రీజిన్ బయోసైన్సెస్‌తో జత, కరోనా డ్రగ్ పేటెంట్ కోసం టెక్ మహీంద్రా!

కరోనా మహమ్మారిని నియంత్రించే డ్రగ్ మాలిక్యూల్ కోసం రీజిన్ బయోసైన్సెస్‌తో కలిసి ఐటీ దిగ్గజం టెక్ మహీంద్రా పేటెంట్ కోసం దాఖలు చేయనుంది. డ్రగ్ పేటెంట్‌కు భాగస్వామితో దరఖాస్తు చేశామని, తదుపరి ప్రయోగాలను పూర్తి చేస్తామని టెక్ మహీంద్రా గ్లోబల్ హెడ్ (మేకర్స్ ల్యాబ్) తెలిపారు. టెక్ మహీంద్రా పరిశోధన, అభివృద్ధి విభాగంగా మేకర్స్ ల్యాబ్ ఉంది.

కరోనా వైరస్‌పై దాడి చేసే సత్తా కలిగిన మాలిక్యూల్‌ని కనుగొన్నామని, పేటెంట్ ప్రక్రియ పూర్తి అయ్యేంత వరకు మాలిక్యూల్ పేరును బయటకు వెల్లడించలేమన్నారు. ప్రస్తుతం బెంగళూరులో దీనికి సంబంధించి పరిశోధన ప్రక్రియలో టెక్ మహీంద్రా, రీజిన్ బయోసైన్సెస్ ఉన్నాయి.

ఇదిలా ఉండగా, కరోనాపై పోరుకు తనవంతు సాయంగా ముందుకు వచ్చింది ఎస్బీఐ. మహమ్మారిని ఎదుర్కొనేందుకు రూ.71 కోట్లతో సాయం ప్రకటించింది. కరోనా బాధితుల కోసం తాత్కాలిక ఆసుపత్రుల ఏర్పాటు, వైద్య పరికరాలు, ఆక్సిజన్ సరఫరా కోసం ఈ నిధులు ఖర్చు చేయనుంది. కరోనా ఎక్కువగా ఉన్న రాష్ట్రాల్లో రూ.30 కోట్లతో వెయ్యి పడకల తాత్కాలిక ఆసుపత్రులు, 250 ఐసీయూ బెడ్స్, 1000 బెడ్స్ ఐసోలేషన్ కేంద్రాలను ఏర్పాటు చేయడం కోసం అధికారులతో మాట్లాడుతోంది.