Tata Motors: టాటా మోటార్స్ కీలక ప్రకటన.. EVలు సహా ప్యాసింజర్ వాహనాలపై..

Tata News: ప్యాసింజర్ సహా కమర్షియల్ వాహనాల సెగ్మెంట్‌లో టాటా మోటార్స్ దిగ్గజ తయారీదారుగా వెలుగొందుతోంది. అత్యంత క్వాలిటీతో కూడిన వెహికల్స్‌ను రిలీజ్ చేస్తూ, వాహనదారుల ఆదరాభిమానాలు చూరగొంది. అయితే తాజాగా వినియోగదారులకు ఓ బ్యాడ్ న్యూస్ చెప్పింది.

ఎలక్ట్రిక్ వాహనాలు (EV) సహా తమ ప్యాసింజర్ వాహనాల ధరలను 0.7 శాతం పెంచనున్నట్లు ఆటోమేకర్ టాటా మోటార్స్ ప్రకటించింది. ఇన్‌పుట్ ఖర్చుల పెరుగుదలను పాక్షికంగా భర్తీ చేయడానికి ఈ నిర్ణయం తీసుకున్నట్లు తెలిపింది. ధరల పెరుగుదల ఫిబ్రవరి 1, 2024 నుంచి అమలులోకి వస్తుందని పేర్కొంది.

Q3FY24లో తన మొత్తం గ్లోబల్ హోల్‌సేల్స్ 9 శాతం పెరిగి 3 లక్షల 38 వేల 177 యూనిట్లకు చేరుకున్నట్లు కంపెనీ వెల్లడించింది. వాణిజ్య వాహనాలు మరియు టాటా దేవూ శ్రేణి 98 వేల 679 యూనిట్ల సేల్స్ నమోదు చేసినట్లు తెలిపింది. ఇది సంవత్సరానికి 1 శాతం వృద్ధిని నమోదు చేసినట్లు వివరించింది.

ఇక ప్యాసింజర్ వాహనాల విభాగంలోనూ టాటా మోటార్స్ అదరగొట్టింది. Q3FY24లో గ్లోబల్ హోల్‌సేల్స్ ఏడాదికి 5 శాతం వృద్ధితో లక్షా 38 వేల 455 యూనిట్లకు చేరుకున్నాయి. మారుతీ సుజుకి ఇండియా కూడా కార్ల ధరలను పెంచుతున్నట్లు ఇటీవల ప్రకటించింది. ద్రవ్యోల్బణం మరియు కమోడిటీస్ ధరల కారణంగా పెరిగిన ఖర్చులు.. రేట్ల పెరుగుదలకు కారణమని పేర్కొంది.