Stock Market: రిలయన్స్ దెబ్బకు మార్కెట్ ఢమాల్.. సెన్సెక్స్ 770 పాయింట్లు ఆవిరి..

Stock Market Closing Bell: ప్రపంచ వృద్ధి ఆందోళనలు ఇన్వెస్టర్ల సెంటిమెంట్‌పై ప్రభావం చూపడంతో ఈరోజు ఈక్విటీ, కమోడిటీలు పడిపోయాయి. వారం ప్రారంభంలోనే వీక్లీ ఎక్స్ పైరీ కూడా కొంత మార్కెట్లపై ప్రభావాన్ని చూపింది. ఇదే సమయంలో భారత Q1FY23 జీడీపీ అంచనాలను చేరుకోకపోవటం మార్కెట్లపై ప్రభావాన్ని చూపింది. ఆగస్ట్‌లో తయారీ రంగం పనితీరు తగ్గుదల కూడా ఆందోళనకు కారణంగా నిలిచింది.

రిలయన్స్ షేర్ల పతనం..

ఉదయం ఆరంభంలోనే మార్కెట్లు నష్టాలతో ఆరంభమయ్యాయి. ఈ క్రమంలో మార్కెట్లు ముగిసే సమయానికి సెనెక్స్ సూచీ ఏకంగా 770 పాయింట్లను కోల్పోయింది. ఇదే సమంయలో నిఫ్టీ 216 పాయింట్లు నష్టపోయింది. ప్రధానంగా రిలయన్స్ ఇండస్ట్రీస్ షేర్ల పతనం మార్కెట్లను తీవ్రంగా ప్రభావితం చేసింది. ఈ కారణంగా సెన్సెక్స్ సూచీ దాదాపు 30 శాతం నష్టపోవటానికి కారణమైంది.

నష్టపోయిన స్టాక్స్..

ఈ రోజు మార్కెట్లలో ప్రధానంగా.. TCS, సన్ ఫార్మా, టెక్ మహీంద్రా, HUL, ఇన్ఫోసిస్, NTPC, HDFC, బజాజ్ ఫైనాన్స్, టాటా స్టీల్, పవర్ గ్రిడ్, ICICI బ్యాంక్ షేర్లు నష్టాలను చవిచూశాయి. ఈ షేర్లన్నీ ఒక్కొక్కటి 1.5 శాతానికి పైగా పడిపోయాయి. దాదాపుగా అనేక టెక్ కంపెనీలు మార్కెట్ ట్రేడింగ్ సమయంలో నష్టాలను చవిచూశాయి.

ఇతర సూచీల పరిస్థితి..

ట్రేడింగ్ ముగిసే సమయానికి నిఫ్టీ బ్యాంక్ సూచీ 235 పాయింట్లు కోల్పోయింది. నిఫ్టీ మిడ్ క్యాప్ మాత్రం స్పల్పంగా లాభపడి 34 పాయింట్లు లాభపడింది. నిఫ్టీ రియాల్టీ సూచీ 1 శాతం, నిఫ్టీ PSU బ్యాంక్ ఇండెక్స్ 0.7 శాతం లాభపడింది. నిఫ్టీ ఐటీ ఇండెక్స్ 1.9 శాతం, నిఫ్టీ ఫార్మా ఇండెక్స్ 1.12 శాతం క్షీణించాయి.

గ్లోబల్ కారణాలు..

అధిక వడ్డీ రేట్లు, దూసుకుపోతున్న ఆర్థిక మాంద్యం భయాల కారణంగా యూరోపియన్, అమెరికా మార్కెట్లు సైతం తీవ్ర ఒడిదొడుకుల్లో ఉన్నాయి. ఈ క్రమంలో బంగారం ధరలు మాత్రం భారీగా పడిపోతున్నాయి. ప్రస్తుతం ధరలు నాలుగు నెలల కనిష్ఠాలకు చేరుకున్నాయి.