాలర్ల విలువైన ఒప్పందాల్లో TPUలను వినియోగించే అవకాశాలను పరిశీలిస్తోంది. దీంతో టార్చ్ TPU ప్రాజెక్టుపై గూగుల్-మెటా మధ్య సన్నిహిత సహకారం కొనసాగుతోంది. గూగుల్ ఈ సాఫ్ట్‌వేర్‌లోని కొన్ని భాగాలను ఓపెన్-సోర్స్ చేయడంపైనా ఆలోచిస్తోంది. తద్వారా మరిన్ని సంస్థలు TPUలను సులభంగా స్వీకరించగలవు.

గతంలో గూగుల్ TPUలను ఎక్కువగా తన అంతర్గత అవసరాలకే పరిమితం చేసింది. అయితే 2022 తర్వాత గూగుల్ క్లౌడ్ ద్వారా ఈ చిప్‌లను ఇతర సంస్థలకు కూడా అందించడం ప్రారంభించింది. దీంతో ఉత్పత్తి పెరిగింది. బాహ్య కస్టమర్ల నుంచి AI పనిభారాలను ఆకర్షించేందుకు గూగుల్ మరింత దూకుడుగా ముందుకు వస్తోంది.

ఇప్పటికీ AI హార్డ్‌వేర్ రంగంలో ఎన్విడియా అగ్రగామిగానే ఉంది. ఇటీవల OpenAI, అమెజాన్ వెబ్ సర్వీసెస్ (AWS)తో 38 బిలియన్ డాలర్లతో ఒప్పందం కుదుర్చుకుంది, ఇందులో Nvidia GPUలే ప్రధాన పాత్ర పోషిస్తున్నాయి. AI బూమ్ కారణంగా Nvidia మార్కెట్ విలువ ఈ ఏడాది ప్రారంభంలో 4 ట్రిలియన్ డాలర్లను కూడా దాటింది. అయితే, Google-Meta భాగస్వామ్యం విజయవంతమైతే, AI కంప్యూటింగ్ రంగంలో కొత్త పోటీ మొదలయ్యే అవకాశాలు ఉన్నాయి. ఇది డెవలపర్లు, కంపెనీలకు మరిన్ని ఎంపికలు అందించడమే కాకుండా, Nvidia ఆధిపత్యానికి గట్టి సవాల్‌గా మారవచ్చని నిపుణులు భావిస్తున్నారు.