IPO News: మార్కెట్లోకి వస్తున్న మరో ఐపీవో.. స్టాక్ ప్రైస్ బ్యాండ్ విడుదల.. త్వరపడండి..

Doms Industries IPO: డిసెంబర్ మాసంలో ఐపీవోల నుంచి మంచి డబ్బు సంపాదించాలనుకునే వ్యక్తులకు మంచి అవకాశం వచ్చింది. తాజాగా డిసెంబర్ 13న కొత్త ఐపీవో ఇన్వెస్టర్ల కోసం తెరుచుకుంటుంది.

ఇప్పుడు మనం మాట్లాడుకోబోతోంది డోమ్స్ ఇండస్ట్రీస్ ఐపీవో గురించే. కంపెనీ ప్రస్తుతం స్టేషనరీ, ఆర్ట్ ఉత్పత్తుల తయారీ వ్యాపారంలో ఉంది. తాజాగా డోమ్స్ తన ఐపీవో షేర్ ప్రైస్ బ్యాండ్ రూ.750-790గా నిర్ణయించింది. ఈ నెలలో ప్రారంభమౌతున్న తొలి ఐపీవో కావటం విశేషం. కంపెనీ ఐపీవో డిసెంబర్ 13 నుంచి డిసెంబర్ 15 వరకు అందుబాటులో ఉండనుంది. యాంకర్ ఇన్వెస్టర్ల కోసం ఐపీవో డిసెంబర్ 12న తెరవబడుతోంది.

తాజా ఐపీవో ద్వారా కంపెనీ స్టాక్ మార్కెట్ల నుంచి రూ.1,200 కోట్లను సమీకరించాలని లక్ష్యంగా పెట్టుకుంది. అయితే ఈ మెుత్తంలో రూ.350 కోట్లు తాజా ఈక్విటీ షేర్ల జారీ ఉంటుండగా.. మిగిలిన రూ.850 కోట్లను ఆఫర్ ఫర్ సేల్ రూపంలో కంపెనీ ఐపీవోలో విక్రయిస్తోంది. ఈ క్రమంలో ఇటలీకి చెందిన కార్పొరేట్ ప్రమోటర్ FILA కంపెనీలోని తన రూ.800 కోట్ల వాటాను ఆఫర్ ఫర్ సేల్ కింద అమ్ముతుండగా.. ప్రమోటర్లు సంజయ్ మన్సుఖ్లాల్ రజనీ, కేతన్ మన్సుఖ్లాల్ రజనీలు రూ.25 కోట్ల విలువైన షేర్లను ఆఫ్‌లోడ్ చేస్తున్నారు.

తాజా ఐపీవోలో కంపెనీ తన ఉద్యోగుల కోసం రూ.5 కోట్ల విలువైన షేర్లను రిజర్వు చేసింది. అలాగే వారికి ఒక్కో షేరును రూ.75 తగ్గింపుతో అందిస్తోంది. ఎఫ్‌వై23లో 12 శాతం మార్కెట్ వాటాతో దేశంలో డోమ్స్ రెండవ అతిపెద్ద బ్రాండెడ్ స్టేషనరీ ఉత్పత్తుల తయారీ కంపెనీగా కొనసాగుతోంది. ఈ క్రమంలో రైటింగ్ ఇన్‌స్ట్రుమెంట్స్, వాటర్ కలర్ పెన్నులు, మార్కర్‌ల కోసం ఉత్పత్తి సామర్థ్యాలను విస్తరించడానికి కొత్త తయారీ యూనిట్ ఏర్పాటుకు కంపెనీ తాజా ఐపీవో నిధులను వినియోగించాలని చూస్తోంది.

గుజరాత్ కు చెందిన కంపెన తాజా ఐపీవోలో లాట్ పరిమాణాన్ని 18 షేర్లుగా నిర్ణయించింది. ఇందుకోసం ఇన్వెస్టర్లు కనీసం రూ.14,220 పెట్టుబడిగా పెట్టాల్సి ఉంది. మార్చి FY23తో ముగిసిన సంవత్సరానికి నికర లాభం 567.2 శాతం పెరిగి రూ.95.8 కోట్లకు చేరుకుంది. అదే కాలంలో కార్యకలాపాల ద్వారా వచ్చే ఆదాయం 77.3 శాతం పెరిగి రూ.1,212 కోట్లకు చేరుకుంది.