SBI Loan: కార్, హోమ్ లోన్లపై స్టేట్ బ్యాంక్ భారీ తగ్గింపులు.. ఎప్పటి వరకంటే..??

SBI Loan: పండుగకు చాలా మంది భారతీయులు కొత్త ఇల్లు, కొత్త కారు కొనుక్కోవాలని ప్లాన్ చేస్తుంటారు. అలాంటి వారికి ప్రభుత్వ యాజమాన్యంలోని స్టేట్ బ్యాంక్ ఆఫ్ ఇండియా భారీ ఆఫర్లతో స్వాగతం పలుకుతోంది.

దేశంలో పండుగల సీజన్ క్యాష్ చేసుకునేందుకు కారు, గృహ రుణాలపై ఎస్బీఐ మంచి ఆఫర్లను అందిస్తోంది. ముందుగా కార్ లోన్ తీసుకునే వారికి ప్రాసెసింగ్ ఫీజును సున్నా రూపాయిలుగా ప్రకటించింది. ఫెస్టివల్ ఆఫర్ కింద జనవరి 31, 2024 వరకు ఈ తగ్గింపు అందుబాటులో ఉంటుందని ఎస్బీఐ ప్రకటించింది. ఆటో లోన్‌లు తక్కువ వడ్డీ రేట్లకు తక్షణ సూత్రప్రాయ ఆమోదంతో 100 శాతం వరకు ఫైనాన్సింగ్‌ అందిస్తోంది. వివిధ వాహన కంపెనీలకు ప్రత్యేక ఆఫర్లను సైతం స్టేట్ బ్యాంక్ అందుబాటులో ఉంచింది.

ఇదే సమయంలో గృహ రుణాలు పొందేవారికి ప్రత్యేక తగ్గింపులను ప్రకటించింది. SBI గరిష్టంగా 65 బేసిస్ పాయింట్ల వరకు రుణ వడ్డీ తగ్గింపును ఆఫర్ చేస్తోంది. అయితే ఈ ప్రత్యేక తగ్గింపు డిసెంబర్ 31, 2023 వరకు వర్తిస్తుందని ప్రకటించింది. అయితే ఈ ఆఫర్ రుణం పొందాలనుకుంటున్న వ్యక్తి CIBIL స్కోర్‌తో ముడిపడి ఉంటుందని బ్యాంక్ ప్రకటించింది. అంటే అధిక క్రెడిట్ స్కోర్ ఉన్న వ్యక్తులకు ఇది ప్రయోజనకరంగా ఉండనుంది. అలాగే 700 పాయింట్ల కంటే ఎక్కువ సిబిల్ స్కోర్ కలిగిన వ్యక్తులు అదనంగా 20 బేసిస్ పాయింట్ల మేర వడ్డీ రాయితీని పొందవచ్చని బ్యాంక్ ప్రకటించింది. బిల్డర్లతో అనుసంధానించబడిన ప్రాజెక్ట్‌లు కూడా అదనంగా 5 బేసిస్ పాయింట్ల వడ్డీ రాయితీ అందుబాటులో ఉంది.

అలాగే పండుగ సమయంలో స్టేట్ బ్యాంక్ తన డెబిట్, క్రెడిట్ కార్డు వినియోగదారులకు సైతం ప్రత్యేక ఆఫర్లను అందిస్తోంది. ఫ్లిప్‌కార్ట్, అమెజాన్‌ తో పాటు అనేక షాపింగ్ సైట్లలో 10 శాతం వరకు ప్రత్యేక తగ్గింపులను అందిస్తోంది.