హోమ్ లోన్‌పై వడ్డీని భారీగా తగ్గించే 7 టిప్స్.. స్వయంగా ప్రముఖ బ్యాంకే లీక్ చేసింది

ఇల్లు కొనడం ప్రతి ఒక్కరి జీవితంలో ఒక పెద్ద డ్రీమ్‌. ఆ డ్రీమ్‌ ను నిజం చేసుకోవడానికి హోమ్ లోన్‌ చాలామందికి ఒక లేడర్‌ లాంటిది. కానీ లోన్ తీసుకున్నాక వడ్డీ రేట్లు మన జేబుపై భారంగా మారతాయి. సాధారణంగా మీ ఇన్కమ్‌, లోన్ అమౌంట్‌, క్రెడిట్ స్కోర్‌ ఆధారంగా బ్యాంకులు వడ్డీ రేట్లు నిర్ణయిస్తాయి. అయితే కొన్ని స్మార్ట్‌ మార్గాలు పాటిస్తే, లోన్‌కి మీ ఎలిజిబిలిటీ పెరిగి బ్యాంకు నుంచి తక్కువ వడ్డీ రేటుతో లోన్ పొందవచ్చు. ఇవే పంజాబ్ నేషనల్ బ్యాంక్ (PNB) చెప్పిన 7 చిట్కాలు.

డౌన్ పేమెంట్‌ ఎక్కువ చేయండి:
సాధారణంగా రూ.35 లక్షల వరకు ఉన్న హోమ్ లోన్లకు బ్యాంకులు తక్కువ వడ్డీ రేట్లు ఇస్తాయి. కాబట్టి మీవద్ద ఉన్నంత మొత్తాన్ని డౌన్ పేమెంట్‌గా ముందే చెల్లిస్తే, లోన్ అమౌంట్‌ తగ్గిపోతుంది. లోన్ అమౌంట్ తక్కువైతే EMI కూడా తగ్గుతుంది. దీని వల్ల బ్యాంకుకు మీరు రిస్క్‌ లేని కస్టమర్‌ అన్న నమ్మకం వస్తుంది.

లాంగ్ టర్మ్‌ టెన్యూర్‌ ఎంచుకోవడం:
మీరు 15-20 సంవత్సరాలకు పైగా లోన్ తీసుకుంటే, నెల నెలా చెల్లించాల్సిన EMI బరువు తగ్గిపోతుంది. అలాగే, బ్యాంకు కూడా మీరు సులభంగా రీపే చేయగలరనే నమ్మకంతో తక్కువ వడ్డీ ఆఫర్ చేయడానికి ముందుంటుంది.

ఫిక్స్‌డ్ vs ఫ్లోటింగ్ వడ్డీ రేట్లు :
ఫిక్స్‌డ్ రేట్‌లో మీ EMI కొన్ని సంవత్సరాల పాటు స్థిరంగా ఉంటుంది. కానీ మార్కెట్ పరిస్థితులు మారినా EMI మారదు. ఫ్లోటింగ్ రేట్‌ మాత్రం మార్కెట్‌కి అనుగుణంగా మారుతూ ఉంటుంది. రేటు తగ్గితే, EMI లేదా లోన్ వ్యవధి కూడా తగ్గిపోతుంది. ఇప్పటి రోజుల్లో చాలా బ్యాంకులు ఫ్లోటింగ్ రేట్‌కి ప్రాధాన్యం ఇస్తున్నాయి. ఇవి ఫిక్స్‌డ్ కంటే కొంచెం చవకగా ఉంటాయి.

నమ్మకమైన కస్టమర్‌గా మారడం:
లోన్ తీసుకునే వ్యక్తి ఆదాయం స్థిరంగా ఉండాలి. ముఖ్యంగా గవర్నమెంట్ జాబ్‌లో లేదా పేరున్న ప్రైవేట్ కంపెనీలో పనిచేస్తే బ్యాంకులు వారిని విశ్వసనీయ కస్టమర్‌గా భావించి మంచి వడ్డీ రేట్లతో లోన్ ఇస్తాయి.

క్రెడిట్ స్కోర్ మెయింటైన్ చేయడం:
మీ క్రెడిట్ స్కోర్‌ 750కి పైగా ఉంటే, బ్యాంకులు మీ అప్లికేషన్‌కి ప్రాధాన్యం ఇస్తాయి. బిల్లులు, పాత EMIలు టైమ్‌కి క్లియర్ చేస్తూ ఉండడం ద్వారా స్కోర్ మెరుగవుతుంది. క్రెడిట్ హిస్టరీ బాగుంటే తక్కువ వడ్డీ రేటు పొందే అవకాశం ఉంటుంది.

మహిళలకు స్పెషల్ డిస్కౌంట్:
మహిళల పేరుతో (భార్య లేదా తల్లి పేరుతో) లోన్ అప్లై చేస్తే, వడ్డీ రేటుపై 0.05% వరకు డిస్కౌంట్ లభిస్తుంది. కాబట్టి ఇంట్లో మహిళ పేరుతో అప్లై చేస్తే చిన్న డిస్కౌంట్‌ అయినా మంచి సేవింగ్స్‌గా మారుతుంది.

హోమ్ లోన్ బ్యాలెన్స్ ట్రాన్స్‌ఫర్:
మీరు ఇప్పటికే లోన్ తీసుకుని ఉంటే, మధ్యలో మరో బ్యాంక్‌ తక్కువ వడ్డీ ఆఫర్ ఇస్తే మీ లోన్‌ను ఆ బ్యాంక్‌కి ట్రాన్స్‌ఫర్ చేసుకోవచ్చు. కానీ దీనికి ప్రాసెసింగ్ ఫీజులు, ఇతర ఛార్జీలు ఉంటాయి. కాబట్టి మొత్తం లెక్క వేసుకుని నిజంగా వడ్డీ ఆదా ఎక్కువగా ఉంటేనే ట్రాన్స్‌ఫర్ చేయడం మంచిది.

అదనంగా, బ్యాంకులు ఫెస్టివల్ ఆఫర్స్ సమయంలో చిన్న చిన్న రాయితీలు ఇస్తాయి. దీపావళి, న్యూ ఇయర్, అక్షయ తృతీయ లాంటి వేళల్లో ప్రాసెసింగ్ ఫీజు మాఫీ చేయడం లేదా వడ్డీ రేటుపై చిన్న డిస్కౌంట్ ఇవ్వడం వంటివి చేస్తాయి. ఇవి చిన్న మొత్తాలే అయినా, మొత్తం లెక్కలో పెద్ద సేవింగ్స్‌గా మారతాయి.

మొత్తం మీద, హోమ్ లోన్ తీసుకోవడం కష్టమే అనిపించినా, ఈ చిన్న చిన్న జాగ్రత్తలు పాటిస్తే మీరు లక్షల రూపాయల వడ్డీ ఆదా చేసుకోవచ్చు. మీ క్రెడిట్ స్కోర్‌ బాగుంటే, మంచి జాబ్ ఉంటే, మరియు సరైన టైంలో సరైన ఆఫర్‌ వాడుకుంటే, చీప్ హోమ్ లోన్ పొందడం అసలు కష్టం కాదు.