Patanjali News: పతంజలి చుట్టూ ఉచ్చు బిగుస్తున్న సుప్రీం.. ప్రమోటర్‌కు నోటీసులు

Patanjali Ayurvedic: యోగా గురువు బాబా రామ్‌దేవ్‌కు చెందిన పతంజలి ఇటీవల వార్తల్లో నిలిచింది. తప్పుడు ప్రకటనలతో ప్రజలను పక్కదోవ పట్టిస్తోందని అభియోగం నమోదైంది. దీంతో సుప్రీంకోర్టు కూడా అక్షింతలు వేసింది. ఈ తరహా చర్యలు మానుకోవాలని సూచించింది. దీంతో సరేనని కోర్టు ముందు తలూపింది.

పతంజలి ఆయుర్వేదం మేనేజింగ్ డైరెక్టర్ ఆచార్య బాలకృష్ణలకు సుప్రీంకోర్టు నోటీసులు జారీ చేసింది. తమ ఉత్పత్తుల ప్రకటనలు మరియు వాటి ఔషధ గుణాలకు సంబంధించి కోర్టులో ఇచ్చిన హామీని ప్రాథమికంగా ఉల్లంఘించారని అందులో పేర్కొంది. వారిపై ధిక్కార చర్యలు ఎందుకు ప్రారంభించకూడదో చెప్పాలని న్యాయస్థానం ప్రశ్నించింది.

అయితే సుప్రీంకోర్టు పరిశీలన కారణంగా పతంజలి ఫుడ్స్ లిమిటెడ్(PFL) వ్యాపార కార్యకలాపాలు, ఆర్థిక పనితీరు ఏమాత్రం ప్రభావితం కాదని పతంజలి గ్రూపు తన రెగ్యులేటరీ ఫైలింగ్‌లో తెలిపింది. ఎడిబుల్ ఆయిల్, ఆహారం మరియు FMCG ఉత్పత్తులు PFL కింద లిస్ట్ కాబడిన స్వతంత్ర ఎంటిటీ అని పేర్కొంది.

పతంజలి ఫుడ్స్‌లో పతంజలి గ్రూప్‌కు దాదాపు 74 శాతం వాటా ఉంది. ఈ ప్రమోటర్ వాటాలో 32.37 శాతం షేర్ పతంజలి ఆయుర్వేద్‌ సొంతం. పతంజలి ఆయుర్వేదం ద్వారా వివిధ వ్యాధులకు చికిత్స చేస్తామని ప్రకటనలు చేయడంపై సుప్రీంకోర్డు మండిపడింది. తదుపరి ఉత్తర్వులు ఇచ్చే వరకు ఆ బ్రాండ్ ఉత్పత్తులను నిలుపుదల చేసింది.