Patanjali: బాబా రాందేవ్‌కు సుప్రీంకోర్టు వార్నింగ్.. ఆ పతంజలి ఉత్పత్తులపై కోటి చొప్పున జరిమానా..?

Patanjali: ఆయుర్వేద ఉత్పత్తులు విక్రయించే పతంజలి అధినేత, యోగా గురువు బాబా రాందేవ్ కు సుప్రీంకోర్టులో ఎదురుదెబ్బ తగిలింది. అల్లోపతి మందుల గురించి చేసిన వివాదాస్పద వ్యాఖ్యలపై ఆయన క్రిమినల్ కేసులు ఎదుర్కొంటున్నారు. ఈ క్రమంలో అత్యున్నత న్యాయస్థానం తీవ్ర హెచ్చరికలు జారీచేసింది.

పతంజలి తన ఆయుర్వేద ఉత్పత్తులకు సంబంధించిన ప్రకటనల్లో తప్పుడు వాదనలు చేయడంపై సుప్రీంకోర్టు అభ్యంతరం వ్యక్తం చేసింది. ఈ తరహా పద్ధతులను ఆశ్రయించినందుకు కంపెనీపై పెనాల్టీ విధిస్తామని హెచ్చరించింది. ప్రజలను తప్పుదోవ పట్టించే ప్రకటనలను అడ్డుకోవడానికి ప్రభుత్వం సిఫారసులను కోరింది.

కొవిడ్-19 వ్యాక్సినేషన్‌కు వ్యతిరేకంగా గ్రూప్ క్యాంపెయిన్ నిర్వహించారని ఆరోపిస్తూ బాబా రాందేవ్‌ పై IMA పిటిషన్ దాఖలు చేసింది. దీనిపై న్యాయమూర్తులు జస్టిస్ అహ్సానుద్దీన్ అమానుల్లా, జస్టిస్ ప్రశాంత్ కుమార్ మిశ్రాలతో కూడిన ధర్మాసనం విచారణ జరుపుతోంది. అయితే ఈ కేసులను రద్దు చేయాలని రాందేవ్ చేసిన విజ్ఞప్తిపై కేంద్రం, IMAలకు అత్యున్నత న్యాయస్థానం నోటీసులు జారీ చేసింది.

'పతంజలి ఆయుర్వేదంకు సంబంధించిన అన్ని తప్పుడు ప్రకటనలు వెంటనే నిలిపివేయాలి. అటువంటి ఉల్లంఘనలను ఈ న్యాయస్థానం చాలా సీరియస్‌గా తీసుకుంటుంది. ఒక నిర్దిష్ట వ్యాధిని నయం చేయగలదని తప్పుడు క్లెయిమ్ చేసిన ప్రతి ఉత్పత్తిపై 1 కోటి వరకు జరిమానా విధించడాన్ని కోర్టు పరిశీలిస్తుంది' అని బెంచ్ పేర్కొంది. తదుపరి కేసు విచారణను ఫిబ్రవరికి వాయిదా వేసింది.