బడ్జెట్‌ను మార్కెట్ స్వాగతించింది, ఇలా మొదటిసారి: నిర్మలా సీతారామన్

స్టాక్ మార్కెట్లు కేంద్ర బడ్జెట్ 2021-22 బడ్జెట్‌ను స్వాగతించాయని కేంద్ర ఆర్థికమంత్రి నిర్మలా సీతారామన్ అన్నారు. బడ్జెట్ అనంతరం గతవారం సూచీలు ఏకంగా 11 శాతం మేర లాభపడ్డాయని గుర్తు చేశారు. కేంద్ర బడ్జెట్‌ పట్ల స్టాక్ మార్కెట్ సానుకూలంగా స్పందించిందన్నారు. ఈ నెల ఒకటో తేదీన ప్రతిపాదించిన బడ్జెట్ ప్రయివేటు రంగం మరింత స్వేచ్ఛాయుతంగా పని చేసేందుకు వీలుకల్పించడంతోపాటు వ్యయాలపై స్పష్టతనిచ్చిందని, ఏయే రంగాలకు ప్రభుత్వం దూరంగా ఉండగలదనేది తెలిపిందన్నారు.

ఈ ప్రకటనలను సానుకూలంగా స్వీకరించిన మార్కెట్లు వారంలో మొత్తం అన్ని ట్రేడింగ్ సెషన్లలోను మంచి లాభాలతోనే నడిచాయన్నారు. అయితే మొన్నటి వరకు మార్కెట్లు భారీ లాభాలు చూసినప్పటికీ, నిన్న, నేడు ప్రాఫిట్ బుకింగ్ వల్ల అతి స్వల్పంగా నష్టపోయాయి.

బడ్జెట్ ప్రవేశపెట్టి నేటికి దాదాపు పది రోజులు అవుతుందని, కానీ బడ్జెట్ తర్వాత వరుసగా వారం పాటు సెషన్లు భారీగా లాభపడటం ఇదే మొదటిసారి అని తెలిపారు. గతంలో మార్కెట్లు ఏదో కొద్ది గంటల పాటు పైపైకి లేచేవని, ఆ తర్వాత యథాతథంగా ఉండేవని అభిప్రాయపడ్డారు. కానీ ఇప్పుడు ఈక్విటీ మార్కెట్లు జోరు మీద ఉన్నాయన్నారు.