కొంపలు ముంచిన H-1B వీసా కొత్త ఫీజులు.. టాప్ కంపెనీల్లో భారీగా లేఆప్స్, ఉద్యోగులు విలవిల

Tech Layoffs 2025: అమెరికన్ టెక్ పరిశ్రమకు 2025లో మరోసారి గట్టి దెబ్బ తగిలింది. ఇప్పటికే కృత్రిమ మేధస్సు (AI) ఆధారిత సాంకేతికతల విస్తరణతో ఉద్యోగాల తొలగింపులు పెరుగుతున్న వేళ, అమెరికా అధ్యక్షుడు తీసుకున్న తాజా నిర్ణయం వలస కార్మికులకు పెద్ద అడ్డంకిగా మారింది. కొత్త ఆర్డర్ ప్రకారం H-1B వీసా ఫీజులు 50 శాతం పెరిగి 1,00,000 డాలర్లకు చేరాయి. ఇది ఇప్పటివరకు ఉన్న స్థాయికి రెండింతలు ఎక్కువ. ఈ చర్య ముఖ్యంగా అమెజాన్, ఆపిల్, మైక్రోసాఫ్ట్, మెటా వంటి టెక్ దిగ్గజాలు విదేశీ కార్మికులను H-1B వీసాల ద్వారా నియమించుకోవడాన్ని తగ్గించడమే లక్ష్యంగా ఉందని నిపుణులు చెబుతున్నారు.

భారతీయ ఐటీ నిపుణులు ఈ పరిణామాలతో తీవ్రంగా ప్రభావితమవుతున్నారు. ఎందుకంటే ఒకవైపు అమెరికాలో టెక్ కంపెనీలు ప్రతీ నెలా వేల సంఖ్యలో ఉద్యోగాలను తగ్గిస్తుండగా, మరోవైపు కొత్త H-1B వీసా ఫీజుల కారణంగా అమెరికాలో ఉద్యోగం సంపాదించడం మరింత కష్టమవుతోంది. గమనించదగ్గ విషయం ఏమిటంటే.. ఈ కొత్త నిబంధనలు ఇప్పటికే H-1B వీసా కలిగిన వారికి లేదా రిన్యూవల్ దరఖాస్తులకు వర్తించవు. అయితే అమెరికాలో కొత్తగా ఉద్యోగానికి దరఖాస్తు చేసే వారికి మాత్రం ఇది పెద్ద ఆర్థిక భారంగా మారుతోంది.

ఇక టెక్ కంపెనీల ఉద్యోగ కోతలు చూస్తే, పరిస్థితి ఎంత క్లిష్టంగా ఉందో అర్థమవుతుంది. గూగుల్ ఇప్పటికే 200 మందికి పైగా కాంట్రాక్ట్ కార్మికులను తొలగించింది. వీరిని ప్రధానంగా AI మోడళ్ల శిక్షణ కోసం ఉపయోగించారని, ఇప్పుడు ఆ మోడళ్ల పురోగతి కారణంగా వీరి అవసరం తగ్గిపోయిందని తెలుస్తోంది. ఒరాకిల్ తన అమెరికన్ సిబ్బందిలో వందల మందిని తొలగించగా, సియాటెల్‌లో మాత్రమే 101 మందిని ఉద్యోగాల నుండి తొలగించింది. భారత్, కెనడా, యూరప్ ప్రాంతాల్లో కూడా కోతలు జరిగాయి.

సేల్స్‌ఫోర్స్ లాభదాయక ఫలితాలు సాధించినప్పటికీ.. AI ఆధారిత ఏజెంట్ల వాడకం పెరగడంతో మరో 4 వేల ఉద్యోగాలను తగ్గించింది. కస్టమర్ సపోర్ట్ విభాగంలో మాత్రమే దాదాపు సగం మంది సిబ్బంది తగ్గిపోయారు. అంతే కాకుండా, చిప్ తయారీదారు ఇంటెల్ 5,500 మందికి పైగా ఉద్యోగులను తొలగించి, 2025 చివరి నాటికి తన గ్లోబల్ సిబ్బందిని 25 వేలకి తగ్గించే ప్రణాళికలో ఉంది.

ఇలాంటి పరిస్థితుల్లో కొత్త H-1B వీసా ఫీజు ప్రభావం మరింత లోతుగా ఉంటుంది. ఒక టెక్ కంపెనీకి అమెరికాలో సాఫ్ట్‌వేర్ ఇంజనీర్ల అవసరం ఉంటే.. ఇప్పుడు వీసా స్పాన్సర్ చేయడం ఖర్చు పరంగా భారం అవుతుంది. కాబట్టి అమెరికన్ సంస్థలు విదేశాలలో, ముఖ్యంగా భారతదేశంలో, కొత్త కార్యాలయాలను విస్తరించడం లేదా రిమోట్ ఉద్యోగులను నియమించడం మరింత ఆర్థిక ప్రయోజనకరంగా భావించవచ్చు. దీని వలన ఆఫ్‌షోరింగ్ ధోరణి మరింత వేగం తీసుకోనుంది.

దీర్ఘకాలంలో ఈ పరిణామాలు అమెరికా, భారతీయ టెక్ పరిశ్రమలపై గణనీయమైన ప్రభావం చూపుతాయి. అమెరికన్ కార్మికులు తాత్కాలికంగా రక్షణ పొందినా, కంపెనీలు ఖర్చులను తగ్గించుకోవడానికి US వెలుపల అవకాశాలను అన్వేషించవచ్చు. అదే సమయంలో భారతీయ ఐటీ సంస్థలకు అమెరికన్ కంపెనీల నుండి మరిన్ని ప్రాజెక్టులు వచ్చే అవకాశముంది. అయితే అమెరికాలో పని చేయాలని కలలు కంటున్న వేలాది మంది భారతీయ యువ ఇంజనీర్లకు ఈ నిర్ణయం అమెరికన్ కలను మరింత దూరం చేస్తోంది.