Tata News: యాడ్స్ ఇవ్వకుండానే వేల కోట్ల ఆదాయం.. ఇదీ టాటా కంపెనీ సక్సెస్ మంత్ర

Zudio: ఏదైనా వ్యాపారం మొదలుపెట్టాలంటే ప్రకటనలు, మార్కెటింగ్ కోసం భారీ మొత్తంలో వెచ్చించాల్సి ఉంటుంది. సక్సెస్ ఫుల్ బిజినెస్ మ్యాన్ అంబానీ నుంచి స్టార్టప్ వరకు పాటించే సూత్రం ఇదే. అయితే ఈ విషయంలో టాటాల రూటే సపరేటుగా ఉంది.

టాటా గ్రూపునకు చెందిన ఓ సంస్థ.. ప్రకటనల ప్రస్తావనే లేకుండా ఏకంగా 4 వేల కోట్లు ఆదాయాన్ని ఆర్జించింది. వెస్ట్‌సైడ్ పేరిట దేశ వ్యాప్తంగా ప్రీమియం వస్త్రాలను టాటా గ్రూపు విక్రయిస్తోంది. అయితే భారీ మొత్తం వెచ్చించలేని వారికి సైతం నాణ్యమైన బట్టలను అందించాలనే ఉద్దేశంతో జూడియోను రంగంలోకి దింపింది.

దేశంలోని 95 శాతం మంది ప్రజలను లక్ష్యంగా చేసుకుని 2016లో జూడియోను టాటా గ్రూపు ప్రారంభించింది. అప్పటి నుంచి 7 సంవత్సరాలుగా దిగ్విజయంగా తన జైత్రయాత్ర కొనసాగిస్తూ వస్తోంది. కానీ ఇప్పటివరకు టాటా గ్రూపు నుంచి జూడియో కోసం ఎలాంటి ప్రకటనలు వెలువడలేదు. అయినప్పటికీ విపరీతంగా వృద్ధిని కనబరుస్తోంది.

జూడియో విజయ రహస్యం చిన్న పట్టణాలపై దృష్టి పెట్టడమేనని చెప్పవచ్చు. సరైన కస్టమర్ బేస్‌ను ఎన్నుకుని వారి టేస్ట్‌ కు తగిన విధంగా, అందుబాటు ధరల్లో వస్త్రాలను విక్రయించడం మరో సక్సెక్ మంత్రం. ఇందుకోసం జూడియో తన స్టోర్‌లను ఎక్కువగా ద్వితీయ, తృతీయ శ్రేణి నగరాలలో నెలకొల్పింది. మెయిన్ సెంటర్స్‌కు దూరంగా షాపులు పెట్టి అద్దె, అడ్వాన్స్ చెల్లింపులను ఆదా చేయడం వంటి ఎన్నో ట్రిక్స్ ఈ విజయానికి కారణంగా తెలుస్తోంది.