ఫిక్స్డ్ డిపాజిట్ వడ్డీ రేట్లు తగ్గించిన స్టేట్ బ్యాంక్ ఆఫ్ ఇండియా

ప్రభుత్వరంగ స్టేట్ బ్యాంక్ ఆఫ్ ఇండియా(SBI) ఫిక్స్డ్ డిపాజిట్లపై వడ్డీ రేట్లను సవరించింది. ఏడాది నుండి రెండేళ్ల లోపు ఫిక్స్డ్ డిపాజిట్లపై వడ్డీ రేటును 0.20 శాతానికి లేదా 20 బేసిస్ పాయింట్లు తగ్గించింది. ఏడాది నుండి రెండేళ్ల కాల పరిమితి కలిగిన ఫిక్స్డ్ డిపాజిట్లపై వడ్డీ రేటు గతంలో 5.10 శాతంగా ఉంది. ఇప్పుడు దానిని 4.90 శాతానికి తగ్గించింది. సీనియర్ సిటిజన్లకు సంబంధించిన వడ్డీ రేటును 5.60 శాతం నుండి 5.40 శాతానికి తగ్గించింది.

ఫిక్స్డ్ డిపాజిట్లపై వడ్డీరేటు తగ్గింపు నిర్ణయం ఈనెల 10వ తేదీ నుండి అమలులోకి వచ్చినట్లు ఎస్బీఐ వెల్లడించింది. సవరించిన వడ్డీ రేట్లు ఫ్రెష్ డిపాజిట్లు, పరిపక్వ డిపాజిట్ల పునరుద్ధరణకు వర్తిస్తాయని తెలిపింది. స్టేట్ బ్యాంక్ ఆఫ్ ఇండియా అంతకుముందు మే నెలలో ఫిక్స్డ్ డిపాజిట్లపై వడ్డీ రేట్లను సవరించింది.

స్టేట్ బ్యాంక్ ఆఫ్ ఇండియా ఫిక్స్డ్ డిపాజిట్ వడ్డీ రేట్లను 7-45 రోజుల కాలపరిమితిపై 2.9 శాతాన్ని అందిస్తోంది. 46 రోజుల నుండి 179 రోజుల కాలపరిమితిపై 3.9 శాతం వడ్డీరేటు అందిస్తోంది. 180 రోజుల నుండి ఏడాది కాలపరిమితిపై 4.4 శాతం అందిస్తోంది. ఏడాది నుండి 2 ఏళ్ల కాలపరిమితిపై 4.9 శాతం అందిస్తోంది. రెండేళ్ల నుండి మూడేళ్ల కాలపరిమితిపై 5.1 శాతం, మూడేళ్ల నుండి ఐదేళ్ల కాలపరిమితిపై 5.3 శాతం, ఐదేళ్ల నుండి పదేళ్ల కాలపరిమితిపై 5.4 శాతం వడ్డీ రేటును అందిస్తోంది.