Market News: ఇథనాల్ తయారీపై కేంద్రం స్వీట్ డెసిషన్.. ఆ స్టాక్స్‌లో భారీ ర్యాలీ

Sugar stocks: ఇవాళ నష్టాలతో ప్రారంభమైన మార్కెట్లు క్రమేపీ గ్రీన్‌ లోకి మారాయి. ఇవాళ ర్యాలీని చక్కెర స్టాక్స్ ముందుండి నడిపిస్తున్నట్లు కనిపిస్తోంది. ఇందుకు కారణం కేంద్రం ప్రభుత్వం తీసుకున్న ఓ కీలక నిర్ణయమని అర్థమవుతోంది.

ఇథనాల్ ఉత్పత్తి చేసేందుకు చెరకు రసాన్ని ఉపయోగించకూడదని కేంద్రం గతంలో నిషేధం విధించింది. కాగా ఇప్పుడు ఆ ఆదేశాలను వెనక్కి తీసుకోవాలని ప్రభుత్వం నిర్ణయించినట్లు నివేదికలు వెలువడుతున్నాయి. దీంతో ఇవాళ షుగర్ స్టాక్స్ 10 శాతానికి పైగా పెరిగాయి. పర్యావరణ అనుకూల ఇంధన ఉత్పత్తి కోసం చెరకు రసం మరియు మొలాసిస్ రెండింటి వినియోగాన్ని అనుమతించడమ ద్వారా ఈ భారీ ర్యాలీ నమోదైనట్లు తెలుస్తోంది.

ఈ రంగంలోని ప్రముఖ ప్లేయర్స్ బలరాంపూర్ చినీ మిల్స్ మరియు శ్రీ రేణుకా షుగర్స్ వంటి కీలక సంస్థల స్టాక్స్ ప్రైస్ దాదాపు 7.5 శాతం పెరిగాయి. దాల్మియా భారత్ షుగర్ 6.5 శాతం, త్రివేణి ఇంజినీరింగ్ మరియు EID-Parry (ఇండియా) కూడా ఈ ర్యాలీలో భాగమయ్యాయి. ఇవి దాదాపు 5 శాతం మేర లాభాలను నమోదు చేశాయి.

బజాజ్ హిందుస్థాన్ షుగర్ 9.22 శాతం, ధంపూర్ షుగర్ మిల్స్ షేర్లు 8.22 శాతం, ద్వారికేష్ షుగర్ ఇండస్ట్రీస్ స్టాక్ 6.39 శాతం భారతీయ సర్కోజ్ 10.65 శాతం, మగద్ షుగర్ & ఎనర్జీ లిమిటెడ్ 6.56 శాతం లాభపడ్డాయి. ప్రభుత్వం తీసుకున్న తాజా నిర్ణయం చక్కెర ఉత్పత్తికి మరింత సౌలభ్యాన్ని అందిచే కీలక చర్యగా బల్‌రామ్‌పూర్ చినీ మిల్స్ MD వివేక్ సరయోగి అభివర్ణించారు.