Rama Mandir: రామమందిర నిర్మాణానికి 5,500 కోట్ల భారీ వితరణ.. టాప్ విరాళాలిచ్చిన వ్యక్తులు వీరే..

Donations: అయోధ్యలో రామ మందిరం ప్రతిష్ఠతో దేశం మొత్తం రామనామం మారుమ్రోగిపోయింది. ప్రధాని నుంచి పలువురు సెలబ్రిటీలు, రాజకీయ ప్రముఖులు ఈ చారిత్రక కార్యక్రమాన్ని ప్రత్యక్షంగా వీక్షించారు. అయితే ఈ స్థాయిలో ఆలయ నిర్మాణానికి సామాన్యుల నుంచి బడా వ్యాపారవేత్తల వరకు భారీ విరాళాలు సమర్పించారు.

దేశ, విదేశాల్లోని భక్తుల విరాళాలతో అయోధ్యలో రామ మందిరం నిర్మించబడింది. దీనికోసం సేకరించిన విరాళాలు ఇప్పటివరకు 5 వేల 500 కోట్లు దాటినట్లు నివేదికలు చెబుతున్నాయి. భక్తుల ఉదారంగా విరాళాలు ఇవ్వడంతోనే ఇంతటి పెద్ద ప్రాజెక్ట్ సునాయాసంగా పూర్తైనట్లు విశ్లేషకులు పేర్కొంటున్నారు.

సూరత్‌కు చెందిన వజ్రాల వ్యాపారి దిలీప్ కుమార్ వి లఖి మరియు అతని కుటుంబ సభ్యులు ఈ పుణ్యాకార్యానికి పెద్ద మొత్తంలో విరాళాలు ఇచ్చారు. ఏకంగా 101 కిలోల బంగారాన్ని రాముడికి కానుకగా సమర్పించారు. వాటి విలువ 68 కోట్లకు పైమాటే. దీనితో రామమందిరం తలుపులు, గర్భగుడి త్రిశూలం, డమరు సహా స్తంభాలను అలంకరించారు.

రామమందిర నిర్మాణానికి ఆధ్యాత్మిక గురువు మొరారీ బాపు 11.3 కోట్లు అందించారు. అమెరికా, కెనడా మరియు యునైటెడ్ కింగ్‌డమ్‌లోని ఆయన మద్దతుదారులు కూడా వ్యక్తిగతంగా 8 కోట్ల వరకు విరాళాలు ఇచ్చారు. దీంతో ఆయన తరపు నుంచి ఆలయానికి అందిన మొత్తం 18.6 కోట్లని తెలుస్తోంది.

పలు నివేదికల ప్రకారం.. గుజరాత్‌లోని శ్రీ రామకృష్ణ ఎక్స్‌పోర్ట్స్‌కు చెందిన గోవింద్‌భాయ్ ధోలాకియా ఆలయానికి 11 కోట్ల రూపాయల విరాళాన్ని ఇచ్చారు. పాట్నా మహావీర్ మందిర్ 10 కోట్లు, స్విస్ గ్లాస్‌కోట్ ఎక్విప్‌మెంట్స్‌కు చెందిన మహేష్ కబుతర్‌వాలా 5 కోట్లు, ఇండియా సహా ఆసియాలో అత్యంత సంపన్న అంబానీ కుటుంబం జన్మభూమి తీర్థ క్షేత్ర ట్రస్ట్‌కు 2.51 కోట్లు మేర విరాళంగా అందించారు.

మాతృశ్రీ కంకుబా ఫౌండేషన్‌కు చెందిన లావ్‌జీ బాద్‌షా 1 కోటి విరాళం అందించారని నివేదికలు చెబుతున్నాయి. వీరితో పాటు చెన్నైకి చెందిన డబ్ల్యూఎస్ హబీబ్ అనే ముస్లిం వ్యాపారవేత్త కూడా లక్ష రూపాయలు రామమందిర నిర్మాణం కోసం విరాళం ఇచ్చినట్లు సమాచారం.