Tata Group: చరిత్ర సృష్టించిన టాటా స్టాక్.. 23 మంది నిపుణులు కొనమంటున్న షేర్..

TCS Shares: ఇటీవలి కాలంలో టాటా గ్రూప్ లిస్టెడ్ కంపెనీల్లో భారీ బుల్ ర్యాలీ కొనసాగుతోంది. ఒకదాని తర్వాత మరొకటి ఊహించని పనితీరును కనబరిచి ఆశ్చర్యపరుస్తున్నాయి. దీంతో అనేక టాటా కంపెనీల్లో పెట్టుబడిదారుల కోలాహలం కొనసాగుతోంది.

ఇప్పుడు మనం మాట్లాడుకోబోతున్నది టాటా గ్రూప్‌లోని దేశీయ అతిపెద్ద టెక్ దిగ్గజం టీసీఎస్ గురించే. మంగళవారం ఇంట్రాడే ట్రేడ్‌లో టాటా కన్సల్టెన్సీ సర్వీసెస్ లిమిటెడ్ షేర్లు 4% కంటే ఎక్కువ లాభపడ్డాయి. దీంతో కంపెనీ షేర్లు సరికొత్త 52 వారాల గరిష్ఠమైన రూ.4,140 రేటును తాకాయి. దీని తర్వాత కంపెనీ మార్కెట్ క్యాప్ ఏకంగా రూ.15 లక్షల కోట్లను దాటేసింది. వరుసగా ఐదు రోజుల నుంచి కంపెనీ షేర్లలో పెరుగుదల ప్రస్తుత రికార్డు గరిష్ఠాలకు దారితీసింది. దీనికి ముందు స్టాక్ చివరిసారిగా 2021లో రూ.4,123 మార్కును అందుకుంది.

మార్కెట్ క్యాప్ పరంగా టీసీఎస్ ప్రస్తుతం దేశంలో రెండవ అత్యంత ఖరీదైన కంపెనీగా మారిపోయింది. ముఖేష్ అంబానీకిచెందిన రిలయన్స్ ఇండస్ట్రీస్ మెుదటి స్థానంలో కొనసాగుతూ రూ.20 లక్షల కోట్ల విలువను కలిగి ఉంది. ఇదే క్రమంలో టాటాలకు చెందిన టైటాన్, టాటా మోటార్స్, ట్రెంట్, టాటా పవర్, ఇండియన్ హోటల్స్, టాటా ELXI వంటి ఇతర స్టాక్‌లు కూడా మెరుగైన పనితీరు కనబరిచాయి. ప్రస్తుతం టీసీఎస్ షేర్లను ట్రాక్ చేస్తున్న 44 మంది విశ్లేషకుల్లో 23 మంది కంపెనీ షేర్లను కొనాల్సిందిగా సూచిస్తూ BUY రేటింగ్ ఇచ్చారు. రానున్న కాలంలో టీసీఎస్ స్టాక్ ధర రూ.4,359 స్థాయిలకు చేరుకోవచ్చని వారు అంచనా వేస్తున్నారు. ఇదే క్రమంలో 10 మంది షేర్లను విక్రయించాలని సూచిస్తున్నారు.

ప్రస్తుత ఆర్థిక సంవత్సరం డిసెంబరుతో మూడో త్రైమాసికంలో టెక్ దిగ్గజం టీసీఎస్ నికర లాభం 8.2 శాతం పెరిగి రూ.11,735 కోట్లకు చేరుకుంది. భారత్ నేతృత్వంలోని వర్ధమాన మార్కెట్లలో బలమైన రెండంకెల వృద్ధి కారణంగా సమీక్షిస్తున్న త్రైమాసికంలో తమ టర్నోవర్ కూడా నాలుగు శాతం పెరిగి రూ.60,583 కోట్లకు చేరుకుందని కంపెనీ పేర్కొంది. ఈ క్రమంలో నికర మార్జిన్ 19.4 శాతంగా ఉన్నట్లు ప్రకటించింది. అలాగే కంపెనీ అందించిన వివరాల ప్రకారం దాదాపు 8.1 బిలియన్ డాలర్ల విలువైన ఆర్డర్లు పైప్‌లైన్‌లో ఉన్నాయి.