దుబాయ్ పోలీసుల వాహన శ్రేణిలో.. ఎలాన్ మస్క్ టెస్లా సైబర్‌ట్రక్!

ఎలాన్ మస్క్ కార్ల కంపెనీ 'టెస్లా' ఇటీవల అత్యంత ప్రతిష్టాత్మకంగా లాంఛ్‌ చేసిన 'సైబర్‌ట్రక్‌' త్వరలోనే దుబాయ్‌ పోలీసుల వాహన శ్రేణిలో చేరనుంది. ఈ ఎలక్ర్టిక్‌ పికప్‌ ట్రక్‌ 2020లో తమ అధికారిక వాహన శ్రేణిలో చేరబోతోందని తెలుపుతూ దానిపై తమ లోగోలను ముద్రించిన ఫోటోను ట్విటర్‌‌లో దుబాయ్ పోలీసులు పోస్ట్‌ చేశారు. దుబాయ్‌ పోలీసుల వాహన శ్రేణిలో చేరిన ఘనతను సాధించిన తొలి టెస్లా కారుగా 'సైబర్‌ట్రక్' రికార్డు సృష్టించింది.

ఇప్పటికే దుబాయ్‌ పోలీసులు తమ వాహన శ్రేణిలో.. బుగాట్టి వెర్యాన్‌, ఆస్టన్‌ మార్టిన్‌ వన్‌-77, బీఎండబ్ల్యూ ఐ8, ఫెరారి లాఫెరారి, లాంబోర్గిని అవెంటడార్‌, లైకాన్‌ హైపర్‌స్పోర్ట్‌ వంటి కార్లను ఉపయోగిస్తున్నారు. తాజాగా వీరి వాహన శ్రేణిలో టెస్లా కంపెనీకి చెందిన 'సైబర్‌ట్రక్' కూడా వచ్చి చేరనుంది.

అత్యంత దృఢమైన ట్రక్ అన్నారు, కానీ...

గత గురువారమే టెస్లా తన 'సైబర్‌ట్రక్‌'ను అట్టహాసంగా లాంఛ్ చేసింది. ఈ కార్యక్రమంలో ఆ కంపెనీ సీఈవో ఎలాన్ మస్క్ దానిని ఆవిష్కరిస్తూ.. తమ కొత్త వాహనం చాలా గట్టిదని వ్యాఖ్యానిస్తూ.. కావాలంటే మీ సమక్షంలోనే ఈ ట్రక్ దృఢత్వాన్ని పరీక్షిస్తామంటూ సవాల్ విసిరారు. దీంతో ఆ కార్యక్రమానికి విచ్చేసిన అహూతులు ఆశ్చర్యపోయారు. అనంతరం ఆ ట్రక్‌ను డిజైన్ చేసిన డిజైనర్ స్వయంగా వేదికపై ఆ ట్రక్ దృఢత్వాన్ని పరీక్షించారు.

తొలుత గొడ్డలితో ట్రాక్ డోర్‌పై బలంగా మోదగా ఆ ట్రక్ డోర్ కించిత్ కూడా డ్యామేజ్ కాలేదు.దీంతో అక్కడున్నవారందరూ చప్పట్లు కొట్టారు. దాని అద్దం కూడా చాలా గట్టిదని, ఎంత కొట్టిన పగలదని మళ్లీ ఎలాన్ మస్క్ ప్రకటించగా.. సదరు డిజైనర్ ఓ మెటల్ బాల్ తీసుకుని అద్దంపైకి విసిరారు. అద్దమైతే భళ్లున బద్దలుకాలేదు కానీ, క్రాక్ ఇచ్చింది. దీంతో సీఈవో ఎలాన్ మస్క్ విచారం వ్యక్తం చేయాల్సి వచ్చింది.

నాలుగు రోజుల్లోనే 1.87 లక్షల ఆర్డర్లు...

దృఢత్వం విషయంలో కాస్తంత నిరాశపరిచినా టెస్లా కంపెనీ విడుదల చేసిన 'సైబర్‌ట్రక్'కు ఆదరణ ఏమాత్రం తగ్గలేదు. ఈనెల 22న టెస్లా సైబర్‌ట్రక్‌ను లాంఛ్‌ చేయగా కేవలం నాలుగు రోజుల్లోనే 1.87 లక్షల ఆర్డర్లు వచ్చాయి. 2020లో టెస్లా ఉత్పత్తిని ప్రారంభించనున్న ఈ ఎలక్ర్టిక్‌ పికప్‌ ట్రక్‌.. సింగిల్ మోటార్, డ్యూయల్ మోటార్, ట్రై మోటార్ అంటూ మూడు వేరియంట్లలో లభిస్తుంది.

సైబర్‌ ట్రక్‌ సింగిల్‌ మోటార్‌ ధర రూ.30 లక్షలు కాగా, డ్యూయల్‌, ట్రై వేరియంట్లు వరుసగా రూ37.45 లక్షలు, రూ 52.42 లక్షలు. సెల్ప్‌ డ్రైవింగ్‌ ఆప్షన్‌ (డ్రైవర్ లేకుండా కారు దానంతట అదే పరుగులు పెడుతుంది) కోసం అదనంగా రూ.5 లక్షలు వెచ్చించాల్సి ఉంటుంది. ఇక 42 శాతం కస్టమర్లు డ్యూయల్ మోటార్ ట్రక్‌ను‌, 41 శాతం ట్రై మోటార్ ట్రక్‌ను బుక్ చేసుకోగా‌, 17 శాతం మంది సింగిల్‌ మోటార్‌ వేరియంట్ ట్రక్ బుక్ చేసుకున్నట్లు టెస్లా ఒక ప్రకటనలో తెలిపింది.