IT News: దారుణ పరిస్థితుల్లో భారత ఐటీ కంపెనీలు.. చరిత్రలో ఎన్నడూ చూడని రీతిలో..

IT News: భారత ఆర్థిక వృద్ధిలో అగ్రభాగాన్ని కలిగి ఉన్న సేవల రంగం ప్రస్తుతం అతలాకుతలం అవుతోంది. ప్రపంచ రాజకీయ పరిణామాలతో పాటు ఆర్థిక అనిశ్చితులు తోడుకావటమే దీనికి ప్రధాన కారణాలుగా ఉన్నాయి.

ఈ క్రమంలో దాదాపు దేశంలోని అన్ని పెద్ద టెక్ కంపెనీలు సెప్టెంబర్ మాసంలో నిరాశాజనకమైన ఆర్థిక ఫలితాలను వెలువరించాయి. వాటిని నిశితంగా పరిశీలిస్తే టెక్ కంపెనీలు వ్యాపారం, హెడ్‌కౌంట్, ఆదాయంలో అధిక అస్థిరతను ఎదుర్కొంటున్నట్లు కనిపిస్తోందని నిపుణులు చెబుతున్నారు. 245 బిలియన్ డాలర్లు విలువైన భారత టెక్ సేవల పరిశ్రమలో కొన్ని ప్రముఖ కంపెనీలు దాని చరిత్రలో అత్యంత నెమ్మదిగా వృద్ధి పథాన్ని నమోదు చేస్తాయని అంచనా వేయబడింది.

దేశంలో రెండవ అతిపెద్ద ఐటీ కంపెనీగా ఉన్న ఇన్ఫోసిస్ 2024 ఆర్థిక సంవత్సరంలో 1-2.5 శాతం మాత్రమే వృద్ధిని నమోదు చేస్తుందని BNP Paribas ముందుగానే అంచనా వేసింది. ఇది కంపెనీ చరిత్రలోనే బలహీనమైన వృద్ధిగా చెప్పుకోవచ్చు. అలాగే నాలుగవ పెద్ద ఐటీ కంపెనీ విప్రో ప్రస్తుత ఆర్థిక సంవత్సరంలో వృద్ధి కొలమానాలు 1999 ఆర్థిక సంవత్సరం వృద్ధి రేటుతో సమానంగా ఉన్నాయి. అలాగే టీసీఎస్, హెచ్సీఎల్ టెక్ కరోనా తర్వాత నిదానమైన వృద్ధిని నమోదు చేస్తున్నాయి.

ప్రస్తుత వ్యాపార అనిశ్చితుల్లో అనేక విదేశీ టెక్ కస్టమర్లు తన కాంట్రాక్టులను, సర్వీస్ ప్లాన్లను హోల్డ్ లో ఉంచారు. ఇవి ఖర్చులను తగ్గించుకోవటంలో భాగంగా తీసుకోబడిన నిర్ణయాలు. ప్రపంచ వ్యాప్తంగా కొనసాగుతున్న మందగమనం ఈ పరిస్థితులకు కారణంగా నిపుణులు చెబుతున్నారు. ప్రస్తుతం ఆదాయంలో 90-95 శాతం విదేశీ మార్కెట్ల నుంచి పొందుతున్నందున భారత సేవల రంగంలోని కంపెనీలు తీవ్రంగా దెబ్బతింటున్నాయి.

ఈ పరిస్థితిలో కొన్ని కంపెనీలు 2024లో తమ చెత్త వృద్ధి కొలమానాలను నమోదు చేయవచ్చని ఎవరెస్ట్ గ్రూప్ సీఈవో బెండర్-శామ్యూల్ అభిప్రాయపడ్డారు. 2024 మెుదటి ఆరు నెలలు గడ్డు కాలంగా పేర్కొన్నారు. ఏడాది డిసెంబర్ త్రైమాసికంలో అమ్మకాలు, లాభాల క్షీణత, రిక్రూట్మెంట్స్ లలో టెక్ కంపెనీలు కోలుకుంటాయని ప్రస్తుత అంచనాలు చెబుతున్నాయి. అయితే రోజురోజుకూ దిగజారుతున్న హమాస్-ఇజ్రాయెల్ యుద్ధ పరిస్థితులు వ్యాపారాలపై అనేక ప్రశ్నలు లేవనెత్తుతున్నాయి. రానున్న రెండుమూడు త్రైమాసికాలు కూడా నెమ్మదిగానే కొనసాగే అవకాశం ఉందని చెప్పుకోవచ్చు.