Layoffs News: లేఆఫ్స్‌పై గూగుల్ CEO పక్కా ఇన్ఫర్మేషన్.. కంపెనీలో ఈ ఏడాది జరిగేది ఇదే

Google News: హద్దులు లేకుండా పోతున్న లేఆఫ్స్ ఇంకెన్ని రోజులు కొనసాగుతాయో తెలియని పరిస్థితి నెలకొంది. దిగ్గజ కంపెనీల నుంచి స్టార్టప్స్ వరకు సడన్ లేఆఫ్స్‌తో ఉద్యోగులను ఏడిపిస్తున్నాయి. దీంతో ప్రస్తుతం పనిచేస్తున్నసిబ్బంది తమ వంతు ఎప్పుడోనని భయపడుతున్నారు. ఈ లేఆఫ్స్‌కు ఎప్పుడు ముగింపు లభిస్తుండా అని ఆతృతగా ఎదురుచూస్తున్నారు.

ప్రపంచవ్యాప్తంగా టాప్ టెక్ కంపెనీలు కూడా ఉద్యోగుల తొలగింపులు చేపడుతున్నాయి. అగ్ర IT దిగ్గజం గూగుల్ 2023లో వేలాది మంది సిబ్బందికి ఉద్వాసన పలికింది. తాజాగా దాని మాతృసంస్థ ఆల్ఫాబెట్ ఉద్యోగుల భయాన్ని రెట్టింపు చేసింది. తమ కంపెనీలో తొలగింపులు 2024లో కూడా ఓ క్రమ పద్ధతిలో కొనసాగిస్తామని తేల్చి చెప్పింది.

టెక్ దిగ్గజం అభివృద్ది వేగాన్ని మెరుగుపరచడానికి శ్రామిక శక్తిని తగ్గించడం కొనసాగిస్తుందని గూగుల్ CEO సుందర్ పిచాయ్ స్వయంగా వెల్లడించినట్లు పలు నివేదికలు చెబుతున్నాయి. ఉద్యోగుల్లో భయాందోళనలను పోగొట్టడానికి ఇటీవల కంపెనీ ఆల్ హ్యాండ్స్ సమావేశం నిర్వహించినట్లు సమాచారం. ఇందులో పలువురు సిబ్బంది సంధించిన ప్రశ్నలకు పిచాయ్ సమాధానం ఇచ్చినట్లు తెలుస్తోంది.

వర్క్‌ఫోర్స్‌ను మరింత తగ్గించాలనే కంపెనీ ఉద్దేశాన్ని గూగుల్ CEO ఇందులో ధ్రువీకరించారు. ఈ ఏడాది చివరి అర్ధభాగంలో లేఆఫ్స్ ప్రభావం తక్కువగా ఉంటుందని హామీ ఇచ్చారు. అంతేకాకుండా ఏడాది పొడవునా హెడ్‌కౌంట్ గ్రోత్‌ను నిర్వహించడంలో కంపెనీ చాలా క్రమశిక్షణతో పని చేస్తోందన్నారు. ఇటీవల బ్లూమ్‌బెర్గ్‌కి ఇచ్చిన ఇంటర్వ్యూలోనూ టీమ్స్‌ను సరళీకృతం చేసేందుకు, అధిక ప్రాధాన్యత ఉన్నచోట్ల ఉద్యోగుల కేటాయింపు కోసం కంపెనీ క్రమం తప్పకుండా లేఆఫ్స్‌ అమలు చేస్తున్నట్లు చెప్పుకొచ్చారు.