ఐటీ రంగంలో ప్రకంపనలు: 20,000 మంది ఉద్యోగుల తొలగింపు తర్వాత TCS సంచలన నిర్ణయం!

భారతీయ ఐటీ రంగంలో అగ్రగామిగా ఉన్న టాటా కన్సల్టెన్సీ సర్వీసెస్ (TCS) భవిష్యత్తుపై ఒక మైండ్ బ్లాయింగ్ అప్‌డేట్ ఇచ్చింది. రాబోయే మూడు సంవత్సరాలలో కంపెనీలో ఎంతమంది హ్యూమన్ ఉద్యోగులు ఉంటారో, అంతమందికి సమానంగా ఆర్టిఫిషియల్ ఇంటెలిజెన్స్ (AI) ఏజెంట్లను రంగంలోకి దించబోతున్నట్లు టాటా సన్స్ చైర్మన్ ఎన్ చంద్రశేఖరన్ ప్రకటించారు.

కంపెనీ 31వ వార్షిక సాధారణ సర్వసభ్య సమావేశంలో (AGM) షేర్ హోల్డర్లను ఉద్దేశించి ఆయన ఈ విషయాలను వెల్లడించారు. ఇప్పటికే గత కొన్ని నెలలుగా టీసీయస్ లేఆఫ్స్ (TCS layoffs) , ఉద్యోగుల సంఖ్య తగ్గడంపై మార్కెట్లో జోరుగా చర్చ సాగుతున్న తరుణంలో ఈ వ్యాఖ్యలు ప్రాధాన్యత సంతరించుకున్నాయి. అసలు టీసీఎస్ ఏం చేయబోతోంది? దీనివల్ల ఉద్యోగాలకు ముప్పు ఉందా? వాడుక భాషలో క్లియర్‌గా తెలుసుకుందాం.

20,000 మంది ఉద్యోగులు తగ్గడానికి కారణం ఇదే!

గత ఏడాది జూలైలో టీసీఎస్ దాదాపు 12,000 మంది ఉద్యోగులను తొలగించినట్లు వార్తలు వచ్చాయి. ఆ తర్వాత నుంచి ఇప్పటివరకు కంపెనీలో మొత్తం హెడ్‌కౌంట్ (ఉద్యోగుల సంఖ్య) దాదాపు 20,000 వరకు తగ్గిందని నివేదికలు చెబుతున్నాయి.

అయితే ఈ టీసీయస్ లేఆఫ్స్ (TCS layoffs) లేదా ఉద్యోగుల తగ్గింపుపై కంపెనీ యాజమాన్యం క్లారిటీ ఇచ్చింది. ఇది కేవలం కంపెనీయే బలవంతంగా తీసేయడం వల్ల జరగలేదని, ఉద్యోగులు స్వచ్ఛందంగా కంపెనీని వీడటం (Voluntary Attrition) , ఇతర కారణాల వల్ల ఈ సంఖ్య తగ్గిందని స్పష్టం చేసింది. ప్రస్తుతానికి భారీగా లేఆఫ్స్ చేసే ప్లాన్ లేకపోయినా, కొత్తగా ఉద్యోగులను తీసుకునే ప్రక్రియను (Hiring) మాత్రం కొంచెం స్లో చేస్తామని కంపెనీ తెలిపింది.

మనుషులతో సమానంగా డిజిటల్ వర్కర్లు!

"టీసీఎస్‌లో ఫిజికల్ ఉద్యోగులు ఎంతమంది ఉంటారో, అంతే సంఖ్యలో ఏఐ ఏజెంట్లు లేదా డిజిటల్ వర్కర్లు ఉండే రోజు చాలా దగ్గరలోనే ఉంది" అని చంద్రశేఖరన్ అంచనా వేశారు. రాబోయే మూడేళ్లలో ఈ టార్గెట్‌ను అందుకోబోతున్నట్లు చెప్పారు.

కంపెనీ తన అంతర్గత పనులతో పాటు, క్లయింట్లకు ఇచ్చే సొల్యూషన్స్ లో కూడా ఆర్టిఫిషియల్ ఇంటెలిజెన్స్‌ను విపరీతంగా వాడుతోంది. గడిచిన క్వార్టర్లలో కంపెనీ యొక్క ఏఐ ఆదాయం త్రైమాసిక ప్రాతిపదికన 22 శాతానికి పైగా వృద్ధి చెందింది. 2026 ఆర్థిక సంవత్సరం చివరి త్రైమాసికంలో ఏఐ ద్వారా వచ్చే వార్షిక ఆదాయం ఏకంగా 2.5 బిలియన్ డాలర్లకు చేరిందంటే ఏఐ హవా ఎలా ఉందో అర్థం చేసుకోవచ్చు.

ఉద్యోగాలకు ముప్పా? లేక అవకాశమా?

సాఫ్ట్‌వేర్ రంగంలో ఏఐ వల్ల ఉద్యోగాలు పోతాయనే భయాలు అందరిలోనూ ఉన్నాయి. కానీ చంద్రశేఖరన్ దీనిపై ఉద్యోగులకు భరోసా ఇచ్చే ప్రయత్నం చేశారు. ఏఐ అనేది ఐటీ రంగానికి ఒక ముప్పు కాదు, ఇదొక అద్భుతమైన అవకాశం అని ఆయన అభిప్రాయపడ్డారు. ప్రపంచవ్యాప్తంగా దాదాపు ముప్పావు వంతు కంపెనీలు ఏఐ కోసమే తమ టెక్నాలజీ బడ్జెట్‌ను పెంచబోతున్నాయని చెప్పారు.

టీసీఎస్ మున్ముందు 5 ప్రధాన రంగాలపై ఫోకస్ పెట్టనుంది: పాత టెక్నాలజీ సిస్టమ్స్ ఆధునీకరణ, బిజినెస్ ప్రాసెస్ రీడిజైనింగ్, ఏఐ ఏజెంట్ల గవర్నెన్స్, వివిధ దేశాల నిబంధనలకు అనుగుణంగా సావరిన్ ఏఐ (Sovereign AI), ఫ్యాక్టరీలు, వాహనాలలో వాడే ఫిజికల్ ఏఐ.
టెక్నాలజీ మారుతున్న కొద్దీ కంపెనీలు కూడా మారుతున్నాయి. ఏఐ మోడల్స్ కంటే కస్టమర్ల నమ్మకం, బిజినెస్ కాంటెక్స్ట్ ముఖ్యం అని టీసీఎస్ నమ్ముతోంది. కాబట్టి ఉద్యోగులు కూడా సరికొత్త ఏఐ స్కిల్స్ నేర్చుకుంటేనే భవిష్యత్తులో మార్కెట్లో నిలదొక్కుకోగలరని ఈ పరిణామాలు సూచిస్తున్నాయి.