Tech Hiring: ఐటీ ఫ్రెషర్లకు 2024లో ఒక గుడ్‌న్యూస్.. ఒక బ్యాడ్‌న్యూస్..!!

IT Hirings: కొత్త ఏడాదిలో ఉద్యోగాలు వస్తాయనే ఆశలు చాలా మందిలో చిగురిస్తున్నాయి. ప్రధానంగా ఇంజనీరింగ్, ఐటీ గ్రాడ్యుయేట్లు చాలా కాలం నుంచి ఉద్యోగ అవకాశాల కోసం వేచి చూస్తున్నారు.

టెక్ స్టాఫింగ్ & సొల్యూషన్స్ ప్రొవైడర్ సంస్థ టీమ్ లీజ్ డిజిటల్ కొత్త ఏడాది ఉపాధి అవకాశాలపై తన నివేదికను వెలువరించింది. కొత్త ఏడాదిలో 1.55 లక్షల మంది ఫ్రెషర్లను ఐటీ సెక్టార్ నియమించుకునే అవకాశం ఉందని వెల్లడించింది. ఈ నివేదిక 2024 సంవత్సరంలో తాజా IT/ఇంజనీరింగ్ గ్రాడ్యుయేట్ల రిక్రూట్‌మెంట్ ఔట్‌లుక్ ఆధారంగా రూపొందించబడింది. అయితే గత ఏడాది కంటే ఫ్రెషర్ల నియామకాలు 2024లో తక్కువగా ఉంటాయని నివేదిక పేర్కొంది.

ప్రస్తుతం దేశంలో దాదాపు 15 లక్షల మంది ఇంజనీరింగ్ గ్రాడ్యుయేట్లు ఐటీ, టెక్ రంగంలో ఉద్యోగ అవకాశాల కోసం ఎదురుచూస్తున్నారు. మార్కెట్లో నియామకాలు నిలిచిపోవటం, ఇంటెన్సిఫైడ్ స్కిల్స్ ఎవాల్యుయేషన్ మెకానిజమ్‌లు వారికి ఇబ్బందులు కలిగిస్తున్నాయి. వీరిలో కేవలం 45 శాతం మంది అభ్యర్థులు మాత్రమే అవసరమైన నైపుణ్యాల అంచనాలను అందుకోగలరని నివేదిక పేర్కొంది. ఇది నైపుణ్యాల డిమాండ్, సరఫరా మధ్య ఉన్న భారీ అంతరాన్ని ప్రతిబింబిస్తుంది. ఈ పరిస్థితిలో ఫ్రెషర్ల రిక్రూట్‌మెంట్ రేటు చాలా తక్కువగా ఉంటుందని అంచనాలు చెబుతున్నాయి.

ఉద్యోగ వాతావరణంలో పెద్ద మార్పు వస్తోంది. BFSI, కమ్యూనికేషన్, మీడియా & టెక్నాలజీ, రిటైల్ & వినియోగదారు వ్యాపారం, లైఫ్ సైన్సెస్ & హెల్త్‌కేర్, ఇంజనీరింగ్ పరిశోధన & అభివృద్ధి వంటి నాన్-టెక్ రంగాల్లో ఎంట్రీ-లెవల్ ఉద్యోగాలు అందుబాటులోకి వస్తున్నాయి. తాజా వేతనాలు రూ.3-5 లక్షల మధ్య ఉండనున్నాయి.

ఐటీ సెక్టార్‌లో హైరింగ్ ల్యాండ్‌స్కేప్‌లో వచ్చిన మార్పులు ప్రస్తుత గ్రాడ్యుయేట్లకు కొత్త కష్టాలను కలిగిస్తోంది. ప్రోగ్రామింగ్ లాంగ్వేజ్‌లు, సాఫ్ట్‌వేర్ డెవలప్‌మెంట్ మెథడాలజీలు, క్లౌడ్ కంప్యూటింగ్, డేటా అనలిటిక్స్‌లో సాంకేతిక నైపుణ్యంతో కూడిన కమ్యూనికేషన్, సమస్య పరిష్కారం, టీమ్‌వర్క్, ఎమోషనల్ ఇంటెలిజెన్స్, హార్డ్ స్కిల్స్ వంటి సాఫ్ట్ స్కిల్స్ కలయిక కోసం కంపెనీలు వెతుకుతున్నట్లు నివేదిక హైలైట్ చేసింది. పరిశ్రమలు, విద్యాసంస్థలు, ప్రభుత్వాల సంయుక్త కృషి మరింత సమగ్రమైన పాఠ్యాంశాలను రూపొందించాల్సిన అవసరం ఉంది.