SBI News: స్టేట్ బ్యాంక్‌పై సుప్రీం కోర్టు సీరియస్.. రేపే ఆఖరి గడువు..

Electoral Bonds: దేశంలో బీజేపీ సర్కార్ రాజకీయ పార్టీలకు అజ్ఞాత వ్యక్తులు డొనేషన్లను అందించేందుకు వీలుగా ఎలక్టోరల్ బాండ్లను ప్రవేశపెట్టింది. అయితే ఈ పద్ధతిపై ప్రారంభం నుంచి వ్యతిరేకత వస్తూనే ఉంది. తాజాగా ఈ విషయం కోర్టు మెట్లు ఎక్కిన సంగతి తెలిసిందే.

మార్చి 6లోగా ఎలక్టోరల్ బాండ్ డోనర్ వివరాలను ఎలక్షన్ కమిషన్ ఆఫ్ ఇండియాకి వెల్లడించనందుకు స్టేట్ బ్యాంక్ ఆఫ్ ఇండియాని సుప్రీంకోర్టు నేడు తీవ్రంగా తప్పుబట్టింది. ఏప్రిల్ 12, 2019 నుంచి అన్ని ఎలక్టోరల్ బాండ్ కొనుగోళ్ల వివరాలను ఈసీకి అందించడానికి గడువును పొడిగించాలని కోరుతూ ఎస్బీఐ చేసిన పిటిషన్‌ను విచారిస్తున్న క్రమంలో అత్యున్నత న్యాయస్థానం తీవ్రమైన పరిశీలనలు వచ్చాయి. ఐదుగురితో కూడిన న్యాయమూర్తుల ధర్మాసనం ఈ విషయంపై విచారణ చేపట్టింది.

గతంలో ఇచ్చిన గడువు సమయానికి వివరాలను అందించకుండా స్టేట్ బ్యాంక్ తాజాగా గడువు పొడిగింపు అడగుతూ కోర్టు ముందుకు రావటం చాలా తీవ్రమైన విషయంగా అత్యున్నత న్యాయస్థానం ఆగ్రహం వ్యక్తం చేసింది. తమ తీర్పు స్పష్టంగా ఉందని జస్టిస్ సంజీవ్ ఖన్నా అన్నారు. SBI తరపున హాజరైన సీనియర్ న్యాయవాది హరీష్ సాల్వే ప్రక్రియ అనామక స్వభావం కారణంగా విషయం సున్నితత్వాన్ని పేర్కొంటూ, మొత్తం సమాచారాన్ని క్రోడీకరించడానికి బ్యాంకుకు మరింత సమయం అవసరమని పేర్కొంది. దాతల వివరాల గోప్యత కారణంగా స్పెషల్ శాఖల వద్ద సీల్డ్ కవర్లలో ఉంచినట్లు కోర్టుకు తెలిపారు.

అయితే దీనిపై సీజేఐ చంద్రచూడ్ ఆగ్రహం వ్యక్తం చేస్తూ.. స్టేట్ బ్యాంక్ ఆఫ్ ఇండియా కోర్టు ఆదేశాలను ఎందుకు పాటించలేదని ప్రశ్నించారు. వివరాలను సీల్డ్ కవర్ నుంచి బయటకు తీసి అందించాలని జస్టిస్ ఖన్నా అన్నారు. ఫిబ్రవరి 15న సుప్రీంకోర్టు ఎలక్టోరల్ బాండ్ స్కీమ్ రాజ్యాంగ విరుద్ధమని కొట్టివేసింది. ఏప్రిల్ 12, 2019 నుంచి జరిగిన అన్ని ఎలక్టోరల్ బాండ్ కొనుగోళ్ల వివరాలను మార్చి 6లోగా ఈసీకి అందించాలని SBIని ఆదేశించింది. ఈ సమాచారాన్ని మార్చి 13లోగా ఈసీ వెబ్‌సైట్‌లో ప్రచురించాలని ఆదేశించింది. ఈ క్రమంలో ధర్మాసనం స్టేట్ బ్యాంక్ గడువు పొడిగింపు అభ్యర్థనను తిరస్కరిస్తూ.. రేపు పూర్తి వివరాలు అందించాల్సిందేనని తేల్చి చెప్పింది.