భారత్ మీద 50 శాతం సుంకాలపై అమెరికా యూటర్న్.. కొనసాగుతున్న రష్యా ముడి చమురు కొనుగోలు సస్పెన్స్

భారతదేశం, అమెరికా మధ్య కొనసాగుతున్న సుంకాల వివాదం త్వరలో ముగియబోతోందని మింట్‌లో వచ్చిన తాజా నివేదిక తెలిపింది. ఈ నివేదిక ప్రకారం రెండు దేశాలు చాలా కాలంగా పెండింగ్‌లో ఉన్న ద్వైపాక్షిక వాణిజ్య ఒప్పందం (bilateral trade agreement)ను తుది దశకు తీసుకువెళ్తున్నట్లుగా తెలుస్తోంది. ఈ ఒప్పందం కుదిరితే, అమెరికా భారతీయ దిగుమతులపై ప్రస్తుతం అమల్లో ఉన్న 50 శాతం సుంకాన్ని 15 నుంచి 16 శాతం కు తగ్గించే అవకాశం ఉంది.

ఈ చర్చల్లో ప్రధాన దృష్టి వ్యవసాయం (agriculture), ఇంధన రంగం (energy cooperation)పై నిలిచింది. ముఖ్యంగా రష్యా నుండి భారతదేశం దిగుమతి చేసుకుంటున్న ముడి చమురు (crude oil imports from Russia) పరిమాణం కీలక అంశంగా మారింది. అమెరికా ఒత్తిడితో భారతదేశం రష్యన్ చమురు కొనుగోళ్లు తగ్గించే అవకాశముందని వార్తలు వస్తున్నాయి.

రెండు దేశాల మధ్య చర్చలు తుది దశలో ఉన్నాయని.. ఈ నెలాఖరులో జరగనున్న ఆసియాన్ శిఖరాగ్ర సమావేశానికి ముందు వాణిజ్య ఒప్పందం ఖరారు కావచ్చని మింట్ తెలిపింది. ఆ తర్వాత ఇరు ప్రభుత్వాలు అధికారిక ప్రకటన చేసే అవకాశం ఉందని కూడా కథనంలో తెలిపింది. ఇప్పటివరకు అమెరికా లేదా భారతదేశం అధికారికంగా స్పందించకపోయినా, వాణిజ్య చర్చల చుట్టూ రాజకీయ చర్చలు వేడెక్కుతున్నాయి.

అమెరికా మాజీ అధ్యక్షుడు డొనాల్డ్ ట్రంప్ ఇటీవల ప్రధాన మంత్రి నరేంద్ర మోదీతో ఫోన్ ద్వారా మాట్లాడారు. ట్రంప్ విలేకరులతో మాట్లాడుతూ.. ఇంధనం కూడా మా చర్చలో ప్రధాన భాగం. భారతదేశం రష్యా నుండి చమురు కొనుగోళ్లను పరిమితం చేయడానికి అంగీకరించిందని అన్నారు. దీనికి ప్రతిగా భారత ప్రభుత్వం రష్యన్ చమురు కొనుగోళ్లపై ఎటువంటి చర్చ జరగలేదని స్పష్టం చేసింది. మోడీ తన X (మాజీ ట్విట్టర్) పోస్టులో ట్రంప్‌కు దీపావళి శుభాకాంక్షలకు ధన్యవాదాలు తెలుపుతూ.. మన రెండు ప్రజాస్వామ్యాలు ప్రపంచానికి ఆశాకిరణంగా కొనసాగాలి. ఉగ్రవాదానికి వ్యతిరేకంగా ఐక్యంగా నిలవాలి అని పేర్కొన్నారు.

వాణిజ్య చర్చలలో, అమెరికా తన వ్యవసాయ ఉత్పత్తులకు భారత మార్కెట్‌ను తెరవాలని కోరుతోంది. జన్యుపరంగా మార్పు చేయని మొక్కజొన్న (non-GMO corn), సోయామీల్ (soymeal) వంటి ఉత్పత్తులను భారత్ దిగుమతికి అనుమతించవచ్చని నివేదిక తెలిపింది. ఈ చర్య, అమెరికా వ్యవసాయ రంగానికి భారత మార్కెట్‌ యాక్సెస్‌ను విస్తృతంగా అందిస్తుంది. అదే సమయంలో, అమెరికా కూడా భారతీయ ఉత్పత్తులపై సుంకాలను తగ్గించడం ద్వారా వస్త్రాలు (textiles), ఇంజనీరింగ్ ఉత్పత్తులు (engineering goods), ఔషధాలు (pharmaceuticals) వంటి రంగాలకు పెద్ద ఊతమివ్వనుంది.

అమెరికా Tariff 50 శాతం నుంచి 15 నుండి 16 శాతానికి తగ్గితే భారతీయ ఉత్పత్తులు అమెరికా మార్కెట్లో మరింత పోటీదారులుగా (competitive) మారతాయి. ఇది ప్రత్యేకంగా చిన్న, మధ్యతరహా ఎగుమతిదారులకు పెద్ద ఊతమివ్వడమే కాకుండా, ఇంజనీరింగ్, ఫార్మా, టెక్స్‌టైల్ రంగాలకు ఎగుమతి వృద్ధిని అందిస్తుంది. అదనంగా, వాణిజ్య సమతుల్యత (trade balance) కాపాడేందుకు రెగ్యులర్ టారిఫ్ & మార్కెట్ యాక్సెస్ సమీక్షా వ్యవస్థను ఒప్పందంలో చేర్చే అవకాశం ఉందని సమాచారం.