కండోమ్స్ కోసం రూ. లక్షకు పైగా ఖర్చు పెట్టిన కస్టమర్.. బిత్తరపోయిన స్విగ్గీ ఇన్‌స్టామార్ట్ యాజమాన్యం..

ఆహార డెలివరీ సేవలతో దేశవ్యాప్తంగా గుర్తింపు పొందిన స్విగ్గీ సంస్థ.. తన క్విక్-కామర్స్ ప్లాట్‌ఫామ్ అయిన ఇన్‌స్టామార్ట్ ద్వారా కస్టమర్ల షాపింగ్ అలవాట్లపై 2025 సంవత్సరానికి సంబంధించి ఓ నివేదికను విడుదల చేసింది. ఈ నివేదికలో దేశవ్యాప్తంగా వినియోగదారుల కొనుగోలు మార్పులతో పాటు ఎక్కువగా కొనుగోలు చేసిన ఉత్పత్తులు, పండుగ కాలంలో షాపింగ్ తీరు వంటి అనేక ఆసక్తికర అంశాలు ఉన్నాయి. అయితే, చెన్నైకి చెందిన ఒక కస్టమర్ చేసిన షాపింగ్ మాత్రం ప్రత్యేకంగా అందరి దృష్టిని ఆకర్షించింది.

ఈ నివేదిక ప్రకారం.. చెన్నైలో నివసిస్తున్న ఓ కస్టమర్ ఒకే ఏడాదిలో రూ.1.06 లక్షల విలువైన కండోమ్‌లను కొనుగోలు చేశాడు. మొత్తం 228 ఆర్డర్లలో ఈ ఉత్పత్తులను ఆర్డర్ చేసినట్లు ఇన్‌స్టామార్ట్ వెల్లడించింది. ఈ ఖర్చును సంస్థ అసాధారణమైన కొనుగోలు మార్పుగా వర్గీకరించింది. ఇది క్విక్-కామర్స్ సేవలను వినియోగదారులు ఎంత విభిన్నంగా ఉపయోగిస్తున్నారో సూచించే ఉదాహరణగా నిలిచింది.

మొదట్లో ఇన్‌స్టామార్ట్ వంటి క్విక్-కామర్స్ ప్లాట్‌ఫామ్‌లు పాలు, కూరగాయలు, మందులు వంటి అత్యవసర అవసరాల కోసం మాత్రమే ఉపయోగించబడేవి. కానీ కాలక్రమేణా ఇవి పూర్తిస్థాయి షాపింగ్ వేదికలుగా మారాయి. రోజువారీ అవసరాల నుంచి వ్యక్తిగత సంరక్షణ ఉత్పత్తుల వరకు వినియోగదారులు ఇప్పుడు ఒకే ప్లాట్‌ఫామ్‌లో కొనుగోలు చేయడాన్ని ప్రాధాన్యంగా భావిస్తున్నారు.

ఇన్‌స్టామార్ట్ నివేదికలో మరో ఆసక్తికర అంశం ఏమిటంటే.. ప్రతి 127 ఆర్డర్లలో ఒకటి condoms కోసమేనని పేర్కొనడం ఆశ్చర్యకర అంశంగా చెప్పుకోవచ్చు. ఈ విభాగంలో దీనిపై డిమాండ్ ఎంతగా పెరిగిందో తెలియజేస్తుంది. ముఖ్యంగా సెప్టెంబర్ నెలలో కండోమ్‌ల కొనుగోళ్లు దాదాపు 24 శాతం పెరిగాయని నివేదిక వెల్లడించింది. ఈ నెలను సంస్థ సరదాగా సంవత్సరంలో అత్యంత రద్దీగా ఉండే నెలగా అభివర్ణించింది.

ఇటీవలి పరిశోధనలు కూడా క్విక్-కామర్స్ ప్లాట్‌ఫామ్‌ల ద్వారా వ్యక్తిగత సంరక్షణ ఉత్పత్తుల కొనుగోలు పెరుగుతోందని సూచిస్తున్నాయి. దీనికి ప్రధాన కారణం ఈ ప్లాట్‌ఫామ్‌లు అందిస్తున్న రహస్యమైన ప్యాకేజింగ్ విధానం. ఉత్పత్తుల వివరాలు బయటికి కనిపించకుండా, సాధారణ డెలివరీలాగానే అందించడం వల్ల వినియోగదారులు సంకోచం లేకుండా కొనుగోలు చేస్తున్నారు. దీంతో ఏం ఉత్పత్తులు కొంటున్నారనేది కంపెనీకి తప్ప ఎవరికీ తెలియడం లేదు.

నిపుణుల అభిప్రాయం ప్రకారం.. వేగవంతమైన డెలివరీ, గోప్యత, సులభమైన చెల్లింపుల విధానాలు క్విక్-కామర్స్ ప్లాట్‌ఫామ్‌లను ప్రజల దైనందిన జీవితంలో కీలక భాగంగా మార్చుతున్నాయి. చెన్నై కస్టమర్ ఉదాహరణ కేవలం ఒక వ్యక్తిగత షాపింగ్ అలవాటు మాత్రమే కాదు.. ఇది పట్టణ వినియోగదారుల మారుతున్న అభిరుచులు, సౌలభ్యాన్ని ప్రాధాన్యంగా పెట్టుకునే మార్పును ప్రతిబింబిస్తోంది. స్విగ్గీ ఇన్‌స్టామార్ట్ నివేదిక మొత్తం చూస్తే.. క్విక్-కామర్స్ భవిష్యత్తులో మరింత విస్తృతంగా వినియోగంలోకి రానుందని, సంప్రదాయ రిటైల్‌తో సమానంగా పోటీ పడే స్థాయికి చేరుకుంటోందని స్పష్టంగా కనిపిస్తోంది.

బెంగళూరుకు చెందిన ఓ వ్యక్తి కేవలం రూ.10 మాత్రమే వెచ్చించి ప్రింటవుట్‌లు తెప్పించుకున్న ఉదాహరణ నివేదికలో చోటు దక్కింది. మరోవైపు హైదరాబాద్‌కు చెందిన ఓ వినియోగదారు లేటెస్ట్ ఐఫోన్ మోడళ్ల కొనుగోలుకు ఏకంగా రూ.4.3 లక్షలు ఖర్చు చేసినట్లు ఇన్‌స్టామార్ట్ వెల్లడించింది.ఇంకా 2025లో ఒక వ్యక్తి ఒక్క ఏడాదిలోనే రూ.22 లక్షల వరకు ఖర్చు చేశాడని నివేదిక పేర్కొంది. ముంబయికి చెందిన మరో వినియోగదారు రూ.15.16 లక్షల విలువైన బంగారాన్ని ఆన్‌లైన్‌లో కొనుగోలు చేయడం విశేషంగా నిలిచింది.

టైర్-2 నగరాల్లోనూ ఇన్‌స్టామార్ట్ వినియోగం వేగంగా పెరుగుతోంది. రాజ్‌కోట్‌లో ఆర్డర్ల సంఖ్య ఏకంగా 10 రెట్ల వృద్ధిని నమోదు చేయగా, లుధియానాలో 7 రెట్లు, భువనేశ్వర్‌లో 4 రెట్ల వృద్ధి కనిపించినట్లు నివేదిక తెలిపింది. దేశవ్యాప్తంగా ఎక్కువగా ఆర్డర్ చేసిన ఉత్పత్తుల జాబితాలో కరివేపాకు, పెరుగు, గుడ్లు, పాలు, అరటిపండ్లు వంటి నిత్యావసరాలు అగ్రస్థానాల్లో ఉన్నాయని ఇన్‌స్టామార్ట్ తెలిపింది. కొచ్చికి చెందిన ఓ వినియోగదారు ఏడాదిలో 368 సార్లు కరివేపాకు కోసం ఆర్డర్ పెట్టాడని నివేదిక పేర్కొంది. అంటే రోజుకు సగటున ఒక్కసారి ఆర్డర్ చేసినట్టేనని అధికారులు తెలిపారు.

ఇక బెంగళూరుకు చెందిన ఓ వినియోగదారు డెలివరీ బాయ్‌కు మొత్తం రూ.68,600 టిప్‌గా చెల్లించి అందరినీ ఆశ్చర్యపరిచాడు. అలాగే ఉదయం 7 నుంచి 11 గంటల మధ్య, సాయంత్రం 4 నుంచి 7 గంటల మధ్య అత్యధికంగా ఆర్డర్లు నమోదవుతున్నాయని నివేదిక వెల్లడించింది.