Ethanol: చెరకు నుంచి ఇథనాల్ తయారీపై ఉన్న నిషేధం ఎత్తివేత..

ఇథనాల్ ఉత్పత్తికి సంబంధించిన విధానాల్లో కేంద్ర ప్రభుత్వం కీలక మార్పులు చేసింది. చెరకుతో ఇథనాల్‌ తయారు చేయడంపై విధించిన నిషేధాన్ని రద్దు చేసింది. ఇందుకు సంబంధించిన గురువారం ఒక నోటిఫికేషన్‌ కూడా వచ్చింది. ఈ మార్పు చెరకు రైతులు, చక్కెర మిల్లులు, స్టాక్ మార్కెట్‌లోని చక్కెర కంపెనీలకు శుభవార్తగా చెప్పుకోవచ్చు. వినియోగదారుల వ్యవహారాలు, ఆహారం, ప్రజాపంపిణీ మంత్రిత్వ శాఖ ఆగస్టు 29న విడుదల చేసిన నోటిఫికేషన్‌లో చెరకు నుంచి ఇథనాల్ తయారీపై నిషేధాన్ని పూర్తిగా ఎత్తివేసినట్లు తెలిపింది.

ఇప్పుడు చక్కెర మిల్లులు చెరకు రసం, చక్కెర సిరప్ నుంచి ఇథనాల్ తయారు చేయడానికి అనుమతి పొందాయి. ఈ మినహాయింపు ఇథనాల్ సరఫరా సంవత్సరానికి 2024-25 అమలు చేయనున్నారు. 1 నవంబర్ 2024 నుంచి అమలులోకి రాబోతోంది. చెక్కర ధర పెరగడంతో పాటు ఉత్పత్తి తగ్గడంతో చెరకు రసం లేదా చక్కెర సిరప్ నుంచి ఇథనాల్ తయారు చేయడంపై నిషేధం విధించారు.

ఇథనాల్‌ను తయారు చేసేందుకు చక్కెర మిల్లులు నిర్దిష్ట మొత్తంలో చెరకు రసం లేదా చక్కెర సిరప్‌ను మాత్రమే ఉపయోగించే అవకాశం ఉండేది. ఇప్పుడు ఈ పరిమితిని తొలగించడంతో పాటు, ఇథనాల్ ఉత్పత్తికి బి-హెవీ, సి-హెవీ మొలాసిస్‌ల వినియోగాన్ని కూడా ప్రభుత్వం ఆమోదించింది. 2024-25 ఇథనాల్ సరఫరా సంవత్సరంలో చక్కెర మిల్లులు, డిస్టిలరీలు చెరకు రసం, చక్కెర సిరప్, బి-హెవీ మొలాసిస్ మరియు సి-హెవీ మొలాసిస్ నుంచి ఇథనాల్‌ను ఉత్పత్తి చేయడానికి అనుమతి లభించింది.

దీనితో పాటు ఇథనాల్ ఉత్పత్తి కోసం ఎఫ్‌సిఐ నుంచి 23 లక్షల టన్నుల వరకు బియ్యాన్ని కొనుగోలు చేయడానికి డిస్టిలరీలకు ప్రభుత్వం అనుమతించింది. దేశంలో ఇథనాల్ ఉత్పత్తిని ప్రోత్సహించడమే ప్రభుత్వ లక్ష్యంగా ప్రభుత్వం పని చేస్తోంది. ఇంధనాలలో ఇథనాల్ కలపడానికి భారత ప్రభుత్వం ప్రత్యేక వ్యూహాన్ని అనుసరిస్తోంది. దీని కింద ఇప్పటికే ఇథనాల్‌ను పెట్రోల్‌లో కలుపుతున్న సంగతి తెలిసిందే. ఇప్పుడు డీజిల్‌లో కూడా ఇథనాల్ కలపడానికి సన్నాహాలు చేస్తున్నారు. ఇథనాల్ ఉత్పత్తి విధానంలో ఈ మార్పు కారణంగా చక్కెర నిల్వల్లో అద్భుతమైన పెరుగుదల కనిపిస్తోంది. షుగర్ స్టాక్స్ ప్రారంభ ట్రేడింగ్‌లో 10 శాతం పెరిగాయి.