మిల్లీగ్రాముల్లో కూడా బంగారం కొనొచ్చు.. అదీ ఆన్‌లైన్‌లో సురక్షితంగా.. సరికొత్త EGR ట్రేడింగ్!

భారతీయులకు బంగారంపై ఉన్న మక్కువ ఎలాంటిదో ప్రత్యేకంగా చెప్పక్కర్లేదు. ప్రపంచంలోనే అత్యధికంగా పసిడిని వినియోగించే దేశాల్లో భారత్ ఒకటి. అయితే, ఇప్పటివరకు మెజారిటీ ప్రజలు స్థానిక జ్యువెలరీ షాపులకు వెళ్లి ఫిజికల్ గోల్డ్ (నగలు లేదా కాయిన్స్) కొనడానికే మొగ్గు చూపేవారు. కానీ, ఇప్పుడు కాలం మారింది. షేర్ మార్కెట్ షేర్ల లాగే బంగారాన్ని కూడా మీ డీమ్యాట్ అకౌంట్‌లో డిజిటల్‌గా దాచుకునే సరికొత్త విప్లవానికి నేషనల్ స్టాక్ ఎక్స్ఛేంజ్ (NSE) తెరలేపింది.

పంటోమత్ గ్రూప్‌నకు చెందిన 'ది వెల్త్ కంపెనీ', ఎన్‌ఎస్‌ఈ యొక్క ఎలక్ట్రానిక్ గోల్డ్ రిసీట్స్ (EGR) సెగ్మెంట్‌లో చేరిన మొదటి అసెట్ మేనేజ్‌మెంట్ కంపెనీ (AMC) గా నిలిచింది. ఈ పరిణామం భారత డిజిటల్ గోల్డ్ ఇన్వెస్ట్‌మెంట్ రంగాన్ని పూర్తిగా మార్చేయబోతోందని మార్కెట్ నిపుణులు అంచనా వేస్తున్నారు.

ఎలక్ట్రానిక్ గోల్డ్ రిసీట్ (EGR) అంటే ఏంటి?

ఎలక్ట్రానిక్ గోల్డ్ రిసీట్ లేదా EGR అనేది ఫిజికల్ గోల్డ్‌కు సంబంధించిన ఒక డిజిటల్ యాజమాన్య పత్రం (Proof of ownership). సెబీ (SEBI) ఆమోదించిన గోల్డ్ ఎక్స్ఛేంజ్ చొరవ కింద ఈ కాన్సెప్ట్ వచ్చింది.

• మీరు NSE లో కొనుగోలు చేసే ప్రతి ఒక్క EGR యూనిట్‌కు బ్యాక్-అప్‌గా అంతే సమానమైన అసలైన నిఖార్సయిన భౌతిక బంగారం (Physical gold) సెబీ రిజిస్టర్డ్ వాల్ట్ (Vault) లో అత్యంత సురక్షితంగా భద్రపరచబడుతుంది.
• మీరు నేరుగా బంగారాన్ని ఇంట్లో దాచుకునే రిస్క్ లేకుండా.. మీ డీమ్యాట్ అకౌంట్ లోనే ఈ రిసీట్లను భద్రపరుచుకోవచ్చు. స్టాక్స్ లేదా బాండ్ల మాదిరిగానే వీటిని ఎప్పుడైనా ఎన్‌ఎస్‌ఈ ప్లాట్‌ఫామ్‌పై సులభంగా కొనుగోలు చేయవచ్చు లేదా విక్రయించవచ్చు.

EGR ట్రేడింగ్ ఎలా పనిచేస్తుంది?

దీని ప్రాసెస్ చాలా సింపుల్‌గా ఉంటుంది. ఎవరైనా ఒకరు ఫిజికల్ బంగారాన్ని సెబీ రిజిస్టర్డ్ వాల్ట్ మేనేజర్‌కు అప్పగించినప్పుడు.. అన్ని రకాల తనిఖీల తర్వాత వాల్ట్ మేనేజర్ దానికి సమానమైన ఎలక్ట్రానిక్ రిసీట్లను (EGRs) కస్టమర్ డీమ్యాట్ అకౌంట్లోకి క్రెడిట్ చేస్తారు.

ఆ తర్వాత NSE ఈ EGR ట్రేడింగ్ కోసం ప్లాట్‌ఫామ్‌ను అందిస్తుంది. దీని క్లియరింగ్, సెటిల్‌మెంట్ బాధ్యతలను 'ఎన్‌ఎస్‌ఈ క్లియరింగ్ లిమిటెడ్' చూసుకుంటుంది. ఇన్వెస్టర్లు ఈ రిసీట్లను కేవలం పెట్టుబడిగా దాచుకోవచ్చు.. లేదా భవిష్యత్తులో ఎప్పుడైనా సరే ఆ డిజిటల్ రిసీట్లను తిరిగి అసలైన ఫిజికల్ గోల్డ్‌గా మార్చుకుని డెలివరీ కూడా తీసుకోవచ్చు. వెంటనే డెలివరీ తీసుకోవాలనే రూల్ ఏమీ లేదు.

ఎవరు ఇన్వెస్ట్ చేయవచ్చు? దీని ప్రత్యేకతలు ఏంటి?

ముఖ్యమైన విషయం: ఈ EGR ట్రేడింగ్‌లో పాల్గొనడానికి మీ దగ్గర ముందే ఫిజికల్ గోల్డ్ ఉండాల్సిన అవసరం లేదు. కేవలం ఒక డీమ్యాట్ అకౌంట్ , బ్రోకర్ యాక్సెస్ ఉంటే సరిపోతుంది. సామాన్య రిటైల్ ఇన్వెస్టర్లు, జ్యువెలర్స్, బులియన్ ట్రేడర్స్, ఇన్‌స్టిట్యూషనల్ ఇన్వెస్టర్లు ఎవరైనా ఇందులో భాగస్వాములు కావచ్చు.

• చిన్న పెట్టుబడులు కూడా సాధ్యమే: NSE ప్రస్తుతం 999 ప్యూరిటీ (స్వచ్ఛత), 995 ప్యూరిటీ ఆప్షన్లను అందిస్తోంది. కనీసం 100 మిల్లీగ్రాముల (100 mg) నుండి 1 కిలోగ్రాము వరకు వివిధ డినామినేషన్లలో ఇది లభిస్తుంది. కాబట్టి చిన్న ఇన్వెస్టర్లు కూడా ప్రతి నెలా కొద్దికొద్దిగా డిజిటల్ బంగారాన్ని కొనుగోలు చేయవచ్చు.
• వన్ నేషన్.. వన్ ప్రైస్: ఫిజికల్ మార్కెట్లలో ఒక్కో నగరంలో ఒక్కో రకమైన గోల్డ్ రేట్ ఉంటుంది. కానీ ఎన్‌ఎస్‌ఈ తెచ్చిన ఈ విధానం వల్ల దేశవ్యాప్తంగా ఒకే స్థిరమైన, పారదర్శకమైన ధర అందుబాటులో ఉంటుంది.
• ట్రేడింగ్ సమయాలు: సోమవారం నుండి శుక్రవారం వరకు ఉదయం 9:00 గంటల నుండి రాత్రి 11:30 గంటల వరకు ఈ ట్రేడింగ్ అందుబాటులో ఉంటుంది. ఇది T+1 బేసిస్ (ట్రేడింగ్ జరిగిన మరుసటి రోజు) పై సెటిల్ అవుతుంది.

బంగారం పెట్టుబడులకు సరికొత్త వేదిక

ఇప్పటివరకు పేపర్ గోల్డ్ అనగానే అందరికీ సావరిన్ గోల్డ్ బాండ్స్ (SGB) లేదా గోల్డ్ ఈటీఎఫ్‌లు మాత్రమే గుర్తొచ్చేవి. కానీ, నేరుగా ఫిజికల్ గోల్డ్ సపోర్ట్ ఉంటూ, ఎప్పుడు కావాలంటే అప్పుడు మార్చుకునే వెసులుబాటు ఉండటం వల్ల ఈ EGR విధానం రాబోయే రోజుల్లో ఇన్వెస్టర్లకు ఒక అద్భుతమైన ఆప్షన్‌గా మారనుంది.