13 వేల మంది ఉద్యోగులు రోడ్డు మీదకు.. టెలికం చరిత్రలో అతి పెద్ద లేఆప్స్ ప్రకటించిన వెరిజోన్

అమెరికాలోని ప్రముఖ వైర్‌లెస్ సేవల సంస్థ వెరిజోన్..తన చరిత్రలోనే అతిపెద్ద ఉద్యోగాల కోత చర్యను ప్రారంభించాలని నిర్ణయించింది. కార్యకలాపాలను సరళీకరించడం, ఖర్చులను తగ్గించడం, అలాగే కంపెనీని తిరిగి పోటీతత్వ దిశగా నడపడం లక్ష్యంగా ఈ భారీ నిర్ణయం తీసుకుంది. కంపెనీ చీఫ్ ఎగ్జిక్యూటివ్ ఆఫీసర్ డాన్ షుల్మాన్ ఉద్యోగులకు పంపిన అంతర్గత ఇమెయిల్‌ ద్వారా ఈ విషయం వెలుగులోకి వచ్చింది.

ది వాల్ స్ట్రీట్ జర్నల్ ప్రచురించిన కథనం ప్రకారం.. వెరిజోన్ 13 వేల మందికి పైగా ఉద్యోగులను తొలగించబోతోందని స్పష్టం చేసింది. ఇది US‌లోని అతిపెద్ద వైర్‌లెస్ క్యారియర్‌లో ఇప్పటి వరకు చేపట్టిన అత్యంత భారీ ఉద్యోగాల కోత చర్యగా ఇది నమోదవుతోంది. షుల్మాన్ తన సందేశంలో వెరిజోన్ యొక్క ప్రస్తుత వ్యయ నిర్మాణం కంపెనీకి కస్టమర్ సేవలను మెరుగుపరచడంలో అడ్డంకిగా మారుతున్నదని పేర్కొన్నారు.

సంక్లిష్టమైన కార్యకలాపాలు, కస్టమర్లకు చేరడంలో ఏర్పడుతున్న ఘర్షణలు సంస్థ పనితీరును దెబ్బతీస్తున్నాయని ఆయన పేర్కొన్నారు. అందుకే కార్యకలాపాలను సరళీకరించడం, బాధ్యతలను పునర్వ్యవస్థీకరించడం, మార్కెట్ అవసరాలకు అనుగుణంగా కంపెనీ సంస్కృతిని మార్చడం అత్యవసరమైందని ఆయన తెలిపారు. వెరిజోన్ సమర్థవంతంగా పోటీలో నిలవాలంటే ప్రతి విభాగం కస్టమర్ల సంతృప్తిని కేంద్ర బిందువుగా తీసుకొని పనిచేయాల్సిన అవసరం ఉందని ఆయన స్పష్టం చేశారు.

ఈ తొలగింపులు ప్రధానంగా నాన్-యూనియన్ ఉద్యోగులను ప్రభావితం చేస్తాయని అంచనా. ఫిబ్రవరి నాటికి వెరిజోన్‌లో దాదాపు 1 లక్ష మంది ఉద్యోగులు ఉన్నప్పటికీ, వారిలో చాలా మంది యూనియన్‌లలో సభ్యులే కారు. మరోవైపు, తొలగింపుల పూర్తి ప్రభావం అమెరికా ఉద్యోగులకు తక్షణమే తెలుస్తుంది. పింక్ స్లిప్‌లు గురువారమే US ఉద్యోగులకు పంపారు. అయితే, విదేశీ ఉద్యోగుల విషయాన్ని రాబోయే వారాల్లో కంపెనీ వెల్లడించనుంది.

రిటైల్ కార్యకలాపాల పునర్వ్యవస్థీకరణలో భాగంగా వెరిజోన్ 179 కార్పొరేట్ యాజమాన్యంలోని దుకాణాలను ఫ్రాంచైజీలకు మార్చాలని నిర్ణయించింది. ఒక దుకాణం పూర్తిగా మూసివేయబడనుంది. ఈ మార్పుల అనంతరం కూడా కంపెనీ 1,300 కార్పొరేట్ స్టోర్లు, 6 వేల కంటే ఎక్కువ ఫ్రాంచైజీ స్టోర్లను నిర్వహించనుంది. ప్రారంభంలో Verizon 15 వేల ఉద్యోగాలను తగ్గించాలని యోచించినప్పటికీ, తాజాగా కంపెనీ ఈ సంఖ్యను 13 వేలకు కు పరిమితం చేసినట్లు సమాచారం. మార్కెట్ ఒత్తిడి, కేబుల్ ఆపరేటర్ల ప్రవేశం, చౌకైన ప్లాన్‌లను అందిస్తున్న ప్రత్యర్థుల పోటీతో వెరిజోన్ కస్టమర్ వృద్ధిలో తగ్గుదలని ఎదుర్కొంటోంది.

ఉద్యోగులకు AI వల్ల పనులు పోయాయని వచ్చిన ఊహాగానాలను కంపెనీ కొట్టిపారేసింది. అయితే, షుల్మాన్ తొలగింపుల ప్రభావాన్ని తగ్గించేందుకు ఉద్యోగుల నైపుణ్య అభివృద్ధి కోసం 20 మిలియన్ డాలర్ల కెరీర్ ట్రాన్సిషన్ ఫండ్‌ను ప్రకటించారు. AI యుగంలో అవసరమైన నైపుణ్యాలకు ఉద్యోగులను సిద్ధం చేయడం లక్ష్యంగా ఈ నిధిని వినియోగించనున్నట్లు తెలిపారు.