హార్ముజ్ జలసంధిపై ఇరాన్ సంచలన ప్రకటన.. అమెరికాతో మళ్లీ తీవ్రరూపం దాల్చే దిశగా యుద్ధం..

Strait of Hormuz Crisis: ప్రపంచ ఇంధన రవాణాకు జీవనాడి లాంటి హార్ముజ్ జలసంధిని (Strait of Hormuz) తిరిగి తెరవడానికి ఇరాన్ ప్రతిపాదించిన ఏడు షరతులకు అమెరికా పంపిన అధికారిక స్పందనను ఇరాన్ ఆదివారం తిరస్కరించింది. వాషింగ్టన్ అందించిన ప్రత్యుత్తరం స్పష్టత లేకుండా.. తమ ప్రధాన డిమాండ్లను దాటవేసేలా ఉందని పేర్కొన్న టెహ్రాన్, తమ కీలక షరతులు సంపూర్ణంగా నెరవేరే వరకు జలసంధిని తెరిచే ప్రసక్తే లేదని తేల్చిచెప్పింది. ఖతార్ మధ్యవర్తుల ద్వారా పంపిన ఈ ప్రతిపాదనలు విఫలం కావడంతో పశ్చిమాసియాలో దౌత్యపరమైన శాంతి ప్రయత్నాలకు మళ్లీ విఘాతం ఏర్పడింది.

ఇరాన్ సుప్రీం నేషనల్ సెక్యూరిటీ కౌన్సిల్ కార్యదర్శి, భద్రతా విభాగం అధిపతి అయిన మొహ్సెన్ రెజాయీ ప్రభుత్వ మీడియాతో మాట్లాడుతూ.. అమెరికా పంపిన నివేదిక 'కేవలం నామమాత్రం' అని అభివర్ణించారు. తమ ఏడు షరతుల్లో కొన్నింటిని ఆమోదిస్తున్నట్లు నటించిన వాషింగ్టన్, మౌలిక అంశాలలో అస్పష్టతను కొనసాగించిందని విమర్శించారు. ఇరాన్‌పై అమెరికా, ఇజ్రాయెల్‌లు దాడులకు పాల్పడక ముందు ప్రపంచవ్యాప్త ముడి చమురు ద్రవీకృత సహజ వాయువు (LNG) సరఫరాలో దాదాపు ఐదో వంతు ఈ వ్యూహాత్మక జలమార్గం నుంచే ప్రయాణించేది. ప్రస్తుత ఈ ప్రతిష్టంభన కారణంగా ఇంధన మార్కెట్లలో అనిశ్చితి మరింత పెరిగింది. జూన్ నెలలో కుదిరిన తాత్కాలిక అవగాహన ఒప్పందాన్ని పునరుద్ధరించాలనే అమెరికా ఆశలకు ఇరాన్ గట్టి ఎదురుదెబ్బ తీసింది.

ఈ జలసంధి సంక్షోభంతో పాటు తమ అణు కార్యక్రమంపై అమెరికాతో ఎలాంటి సమాంతర చర్చలు జరపడం లేదని ఇరాన్ విదేశాంగ శాఖ స్పష్టం చేసింది. తమ దేశానికి ఆమోదయోగ్యం కాని నిబంధనలను అమెరికా బలవంతంగా రుద్దే ప్రయత్నం చేస్తోందని, కానీ ఆంక్షల తొలగింపు, జలసంధి భద్రతే తమ ప్రధాన అజెండా అని ప్రతినిధి ఇస్మాయిల్ బఘాయీ స్పష్టం చేశారు. ఇస్లామాబాద్ ఒప్పందాల ఆధారంగా ప్రతిపాదించిన ఏడు షరతులకు వాషింగ్టన్ కట్టుబడనంత వరకు రవాణాకు అనుమతించేది లేదని పార్లమెంట్ స్పీకర్ మొహమ్మద్ బాఖేర్ ఖాలిబాఫ్ కూడా పునరుద్ఘాటించారు.

Also Read

అమెరికా–ఇరాన్ యుద్ధానికి బ్రేక్.. దాడులు ఆపేస్తున్నామంటూ ట్రంప్ సంచలన ప్రకటన..

ఇదిలా ఉండగా నవంబర్ 3న జరగనున్న అమెరికా కాంగ్రెస్ మధ్యంతర ఎన్నికలను దృష్టిలో ఉంచుకుని ఇరాన్ వ్యూహాత్మకంగా వ్యవహరిస్తోందని అమెరికా అధ్యక్షుడు డొనాల్డ్ ట్రంప్ సంచలన వ్యాఖ్యలు చేశారు. క్లార్క్స్‌విల్లే ప్రచార సభలో ట్రంప్ మాట్లాడుతూ.. ఇరాన్ తన రాజకీయ సవాలును పెంచడానికి ఎన్నికల ముందే మరింత దూకుడు ప్రదర్శిస్తున్నట్లు కనిపిస్తోందని, కానీ అమెరికా తన దిగ్బంధనాన్ని కొనసాగిస్తూనే ఇరాన్‌ను అణ్వాయుధ దేశంగా మారనివ్వదని స్పష్టం చేశారు.

ఒకవేళ దౌత్య మార్గాలను పక్కన పెట్టి అమెరికా మళ్లీ సైనిక చర్యలకు సిద్ధపడితే.. తాము దానికి తగిన రీతిలో జవాబిస్తామని ఇరాన్ విదేశాంగ మంత్రి అబ్బాస్ అరాఘ్చి హెచ్చరించారు. శత్రువుల నుంచి ఆత్మరక్షణ చేసుకోవడానికి తమ వద్ద తగినన్ని క్షిపణులు అందుబాటులో ఉన్నాయని, అవసరమైతే వాటి పరిధిని మరింత పెంచుతామని సైనిక ప్రతినిధి మొహమ్మద్ అక్రమినియా స్పష్టం చేయడంతో ప్రాంతీయ ఉద్రిక్తతలు పరాకాష్టకు చేరాయి.