హార్ముజ్ జలసంధిలో భారీ ఆయిల్ ట్యాంకర్ల పేలుళ్లు.. ప్రపంచ దేశాలకు పెరగనున్న చమురు సరఫరా ఆందోళనలు..

Strait of Hormuz: పశ్చిమాసియాలో యుద్ధ వాతావరణం మరింత భీకర రూపం దాల్చుతోంది. ప్రపంచ చమురు రవాణాకు అత్యంత కీలకమైన వ్యూహాత్మక హార్ముజ్ జలసంధి (Strait of Hormuz) గుండా రహస్యంగా ప్రయాణించేందుకు ప్రయత్నించిన రెండు భారీ చమురు ట్యాంకర్లు నావికా మందుపాతరలను (Naval Mines) ఢీకొని భారీ పేలుళ్లతో దగ్ధమయ్యాయి. ఈ ఘటన శుక్రవారం చోటుచేసుకున్నట్లు ఇరాన్ ఇస్లామిక్ రివల్యూషనరీ గార్డ్ కార్ప్స్ (IRGC) నావికాదళం అధికారికంగా ప్రకటించింది.

ఇరాన్ ప్రభుత్వ వార్తా సంస్థ ఐఆర్ఐబీ (IRIB) నివేదించిన వివరాల ప్రకారం.. ఆ రెండు నౌకలు తమ రాడార్, ఆటోమేటిక్ పొజిషనింగ్ వ్యవస్థలను (AIS) పూర్తిగా నిలిపివేసి.. ఇరాన్ సముద్ర అధికారుల అనుమతి లేకుండా అనధికారిక మార్గంలో ప్రయాణించేందుకు ప్రయత్నించాయి. ఈ క్రమంలో సముద్రంలో అమర్చిన మందుపాతరలను ఢీకొనడంతో భారీ విస్ఫోటనం సంభవించి మంటలు చెలరేగాయని ఐఆర్‌జీసీ స్పష్టం చేసింది.

ప్రమాదానికి గురైన నౌకలలో ఒకటి అత్యంత భారీ 'సూపర్ ట్యాంకర్' అని ఇరాన్ నౌకాదళం వెల్లడించింది. ఈ పేలుడు ధాటికి ఎగిసిపడిన మంటలు రాత్రి వేళ హార్ముజ్ జలసంధి దక్షిణ తీర ప్రాంతాలను సైతం ప్రకాశవంతం చేశాయని పేర్కొంది. ఈ ఘటన నేపథ్యంలో అంతర్జాతీయ షిప్పింగ్ కంపెనీలు, నౌకల యజమానులకు ఐఆర్‌జీసీ తీవ్ర హెచ్చరికలు జారీ చేసింది.

తమ ట్రాఫిక్ కంట్రోల్ సెంటర్‌తో ముందస్తు సమన్వయం చేసుకోకుండా, ఇరాన్ నిర్దేశించిన సముద్ర నిబంధనలను ఉల్లంఘిస్తూ హార్ముజ్ జలసంధిలో ప్రయాణించే సాహసం చేయవద్దని స్పష్టం చేసింది. ఇటీవలే ఇరాన్ అధ్యక్షుడు, అమెరికా అధ్యక్షుడు డొనాల్డ్ ట్రంప్ మధ్య మాటల యుద్ధం తారాస్థాయికి చేరిన తరుణంలో.. హార్ముజ్ జలసంధి తమ నియంత్రణలోనే ఉందని అమెరికా ప్రకటించిన కొద్ది రోజులకే ఈ దాడి జరగడం గమనార్హం.

Also Read

ఇరాన్‌లో భారీ పేలుళ్లు.. ఇక ఏ ఒక్కరూ మిగలరంటూ ట్రంప్ వార్నింగ్.. కమ్ముకున్న యుద్ధ మేఘాలు..

మరోవైపు ఇరాన్, అమెరికా, ఇజ్రాయెల్ మధ్య ప్రత్యక్ష సైనిక ఘర్షణలు మరింత విస్తరిస్తున్నాయి. ఇరాన్‌లోని హార్మోజ్‌గాన్ ప్రావిన్స్‌లో ఉన్న సిరిక్ (Sirik) ఓడరేవు పట్టణంలోని ఒక కీలక టెలికమ్యూనికేషన్స్ టవర్‌పై అమెరికా వైమానిక దాడులకు పాల్పడిందని టెహ్రాన్ ఆరోపించింది. దీనికి ప్రతీకారంగా బహ్రెయిన్‌లో ఉన్న అమెరికా సైనిక ముందస్తు హెచ్చరిక రాడార్ కేంద్రాన్ని (Early Warning Radar Site) తాము క్షిపణులతో ధ్వంసం చేశామని ఐఆర్‌జీసీ ఏరోస్పేస్ ఫోర్స్ సంచలన ప్రకటన చేసింది.

ప్రపంచ చమురు సరఫరాలో సుమారు 20 శాతం వాటా కలిగిన హార్ముజ్ జలసంధి వద్ద రెండు చమురు ట్యాంకర్లు పేలిపోవడం అంతర్జాతీయ ఇంధన మార్కెట్లలో తీవ్ర ప్రకంపనలు సృష్టిస్తోంది. ఇప్పటికే బ్యారెల్‌కు 95 డాలర్ల పైనే కొనసాగుతున్న బ్రెంట్ ముడిచమురు ధరలు, ఈ తాజా పరిణామంతో వంద డాలర్ల మార్కును దాటే ప్రమాదం ఉందని ఆర్థిక నిపుణులు ఆందోళన వ్యక్తం చేస్తున్నారు. నౌకాయాన భద్రత ప్రశ్నార్థకంగా మారడంతో అంతర్జాతీయ వాణిజ్య నౌకలు ప్రత్యామ్నాయ మార్గాలను అన్వేషిస్తున్నాయి.

డిస్క్లైమర్: ఈ వెబ్‌సైట్‌లోని అభిప్రాయాలు, సూచనలు పూర్తిగా వ్యక్తిగత విశ్లేషకులు లేదా ఇతర సంస్థలవి మాత్రమే. ఇవి Goodreturns.in లేదా Greynium Information Technologies Private Limited అధికారిక అభిప్రాయాలు కాదని గమనించగలరు.మేము ఈ విషయం యొక్క ఖచ్చితత్వం, సమగ్రత లేదా విశ్వసనీయతపై ఎటువంటి హామీ ఇవ్వడం కాని, అనుమతించడం కాని బాధ్యత వహించడం జరగదు. మేము ఎలాంటి పెట్టుబడి సలహా ఇవ్వము. అలాగే ఎటువంటి సెక్యూరిటీ కొనుగోలు లేదా అమ్మకాలు ప్రోత్సహించము. ఈ వెబ్‌సైట్‌లోని కథనం పూర్తిగా సమాచారం, విద్యా ప్రయోజనాల కోసమే అందించబడుతుంది. మీరు ఏదైనా పెట్టుబడి నిర్ణయం తీసుకునే ముందు, లైసెన్స్ పొందిన ఆర్థిక సలహాదారుల సహాయం తీసుకోండి. ఈ కథనాన్ని కేవలం సమాచారంగా మాత్రమే పరిగణించండి.