Tata News: ఆ రెండు కంపెనీలు కొనే పనిలో టాటాలు.. ప్రత్యర్థులకు చుక్కలే..

Tata Consumer: దేశీయంగా టాటా గ్రూప్ అనేక వ్యాపారాల్లో కొనసాగుతున్న సంగతి తెలిసిందే. అయితే తాజాగా మార్కెట్లో పెద్ద వాటాను కలిగి ఉన్న రెండు కంపెనీలను కొనుగోలు చేయాలని చూస్తోంది.

ముందుగా టాటా కన్జూమర్ క్యాపిటల్ ఫుడ్స్ కంపెనీలు దక్కించుకునేందుకు శుక్రవారం పెద్ద ప్రకటన చేశింది. ముంబై కేంద్రంగా పనిచేస్తున్న ఈ కంపెనీ చింగ్స్ సీక్రెట్, స్మిత్ అండ్ జోన్స్ బ్లాండ్లను రూ.5,100 కోట్లకు కొనుగోలు చేయాలని నిర్ణయించింది. దశలవారీగా 100 శాతం ఈక్విటీ వాటాను దక్కించుకునేందుకు ఒప్పందం కూడా కుదుర్చుకుంది. దీని ద్వారా కంపెనీ ఇన్‌స్టాంట్ ఫుడ్స్ విభాగంలో వేగంగా ముందుకు సాగాలని చూస్తోంది.

ఇదే క్రమంలో టాటాలు ప్యాకేజ్డ్ ఆర్గానిక్ టీలు, హెర్బల్ ప్రొడక్ట్స్, హెల్త్ సప్లిమెంట్ల వ్యాపారంలో ఉన్న ఆర్గానిక్ ఇండియాను రూ.1,900 కోట్లకు కొనుగోలు చేసేందుకు కచ్చితమైన ఒప్పందాలపై సంతకాలు చేసినట్లు కూడా ప్రకటించారు. 75% ఈక్విటీ షేర్‌హోల్డింగ్‌ను ముందస్తుగా స్వాధీనం చేసుకుంటామని, మిగిలిన 25% వాటాను వచ్చే మూడేళ్లలోగా తీసుకుంటామని క్యాపిటల్ ఫుడ్స్ కొనుగోలు గురించి టాటా కన్స్యూమర్ తెలిపింది. వేగంగా మార్కెట్లో పెరుగుతున్న ఆర్గానిక్ ఉత్పత్తుల కేటగిరీలో తన ఉత్పత్తి పోర్ట్ ఫోలియో పెంచుకునేందుకు తాజా డీల్ కంపెనీకి ఎంతగానో కలిసిరానుంది.

ప్రస్తుతం చింగ్స్ సీక్రెట్ దేశీ చైనీస్‌లో మార్కెట్ లీడర్‌గా ఉంది. చట్నీలు, బ్లెండెడ్ మసాలాలు, సాస్‌లు, సూప్‌ల వ్యాపారంలో కంపెనీకి దేశీయంగా పెద్ద మార్కెట్ ఉంది. క్యాపిటల్ ఫుడ్స్ వేగంగా అభివృద్ధి చెందుతున్న వర్గాలలో గృహ వినియోగం కోసం ప్రత్యేకమైన ఉత్పత్తుల పోర్ట్‌ఫోలియోతో బలమైన గొడుగు ప్లాట్‌ఫారమ్ బ్రాండ్‌లను కలిగి ఉంది.

క్యాపిటల్ ఫుడ్స్ కార్యకలాపాలు నిర్వహిస్తున్న కేటగిరీల మొత్తం పరిమాణం రూ.21,400 కోట్లుగా అంచనా వేయబడింది. FY24 కోసం క్యాపిటల్ ఫుడ్స్ అంచనా టర్నోవర్ సుమారు రూ.750-770 కోట్లు అని, ఆర్గానిక్ ఇండియా అంచనా టర్నోవర్ సుమారు రూ.360-370 కోట్లని టాటా కన్స్యూమర్ తెలిపింది.