2023 తర్వాత తొలిసారి అమెరికాకు రష్యా డీజిల్‌.. 40 వేల టన్నులతో బయలుదేరిన మూడు ట్యాంకర్లు..

Russian Tankers Carrying Diesel: రష్యా-ఉక్రెయిన్ యుద్ధం ప్రారంభమైన తర్వాత అంతర్జాతీయ భౌగోళిక రాజకీయాల్లో ఊహించని పరిణామం చోటుచేసుకుంది. తీవ్ర ఆంక్షల నడుమ రష్యా నుంచి అమెరికాకు డీజిల్ రవాణా అధికారికంగా పునఃప్రారంభమైంది. నూతన ద్వైపాక్షిక దిగుమతి ఒప్పందంలో భాగంగా రష్యన్ డీజిల్‌తో కూడిన మూడు భారీ చమురు ట్యాంకర్లు ప్రిమోర్స్క్ ఓడరేవు నుండి బయలుదేరి ఉత్తర అమెరికా వైపు పయనిస్తున్నాయని రష్యా ఉప ప్రధాని అలెగ్జాండర్ నోవాక్ శుక్రవారం అధికారికంగా వెల్లడించారు. 2023లో ఆంక్షలు కఠినతరం చేసిన తర్వాత రష్యా నుంచి అమెరికాకు డీజిల్ సరఫరా కావడం ఇదే తొలిసారి.

అమెరికా అధ్యక్షుడు డోనాల్డ్ ట్రంప్, రష్యా అధ్యక్షుడు వ్లాదిమిర్ పుతిన్‌తో జరిపిన సుదీర్ఘ ఫోన్ సంభాషణ అనంతరం ఈ చారిత్రాత్మక ఒప్పందాన్ని ప్రకటించారు. అమెరికాలో రాబోయే మధ్యంతర ఎన్నికల (Mid-term Elections) ముందు విపరీతంగా పెరిగిన ఇంధన ధరలు, ద్రవ్యోల్బణ సెగను చల్లార్చడమే లక్ష్యంగా ట్రంప్ పరిపాలనా యంత్రాంగం ఈ వ్యూహాత్మక నిర్ణయం తీసుకుంది. రష్యన్ డైరెక్ట్ ఇన్వెస్ట్‌మెంట్ ఫండ్ (RDIF) ప్రత్యక్ష భాగస్వామ్యంతో తొలి మూడు ఇంధన ట్యాంకర్లు ఇప్పటికే అట్లాంటిక్ మహాసముద్రం ద్వారా అమెరికా తూర్పు తీరానికి పయనమయ్యాయి. మెరైన్ ట్రాకింగ్ సంస్థ క్లెప్లర్ (Kpler) అందించిన డేటా ప్రకారం.. మొదటి ట్యాంకర్ శుక్రవారం నాటికి న్యూయార్క్ వైపునకు సంకేతాలను పంపడం ప్రారంభించిందని, ఇది నవంబర్ 7 నాటికి అమెరికా తీరానికి చేరుకోనుందని అసోసియేటెడ్ ప్రెస్ (AP) నివేదించింది.

ఈ నివేదికలను క్రెమ్లిన్ ప్రతినిధి డిమిత్రి పెస్కోవ్ కూడా ధృవీకరించారు. తొలి ఆయిల్ ట్యాంకర్ వినియోగదారుల వైపు వెళ్తోందని, ఇకపై సాధారణ స్థాయి సరఫరాలు నిరంతరం కొనసాగుతాయని ఆయన స్పష్టం చేశారు. తొలి విడత రవాణాలో భాగమైన మూడు ట్యాంకర్లలో కలిపి సుమారు 40,000 మెట్రిక్ టన్నుల (దాదాపు 3,00,000 బ్యారెళ్లు) శుద్ధి చేసిన డీజిల్ ఉంది.

అమెరికా రోజువారీ డీజిల్ వినియోగం 4 మిలియన్ బ్యారెళ్లుగా ఉండగా, తొలి సరఫరా అందులో 7 శాతానికి సమానం. అక్టోబర్ నెలలోనే రష్యా సంస్థలు అమెరికాకు మొత్తం 5,00,000 మెట్రిక్ టన్నుల డీజిల్‌ను ఎగుమతి చేసే అవకాశం ఉందని నోవాక్ వివరించారు. ట్రంప్ వెల్లడించిన ప్రణాళికల ప్రకారం.. రష్యా తక్షణమే 3 లక్షల టన్నులకు పైగా డీజిల్‌ను, నవంబర్‌లో అదనంగా 5 లక్షల టన్నులను, ఆ తదుపరి విడతలో మరో 10 లక్షల టన్నులను సరఫరా చేయనుంది.

Also Read

రష్యాతో కాళ్లబేరానికి ట్రంప్.. డీజిల్ కొనుగోలుకు అమెరికా సిద్ధమని ప్రకటన.. ఆంక్షలు ఎత్తివేత..

ఈ ఒప్పందం అంతర్జాతీయంగా పెను సంచలనం సృష్టించడమే కాకుండా తీవ్ర రాజకీయ విమర్శలకు దారితీసింది. ఉక్రెయిన్ అధ్యక్షుడు వోలోడిమిర్ జెలెన్స్కీ దీనిపై తీవ్ర ఆగ్రహం వ్యక్తం చేస్తూ "బలమైన భాగస్వాములు తీసుకున్న అత్యంత బలహీనమైన నిర్ణయం" అని అభివర్ణించారు. అమెరికా కాంగ్రెస్‌లోని రిపబ్లికన్లు, డెమోక్రాట్లు ఇద్దరూ ట్రంప్ నిర్ణయాన్ని తీవ్రంగా తప్పుపట్టారు, ఆయన అమెరికా చట్టాలను ఉల్లంఘించారని ఆరోపించారు. రష్యా నుంచి ఇంధనాన్ని కొనుగోలు చేసే ప్రధాన 5 దేశాలపై (భారత్ సహా) 100 శాతం వరకు సుంకాలను విధించే అధికారాన్ని కల్పించే 'లిండ్సే ఓ గ్రాహం' చట్టానికి ప్రెసిడెంట్ ట్రంప్ గత నెలలోనే ఆమోదం తెలిపారు.

అయితే, ఈ డీజిల్ ఒప్పందం కుదుర్చుకున్న కొద్ది రోజులకే అమెరికా జాతీయ ప్రయోజనాల దృష్ట్యా సదరు ఆంక్షల చట్టాన్ని తాత్కాలికంగా మాఫీ (Waiver) చేస్తున్నట్లు ప్రకటించడం ద్వారా ట్రంప్ తమ పాత ఆంక్షల వైఖరిని పక్కనబెట్టారు. ఈ నిర్ణయాలు రష్యాతో వైరాన్ని ముగించడానికి ఇష్టపడని జెలెన్స్కీపై ట్రంప్ అసంతృప్తిని, మాస్కోతో సంబంధాలను పునరుద్ధరించే దిశగా ట్రంప్ తీసుకుంటున్న ముందడుగును స్పష్టంగా సూచిస్తున్నాయి.