టీసీఎస్ ఉద్యోగుల తొలగింపులు, రంగంలోకి దిగిన కర్ణాటక ప్రభుత్వం..సమన్లు జారీ

ఇటీవల టీసీఎస్ (TCS) ప్రకటించిన ఉద్యోగ తొలగింపులపై ఇప్పుడు కర్ణాటక రాష్ట్ర కార్మిక శాఖ చర్యలకు దిగింది. కంపెనీ తీసుకుంటున్న నిర్ణయాలు ఉద్యోగుల జీవితాలను తీవ్రంగా ప్రభావితం చేస్తుండటంతో, ఆగస్ట్ 6న టీసీఎస్‌కు కౌన్సిలేషన్ (సమాధాన) సమావేశానికి హాజరుకావాలని కార్మికశాఖ ఆహ్వానించనుంది.

అసలు విషయం ఏంటి?
TCS ఈ ఫైనాన్షియల్ ఇయర్‌లో (FY26) దాదాపు 2% ఉద్యోగులను తొలగించనుందని, అంటే సుమారు 12,200 మంది ఉద్యోగాలు పోవచ్చని ఇటీవల వార్తలు వచ్చాయి. ముఖ్యంగా మిడిల్స్‌, సీనియర్ ఉద్యోగులపై ఇది ప్రభావం చూపబోతోంది. దీనిపై కర్ణాటక రాష్ట్ర IT/ITeS ఉద్యోగుల యూనియన్ (KITU) కార్మికశాఖకు ఫిర్యాదు చేసింది.

నిబంధనల ఉల్లంఘన?
కర్ణాటక రాష్ట్ర IT/ITeS ఉద్యోగుల యూనియన్ (KITU) ప్రతినిధులు జులై 30న అదనపు కార్మిక కమిషనర్ జి.మంజునాథ్‌ను కలసి, ఈ లేఅఫ్ చర్యలు ఇండస్ట్రియల్ డిస్ప్యూట్స్ యాక్ట్, 1947 నిబంధనలకు విరుద్ధంగా ఉన్నాయని ఫిర్యాదు చేశారు. ఈ చట్టం ప్రకారం, 100 మందికంటే ఎక్కువ ఉద్యోగులున్న కంపెనీలు ఉద్యోగుల తొలగింపులకు ముందు ప్రభుత్వ అనుమతి తీసుకోవాలి. అలాగే ఉద్యోగుల రికార్డులు ప్రభుత్వానికి సమాచారం ఇవ్వాలి.

యూనియన్ వాదన ప్రకారం, టీసీఎస్ ఈ నిబంధనలను పక్కనపెట్టి ఉద్యోగులకు రాజీనామా చేయమని బలవంతం చేయడం ద్వారా "క్రిమినల్" చర్యలు తీసుకుంటోంది.

ఇదే సమయంలో మరో యూనియన్ అయిన NITES (The Nascent Information Technology Employees Senate) కూడా సెంట్రల్ లేబర్ కమిషనర్ కార్యాలయానికి రెండు లేఖలు పంపింది. వారు కూడా ఈ విషయంపై కేంద్ర కార్మిక శాఖ జోక్యం కోరుతున్నారు. ఈ నేపథ్యంలో TCS సీనియర్ అధికారులు ఆగస్ట్ 1న కేంద్ర కార్మిక కమిషనర్ ముందు హాజరుకావాలని సమన్లు జారీ అయ్యాయి.

TCS తీసుకుంటున్న పెద్దసంఖ్యలో ఉద్యోగాల తొలగింపు నిర్ణయంపై ఉద్యోగ సంఘాలు తీవ్రంగా వ్యతిరేకిస్తున్నాయి. ఇది నిబంధనలకు విరుద్ధమని ఆరోపిస్తూ రెండు స్థాయిలలో - రాష్ట్ర, కేంద్ర స్థాయిలో - అధికారులను కలుస్తున్నాయి. ఉద్యోగుల హక్కులు కాపాడే దిశగా ఈ సంఘాల పోరాటం కొనసాగుతుంది.

ఈ చర్యల వెనుక అంతర్జాతీయ పరిస్థితులు మరియు వ్యాపార వ్యూహాలు ప్రధాన పాత్ర పోషిస్తున్నాయి. ప్రస్తుతం ఐటీ కంపెనీలు ఖర్చులను తగ్గించేందుకు, అలాగే వేగంగా ఎదుగుతున్న ఆర్టిఫిషియల్ ఇంటెలిజెన్స్ (AI) టెక్నాలజీకి మారేందుకు ప్రయత్నిస్తున్నాయి. అమెరికా, యూరప్ వంటి దేశాల్లో టెక్ రంగంపై ఖర్చులు తగ్గుతున్న కారణంగా ప్రాజెక్టుల సంఖ్య కూడా తగ్గుతోంది. ఈ పరిణామాల ప్రభావంగా, టీసీఎస్ వంటి దిగ్గజ సంస్థలు మిడిల్ మరియు సీనియర్ స్థాయి ఉద్యోగులను తొలగించే దిశగా అడుగులు వేస్తున్నాయి.