Swiggy: స్విగ్గీ 'స్నాక్' కథ ముగిసింది! 10 నిమిషాల డెలివరీ ఎందుకు ఫెయిల్ అయ్యింది?

భారతదేశంలో క్విక్ కామర్స్ (Quick Commerce) జోరు కొనసాగుతున్న వేళ, ఫుడ్ డెలివరీ దిగ్గజం స్విగ్గీ (Swiggy) ఒక అనూహ్య నిర్ణయం తీసుకుంది. కేవలం 10 నుంచి 15 నిమిషాల్లో స్నాక్స్, పానీయాలను డెలివరీ చేస్తామని గొప్పగా ప్రారంభించిన తన 'స్నాక్' (Snacc) యాప్‌ను అధికారికంగా మూసివేసింది. 2025 జనవరిలో ఎంతో ఆర్భాటంగా మొదలైన ఈ సేవలు, కనీసం 15 నెలలు కూడా నిలబడలేకపోయాయి. కేవలం ఏడాది తిరిగేసరికే లాభాలు లేక ఈ ప్రాజెక్టును నిలిపివేస్తున్నట్లు స్విగ్గీ ప్రకటించింది.

డార్క్ స్టోర్ మోడల్ , సవాళ్లు

సాధారణ స్విగ్గీ యాప్‌లో మనం ఫుడ్ ఆర్డర్ చేస్తే, అది రెస్టారెంట్‌లో తయారై రావడానికి 30 నుండి 40 నిమిషాలు పడుతుంది. కానీ 'స్నాక్' యాప్‌ను స్విగ్గీ 'డార్క్ స్టోర్' మోడల్‌పై నిర్మించింది. అంటే, కొన్ని ఎంపిక చేసిన ప్రాంతాల్లో సొంత హబ్‌లను ఏర్పాటు చేసి, అక్కడ రెడీ-టు-ఈట్ ఆహార పదార్థాలను నిల్వ ఉంచేవారు. ఆర్డర్ రాగానే నిమిషాల్లో పంపేవారు. బెంగళూరు, గురుగ్రామ్, నోయిడా వంటి నగరాల్లో పైలెట్ ప్రాజెక్ట్‌గా ఇది మొదలైనా, ఆర్థికంగా నిలదొక్కుకోవడంలో విఫలమైంది.

ఎక్కడ తేడా కొట్టింది?

ఫుడ్ డెలివరీ నిపుణుల అభిప్రాయం ప్రకారం, 10 నిమిషాల ఫుడ్ డెలివరీలో లాభాలు రావడం చాలా కష్టం. ఎందుకంటే..

• నిర్వహణ ఖర్చులు: ప్రతి ఏరియాలో హబ్‌లను మెయింటైన్ చేయడం, నిరంతరం రైడర్లను అందుబాటులో ఉంచడం భారీ ఖర్చుతో కూడుకున్న పని.
• వృధా (Wastage): ఆహార పదార్థాలు త్వరగా పాడైపోతాయి. ఆర్డర్లు ఆశించిన స్థాయిలో రాకపోతే స్టాక్ అంతా వృధా అవుతుంది.
• కస్టమర్ మైండ్‌సెట్: కిరాణా సామాగ్రి (Groceries) అత్యవసరంగా కావాలి కానీ, స్నాక్స్ కోసం కస్టమర్లు మరో 15 నిమిషాలు వేచి ఉండటానికి సిద్ధంగానే ఉంటారు. దీనివల్ల 'స్నాక్' యాప్‌కు ప్రత్యేక గుర్తింపు లభించలేదు.

నష్టాల్లో స్విగ్గీ.. లాభాల బాటలో అడుగులు

స్విగ్గీ ఈ నిర్ణయం తీసుకోవడానికి ప్రధాన కారణం ఆర్థిక క్రమశిక్షణ. 2026 మూడో త్రైమాసికంలో (Q3 FY26) స్విగ్గీ ఏకంగా రూ. 1,065 కోట్ల నికర నష్టాన్ని నమోదు చేసింది. ఆదాయం 54 శాతం పెరిగినప్పటికీ, ఖర్చులు కూడా భారీగా పెరగడంతో ఇన్వెస్టర్ల నుంచి ఒత్తిడి మొదలైంది. అందుకే, నష్టాలు తెచ్చిపెట్టే చిన్న చిన్న ప్రయోగాలను పక్కన పెట్టి, ప్రధాన ఫుడ్ డెలివరీ వ్యాపారంపై దృష్టి పెట్టాలని సంస్థ నిర్ణయించుకుంది. ప్రస్తుతం స్విగ్గీ మెయిన్ ఫుడ్ డెలివరీ బిజినెస్ 20.5 శాతం వృద్ధిని కనబరుస్తుండటం విశేషం.

పోటీదారులు కూడా అదే దారిలో..

కేవలం స్విగ్గీ మాత్రమే కాదు, ఈ రంగంలో ఉన్న ఇతర కంపెనీలు కూడా ఇబ్బందులు పడుతున్నాయి. జెప్టో (Zepto) తన 'జెప్టో కేఫ్' స్టోర్లను తగ్గించుకోగా, జోమాటో కూడా తన 15 నిమిషాల సర్వీస్ 'ఎవ్రీడే'ను గతంలోనే నిలిపివేసింది. అయితే, బ్లింకిట్ (Blinkit) కు చెందిన 'బిస్ట్రో' ప్రస్తుతం కొంత మెరుగ్గా ఉన్నట్లు కనిపిస్తున్నా, ఈ సెగ్మెంట్‌లో లాభాలు రావడం మాత్రం సవాలుగానే మారింది.

మొత్తంగా అతివేగం ఎప్పుడూ ప్రమాదకరమేనని స్విగ్గీ 'స్నాక్' ఉదంతం నిరూపించింది. వినియోగదారులకు సౌకర్యం ఎంత ముఖ్యమో, వ్యాపారానికి లాభాలు కూడా అంతే ముఖ్యమని ఈ నిర్ణయం స్పష్టం చేస్తోంది.