TCS News: టెక్ మేజర్ TCSలో లేఆఫ్స్.. ఉద్యోగుల రిటర్న్ గిఫ్ట్.. కంపెనీకి మైండ్ బ్లాక్

Layoffs News: ప్రస్తుతం ఎక్కడ చూసినా లేఆఫ్స్ ట్రెండ్ నడుస్తోంది. పలు దిగ్గజ కంపెనీలు తమ ఉద్యోగులకు ఉద్వాసన పలుకుతూనే ఉన్నాయి. కానీ భారతీయ టెక్ మేజర్ టాటా కన్సల్టెన్సీ సర్వీసెస్ మాత్రం ఇప్పటివరకు వాటికి కొంత దూరంగా ఉంది. కాగా తాజా సమాచారం మేరకు TCS కూడా ఈ జాబితాలో చేరినట్లు తెలుస్తోంది. టెక్ దిగ్గజం నిర్ణయం కాస్తా కంపెనీ మెడకు చుట్టుకున్నట్లు వార్తలు వస్తున్నాయి.

TCS 22 మంది US ఉద్యోగులను తొలగించినట్లు ప్రముఖ మీడియా సంస్థ నివేదించింది. ఆ కార్మికులు కంపెనీపై US ఈక్వల్ ఎంప్లాయ్‌మెంట్ ఆపర్చునిటీ కమిషన్‌కు ఫిర్యాదు చేసినట్లు తెలిపింది. తమ ఉద్యోగాలను H1-B వీసాలతో ఉన్న భారతీయులకు కల్పించినట్లు బాధితులు ఆరోపించారని వెల్లడించింది.

తమపై జాతి మరియు వయస్సు ఆధారంగా TCS వివక్ష చూపుతోందంటూ కొలువు కోల్పోయిన సిబ్బంది ఆవేదన వ్యక్తం చేశారు. చట్టవిరుద్ధంగా షార్ట్ నోటీసుతో తమను తొలగించారని పేర్కొన్నారు. కాగా సంస్థ క్లయింట్లలో డజన్ల కొద్దీ అమెరికన్ సంస్థలు ఉండటంతో ఈ వివాదం ఎటువైపు దారితీస్తుందోనని టెక్ వర్గాలు ఆందోళ చెందుతున్నాయి.

తొలగించబడిన TCS ఉద్యోగుల్లో కాకేసియన్లు, ఆసియన్-అమెరికన్లు, హిస్పానిక్ అమెరికన్లు ఉన్నట్లు తెలుస్తోంది. వారందరూ 40 నుంచి 60ల మధ్య వయస్సు కలిగి, డజనుకు పైగా US రాష్ట్రాలలో నివసిస్తున్నారు. వీరిలో చాలా మంది MBA లేదా ఇతర అధునాతన డిగ్రీలను కలిగి ఉన్నారు. కాగా భారతీయ కార్మికులకు TCS ప్రాధాన్యత ఇస్తున్నట్లు అమెరికన్ నిపుణులు అభిప్రాయపడుతున్నారు. ఈ ఆరోపణలను TCS ప్రతినిధి ఖండించారు.