టవల్ వాడినందుకు ఉద్యోగం నుంచి పీకేసారు.. రూ. కోటి జీతం ఉన్న టెకీ ఒక్కసారిగా రోడ్డుమీదకు..

కార్పొరేట్ ఉద్యోగులు తమ వృత్తిపరమైన జీవితంలో ఉన్నతాధికారుల వ్యక్తిగత ఆగ్రహానికి ఏ విధంగా గురవుతారో తెలిపే ఒక విచిత్రమైన, దిగ్భ్రాంతికర సంఘటన స్విట్జర్లాండ్‌లో వెలుగుచూసింది. జిమ్‌లోని సౌనాలో (Sauna) ఒక సీనియర్ ఎగ్జిక్యూటివ్‌కు చెందిన టవల్‌ను అనుకోకుండా ఉపయోగించినందుకు.. ప్రముఖ టెక్ కంపెనీలోని ఒక సాఫ్ట్‌వేర్ ఇంజనీర్ తన ఉద్యోగాన్ని కోల్పోవాల్సి వచ్చింది. సంవత్సరానికి సుమారు CHF 100,000 (దాదాపు రూ. 1 కోటి) వేతనం పొందుతున్న ఆ ఇంజనీర్.. తన ఉద్యోగ ఉద్వాసన గురించి సామాజిక మాధ్యమం 'రెడ్డిట్' వేదికగా పంచుకోవడంతో ఈ అంశం వైరల్‌గా మారింది.

బాధిత ఇంజనీర్ కథనం ప్రకారం.. అతను 2022 నుండి స్విట్జర్లాండ్‌లోని ఒక ప్రముఖ టెక్ సంస్థలో పనిచేస్తున్నాడు. ప్రతివారం క్రమం తప్పకుండా జిమ్‌కు వెళ్లే అలవాటున్న అతను, మే 8వ తేదీ శుక్రవారం నాడు వ్యాయామం ముగించుకుని సౌనాకు వెళ్లాడు. అక్కడ పొరపాటున మరొక వ్యక్తికి చెందిన టవల్‌ను తీసుకున్నాడు. అయితే ఆ టవల్ యజమాని తాను పనిచేస్తున్న కంపెనీలోని అత్యున్నత యాజమాన్య విభాగంలో కీలక అధికారి అనే విషయం ఆ తర్వాతే అతనికి తెలిసింది.

ఈ పొరపాటును గుర్తించిన ఆ సీనియర్ ఎగ్జిక్యూటివ్, పైకి ప్రశాంతంగానే కనిపిస్తూ నువ్వు కొత్త ఉద్యోగం వెతుక్కుంటే మంచిదని ఇంజనీర్‌ను తీవ్రంగా హెచ్చరించాడు. అనంతరం, తన కోసం వేరొక టవల్ తీసుకురావడానికి జిమ్ రిసెప్షన్‌కు వెళ్లాలని సూచించగా.. ఇంజనీర్ అలాగే చేశాడు.

Also Read

ఒక్క జూమ్ కాల్‌తో 900 మందిని తీసేసిన సీఈఓ.. ఇప్పుడు జాబ్ లేక రోడ్డు మీదకు.. విశాల్ గార్గ్ కథ కంచికి..

ఈ సంఘటన జరిగిన ఐదు రోజులకే (మే 13న), ఉదయం 7:30 గంటలకు హెచ్‌ఆర్ (HR) నుండి మైక్రోసాఫ్ట్ టీమ్స్ ద్వారా ఇంజనీర్‌కు కాల్ వచ్చింది. ఆర్థిక కారణాల (Financial Reasons) దృష్ట్యా అతడిని ఉద్యోగం నుండి తొలగిస్తున్నట్లు హెచ్‌ఆర్ ప్రతినిధులు ప్రకటించారు. ఆ సమయంలో కంపెనీలో ఉద్యోగుల తగ్గింపు ప్రక్రియ (Layoffs) నడుస్తున్నప్పటికీ.. ఈ సౌనా ఘటన కారణంగానే తనపై పగబట్టి తొలగించారని అతడు ఆరోపించాడు.

చట్టపరమైన రక్షణ కోసం లీగల్ ఇన్సూరెన్స్ ('రెక్ట్స్‌షుట్జ్‌వెర్సిచెరుంగ్') సంస్థను సంప్రదించగా.. కంపెనీలు "ఆర్థిక కారణాలు" చూపిస్తూ ఉద్యోగులను తొలగించడం చట్టబద్ధమేనని, పైగా సౌనాలో కెమెరాలు లేకపోవడం వల్ల ఆ అధికారి బెదిరించినట్లు ఆధారాలు చూపడం సాధ్యపడదని లాయర్లు స్పష్టం చేశారు.

తాను అనేక కీలక ప్రాజెక్టుల మధ్యలో ఉన్నప్పుడు అర్ధాంతరంగా తొలగించారని, దీనివల్ల అనేక డెడ్‌లైన్లు వాయిదా పడ్డాయని ఆ ఇంజనీర్ తీవ్ర ఆవేదన వ్యక్తం చేశాడు. కంపెనీలలో ఉద్యోగుల ప్రతిభకు విలువ లేదని.. ఉన్నతాధికారుల అహంకారం ముందు ఉద్యోగులు బానిసల వంటివారని కామెంట్ చేశాడు. అంతేకాకుండా, కంపెనీలు అనధికారికంగా పంచుకునే 'రహస్య బ్లాక్‌లిస్ట్'లో తన పేరును చేర్చారని, దీనివల్ల తనకు మళ్లీ కొత్త ఉద్యోగం రాకుండా చేస్తున్నారని ఆరోపించాడు.

మూడు నెలలుగా నిరుద్యోగిగా ఉన్న ఆ సాఫ్ట్‌వేర్ ఇంజనీర్, ఇకపై ఉద్యోగాల కోసం ప్రయత్నించకుండా సొంతంగా ఒక వ్యాపారాన్ని ప్రారంభించాలని నిర్ణయించుకున్నట్లు తెలిపాడు.