AI మీద యుద్ధానికి దిగిన టాటా సన్స్ ఛైర్మెన్.. టీసీఎస్ డ్రైవర్ సీటులోకి.. ఉద్యోగుల్లో మొదలైన అలజడి..

టాటా సన్స్ (Tata Sons) ఛైర్మన్ ఎన్. చంద్రశేఖరన్ ఏఐ మీద యుద్ధానికి దిగారు. దాంతో తాడో పేడో తేల్చుకునేందుకు రెడీ అయ్యారు. టాటా కన్సల్టెన్సీ సర్వీసెస్ (TCS) భవిష్యత్తును మరింత దగ్గరగా పర్యవేక్షిస్తున్న చంద్రశేఖరన్ కృత్రిమ మేధస్సు (AI) మార్పుల వైపు కంపెనీని నడిపించేందుకు ముందుకు వస్తున్నారు. ప్రపంచవ్యాప్తంగా టెక్నాలజీ రంగం శరవేగంగా మారుతున్న సమయంలో.. సంప్రదాయ IT సేవల వ్యాపార నమూనాలు తీవ్ర ఒత్తిడిలో పడుతున్నాయి. ఈ నేపథ్యంలోనే TCS వంటి దిగ్గజ సంస్థలు తమ వ్యూహాలను మార్చుకోక తప్పని పరిస్థితి ఏర్పడింది.

టాటా గ్రూప్‌కు TCS అత్యంత కీలక సంస్థగా ఉంది. ఇది కేవలం ఒక IT కంపెనీ మాత్రమే కాదు, టాటా గ్రూప్‌కు ప్రధాన నగదు ఆదాయ వనరు (cash generator) కూడా. గత కొన్ని సంవత్సరాలుగా Tata Sons కు వచ్చే డివిడెండ్లలో భారీ భాగం TCS నుంచే వస్తోంది. అందుకే TCS పనితీరు, దీని భవిష్యత్తు దిశపై చంద్రశేఖరన్ ప్రత్యేక శ్రద్ధ పెట్టడం సహజమే. AI వంటి విప్లవాత్మక టెక్నాలజీ సంప్రదాయ IT సేవల అవసరాన్ని తగ్గించవచ్చనే ఆందోళనల మధ్య.. ఆయన ప్రత్యక్షంగా TCS వ్యూహాలపై పట్టు సాధించడం ప్రారంభించారు.

AI రంగంలో TCS‌ను టాటా గ్రూప్‌లోనే కాకుండా, ప్రపంచ స్థాయిలో కూడా ఒక ప్రధాన ప్లేయర్ గా నిలపడంపై Chandrasekaran తాజా దృష్టి ఉంది. ఇందుకోసం కంపెనీ లోపల మార్పులు, వ్యూహాత్మక పునర్వ్యవస్థీకరణలు అవసరమని ఆయన భావిస్తున్నారు. AI సామర్థ్యాన్ని వేగంగా పెంచేందుకు, అవసరమైతే AI-ఫోకస్ స్టార్టప్‌లను కొనుగోలు చేయడం.. కొత్త టెక్నాలజీలను సమీకరించడం వంటి చర్యలకు కూడా ఆయన మద్దతు ఇస్తున్నారు.

ఇటీవల జరిగిన ఒక పెద్ద సమావేశంలో చంద్రశేఖరన్ TCS ఉద్యోగులతో నేరుగా మాట్లాడారు.AI ప్రభావానికి భయపడకుండా, దానిని అవకాశంగా మార్చుకోవాలని ఆ సమావేశంలో తెలిపారు. ఉద్యోగులు నిరంతరం కొత్త నైపుణ్యాలను నేర్చుకోవాలి, ముఖ్యంగా AI, డేటా అనలిటిక్స్, ఆటోమేషన్ వంటి రంగాల్లో తమ స్కిల్స్‌ను అప్డేట్ చేసుకోవాలని ఆయన సూచించారు. భవిష్యత్తులో ఉద్యోగ భద్రత కూడా నైపుణ్యాలపై ఆధారపడి ఉంటుందని ఆయన మాటల్లో స్పష్టత కనిపించింది.

Tata Sons గ్రూప్ TCS మీద ఎంతగా ఆధారపడి ఉందో గణాంకాలు స్పష్టం చేస్తాయి. 2024 నాటికి Tata Sons.. TCSలో సుమారు 71.74 శాతం వాటాను కలిగి ఉంది. అంతేకాకుండా Tata Sons ఆదాయంలో 80 శాతం కంటే ఎక్కువ భాగం డివిడెండ్ల రూపంలో TCS నుంచే వచ్చింది. ఈ నేపథ్యంలోనే TCS వ్యూహాత్మకంగా విజయవంతం కావడం టాటా గ్రూప్ మొత్తానికి అత్యంత కీలకం.

అయితే, AI మార్పుల నేపథ్యంలో సవాళ్లు కూడా తీవ్రంగానే ఉన్నాయి. ప్రపంచవ్యాప్తంగా Anthropic యొక్క Claude Cowork వంటి ఆధునిక AI టూల్స్ సంప్రదాయ IT సేవల అవసరాన్ని తగ్గించగలవని మార్కెట్ భావిస్తోంది. ఈ ఆందోళనల కారణంగా ఇటీవల భారత టెక్ షేర్లలో భారీ అమ్మకాలు జరిగాయి. Nifty IT సూచీ సుమారు 8 శాతం పడిపోయి, దాదాపు రూ. 2 లక్షల కోట్ల మార్కెట్ విలువ కోల్పోయింది.. ఈ ప్రభావం TCS షేర్లపైనా పడింది.

ఈ సవాళ్లను ఎదుర్కొనేందుకు TCS ఇప్పటికే కొన్ని కీలక నిర్ణయాలు తీసుకుంది. Salesforce కన్సల్టింగ్ సంస్థ Coastal Cloud ను 700 మిలియన్ డాలర్లకు కొనుగోలు చేయడం, US-ఆధారిత ListEngage ను అక్వైర్ చేయడం.. అలాగే 2.1 బిలియన్ డాలర్ల డేటా సెంటర్ జాయింట్ వెంచర్ ఏర్పాటు చేయడం వంటి చర్యలు దీనికి ఉదాహరణలు. ఇవన్నీ AI, డిజిటల్ సామర్థ్యాలను పెంచే దిశగా వేసిన అడుగులేనని చెప్పవచ్చు.

అయితే విశ్లేషకులు చెబుతున్నట్టు.. కేవలం IT సేవలకు AI అనే ట్యాగ్ పెట్టడం సరిపోదు. అసలైన విజయం కోసం కొత్త ఆలోచనలు, కొత్త ఆపరేటింగ్ మోడల్స్, వేగంగా అమలు చేసే సామర్థ్యం అవసరం. చంద్రశేఖరన్ నాయకత్వంలో TCS ఈ మార్పులను ఎంత సమర్థంగా అమలు చేస్తుందోనే దానిపై కంపెనీ భవిష్యత్తును నిర్ణయించనుంది.