2000 Notes: రూ.2000 నోట్లు మార్చుకునేవారికి SBI సూపర్ అవకాశం.. మిస్ కాకండి..!

2000 Notes: భారతీయ రిజర్వు బ్యాంక్ దేశంలో చలామణిలో ఉన్న రూ.2000 నోట్లను ఉపసంహరించుకున్నట్లు ప్రకటించింది. దీంతో నోట్లు కలిగి ఉన్న అనేక మంది వాటిని మార్చుకునేందుకు ఉన్న మార్గాల గురించి అన్వేషిస్తున్నారు.

ఈ క్రమంలో స్టేట్ బ్యాంక్ ఆఫ్ ఇండియా దేశవ్యాప్తంగా ఉన్న తమ బ్యాంక్ శాఖల్లో రూ.2000 నోట్లను మార్చుకునేందుకు సదవకాశాన్ని కల్పిస్తోంది. ఇందుకోసం మీరు స్టేట్ బ్యాంక్ ఖాతాదారుడు కాకపోయినా ఎలాంటి ఇబ్బంది లేదు. స్టేట్ బ్యాంక్ తీసుకొచ్చిన ఈ సదవకాశం నోట్లను మార్చుకోవటం సులభతరం చేయనుందని తెలుస్తోంది.

ఒక వ్యక్తి రోజుకు గరిష్ఠంగా రూ.20,000 వరకు విలువవైన రెండు వేల నోట్లను మార్చుకునేందుకు పరిమితిగా ఉంది. ఎటువంటి ఫారమ్‌లు లేదా గుర్తింపు పత్రాలు అవసరం లేకుండానే తమ బ్యాంకు బ్రాంచ్ లలో నోట్లను ప్రజలు ఉచితంగా మార్చుకోవచ్చని దేశంలో అతిపెద్ద ప్రభుత్వ బ్యాంక్ స్టేట్ బ్యాంక్ ఆఫ్ ఇండియా వెల్లడించింది. ఇందుకోసం మే 23, 2023 నుంచి RBI బ్యాంక్ శాఖలు లేదా రీజినల్ ఆఫీసులను సంప్రదించాలని ప్రజలను కోరింది.

సాధారణ బ్యాంకింగ్ పద్ధతి ప్రకారం రూ.2000 నోట్ల డిపాజిట్ కొనసాగించవచ్చని స్టేట్ బ్యాంక్ వెల్లడించింది. అలాగే అధీకృత RBI కార్యాలయాలు లేదా బ్యాంక్ శాఖలలో నోట్లను డిపాజిట్ చేయడానికి లేదా మార్చుకోవడానికి ప్రజలకు సెప్టెంబర్ 30, 2023 వరకు సమయం ఉంది. మే 19, 2023న క్లీన్ నోట్ పాలసీలో భాగంగా రూ.2000 నోట్లను వెనక్కి తీసుకుంటున్నట్లు భారతీయ రిజర్వు బ్యాంక్ వెల్లడించింది.