హార్ముజ్ జలసంధిపై ట్రంప్ కీలక ప్రకటన.. ఒమన్ దేశాన్ని మిస్సైల్స్‌తో పేల్చేస్తామంటూ వార్నింగ్..

మధ్యప్రాచ్యంలో భౌగోళిక రాజకీయ ఉద్రిక్తతలు సరికొత్త గరిష్ట స్థాయికి చేరుకున్నాయి. ప్రపంచ ఇంధన రవాణాకు అత్యంత కీలకమైన హార్ముజ్ జలసంధిని తిరిగి తెరిపించేందుకు అమెరికా సర్వశక్తులూ ఒడ్డుతోంది. ఇరాన్‌పై అమెరికా - ఇజ్రాయెల్ సంయుక్తంగా చేపట్టిన సైనిక చర్యల నేపథ్యంలో.. గత ఫిబ్రవరి నెలాఖరు నుండి ఇరాన్ ఈ కీలకమైన జలమార్గాన్ని దాదాపుగా మూసివేసింది. సాధారణంగా ప్రపంచవ్యాప్త చమురు సరఫరాలో ఐదో వంతు ఈ మార్గం గుండానే సాగుతుంది. దీని దిగ్బంధం వల్ల అంతర్జాతీయంగా తీవ్రమైన ఇంధన సంక్షోభం తలెత్తింది, ప్రపంచ ఆర్థిక వ్యవస్థ మందగించే ప్రమాదం ఏర్పడటంతో అన్ని దేశాల్లోనూ ఆందోళనలు వ్యక్తమవుతున్నాయి.

ఈ ఉత్కంఠభరిత వాతావరణంలో.. జలసంధి గుండా ప్రయాణించే ఓడలపై సంయుక్తంగా సుంకం (టారిఫ్) విధించేందుకు ఇరాన్ , ఒమన్ దేశాల మధ్య రహస్య చర్చలు జరుగుతున్నట్లు వార్తలు వచ్చాయి. అమెరికాకు సుదీర్ఘకాలంగా మిత్రదేశంగా ఉన్న ఒమన్‌ను తమ వైపు తిప్పుకుని, ఈ సుంకాల వసూలు యంత్రాంగానికి మద్దతు ఇచ్చేలా ఒప్పించాలని టెహ్రాన్ ప్రయత్నిస్తోందని ఒక ప్రాంతీయ అధికారిని ఉటంకిస్తూ అసోసియేటెడ్ ప్రెస్ ఇటీవల ఒక నివేదికను విడుదల చేసింది. ఈ పరిణామం వాషింగ్టన్‌కు తీవ్ర ఆగ్రహాన్ని తెప్పించింది.

ఈ నేపథ్యంలో నిర్వహించిన ఒక క్యాబినెట్ సమావేశంలో అమెరికా అధ్యక్షుడు డొనాల్డ్ ట్రంప్ అత్యంత నాటకీయమైన, కఠినమైన వ్యాఖ్యలు చేశారు. హార్ముజ్ జలసంధి అనేది పూర్తిగా అంతర్జాతీయ జలాల్లో భాగమని, దానిపై ఎవరికీ ఏకపక్ష నియంత్రణ ఉండే ప్రసక్తే లేదని ఆయన స్పష్టం చేశారు. మంగళవారం నాటి సమావేశంలో ఆయన మాట్లాడుతూ, ఈ జలసంధి ప్రపంచ దేశాలన్నింటికీ అందుబాటులో ఉండబోతోందని, దీనిని ఎవరూ తమ ఆధీనంలోకి తీసుకోలేరని ప్రకటించారు. అమెరికా సైన్యం ఈ ప్రాంతాన్ని నిరంతరం పర్యవేక్షిస్తుందని, ప్రస్తుత దౌత్యపరమైన చర్చలలో ఇది ఒక ముఖ్యమైన భాగమని ఆయన పేర్కొన్నారు.

Also Read

అమెరికా ఆటలు సాగవిక.. ఇజ్రాయెల్‌ను భూమ్మీద లేకుండా నాశనం చేస్తాం.. దాడుల తర్వాత ఇరాన్ స్ట్రాంగ్ వార్నింగ్..

అయితే, ఒమన్ దేశం ఇరాన్‌తో చేతులు కలపడంపై ట్రంప్ అసాధారణ రీతిలో స్పందించారు. ఒమన్ గనుక అంతర్జాతీయ నిబంధనల ప్రకారం మర్యాదగా ప్రవర్తించకపోతే, ఆ దేశాన్ని క్షిపణులతో పేల్చివేయడానికి కూడా వెనకాడబోమని ఆయన తీవ్ర హెచ్చరికలు జారీ చేశారు. ఒమన్‌కు తమ బలం ఏంటో తెలుసని, వారు లొంగి ఉంటే క్షేమంగానే ఉంటారని వ్యాఖ్యానించారు. ఇరాన్ ఈ జలసంధిని నియంత్రించాలని చూస్తోందని, కానీ అమెరికా దానికి ఎట్టిపరిస్థితుల్లోనూ ఒప్పుకోదని ఆయన నొక్కి చెప్పారు.

మరోవైపు, ఇరాన్‌తో ఒక శాంతి ఒప్పందాన్ని కుదుర్చుకోవడానికి ఇటీవలి వారాల్లో ట్రంప్ ప్రభుత్వం చేసిన ప్రయత్నాలు ఆశించిన ఫలితాలను ఇవ్వలేదు. బుధవారం నాటి సమావేశంలో ట్రంప్ నేరుగా ఇరాన్‌పై వ్యూహాత్మక ఆరోపణలు చేశారు. అమెరికాలో రాబోయే నవంబర్ మధ్యంతర ఎన్నికల వరకు ఎలాగైనా సమయాన్ని వృధా చేయాలని, ఒప్పందాన్ని ఆలస్యం చేస్తూ "నా కోసం వేచి చూడాలని" ఇరాన్ ప్లాన్ చేస్తోందని ఆయన విమర్శించారు. ఎన్నికల ఫలితాలను బట్టి తమ తదుపరి అడుగులు వేయాలని టెహ్రాన్ భావిస్తోందని ఆయన అభిప్రాయపడ్డారు.

ఇదే సమయంలో, అమెరికా అంతర్గత రాజకీయాల్లోనూ ఈ యుద్ధ వ్యూహంపై భిన్నాభిప్రాయాలు వ్యక్తమవుతున్నాయి. వారాంతంలో ఇరాన్‌తో ఒక మైత్రి ఒప్పందం అంచున ఉన్నామని ట్రంప్ సంకేతాలు ఇవ్వడం రిపబ్లికన్ పార్టీలోని కఠిన నిర్ణయాలు కోరుకునే యుద్ధోన్మాద నాయకులకు (War Hawks) నచ్చలేదు. ఇజ్రాయెల్‌తో కలిసి ఇరాన్‌పై యుద్ధానికి ఆదేశించాలన్న ట్రంప్ మునుపటి వివాదాస్పద నిర్ణయాన్ని గట్టిగా సమర్థించిన వారే, ఇప్పుడు ఆయనపై విమర్శలు గుప్పిస్తున్నారు.

ముఖ్యంగా సెనేట్ సాయుధ సేవల కమిటీకి అధ్యక్షత వహిస్తున్న రోజర్ వికర్ సోషల్ మీడియా ద్వారా తన అసంతృప్తిని బహిర్గతం చేశారు. ప్రస్తుతం ప్రచారంలో ఉన్న 60 రోజుల తాత్కాలిక కాల్పుల విరమణ ప్రతిపాదన ఒక పెద్ద విపత్తుగా మారుతుందని ఆయన హెచ్చరించారు. అమెరికా సైన్యం చేపట్టిన "ఆపరేషన్ ఎపిక్ ఫ్యూరీ" ద్వారా ఇప్పటివరకు సాధించిన సైనిక విజయాలన్నీ ఈ విరామం వల్ల బూడిదలో పోసిన పన్నీరవుతాయని, శత్రువుకు కోలుకునే అవకాశం ఇచ్చినట్లవుతుందని ఆయన ఆందోళన వ్యక్తం చేశారు. మొత్తమ్మీద, Strait of Hormuz చుట్టూ తిరుగుతున్న ఈ రాజకీయాలు అంతర్జాతీయంగా యుద్ధ మేఘాలను మరింత దట్టం చేస్తున్నాయి.