ఆఫీస్‌కు రండి లేదా ఉద్యోగం మానేయండి: ఉద్యోగులకు ఎలాన్ మస్క్ అల్టిమేటం

కరోనా నేపథ్యంలో రెండేళ్లుగా వర్క్ ఫ్రమ్ హోమ్ నడుస్తోంది. అయితే ఐటీ సహా వివిధ రంగాలు ఉద్యోగులను క్రమంగా ఆఫీస్‌లకు రప్పిస్తున్నాయి. ఇందులో భాగంగా టెస్లా కూడా తమ ఉద్యోగులను కార్యాలయాలకు రావాల్సిందిగా హుకూం జారీ చేసింది. వర్క్ ఫ్రమ్ హోమ్ చాలని, ఇక ఆఫీస్‌లకు రావాలని టెస్లా అధినేత ఎలాన్ మస్క్ ఉద్యోగులకు తేల్చి చెప్పారు. తమ కంపెనీలో వర్క్ ప్రమ్ హోమ్ ఆమోదయోగ్యం కాదన్నారు. ఈ మేరకు ఈ-మెయిల్ పంపించారు.

కార్యాల‌యాల‌కు రావడం ఇష్టంలేని ఉద్యోగులు టెస్లాను విడిచిపెట్టి వెళ్లాల‌ని సూచించారు. ఆఫీస్‌కు రండి లేదా ఉద్యోగం వదిలేయండి అని నిక్కచ్చిగా చెప్పేశారు. రిమోట్ వర్క్ మోడ్‌ను ఎంచుకునేవారు ఎవరైనా వారానికి కనీసం 40 గంటలు కార్యాలయంలో ఉండాలన్నారు. లేదంటే టెస్లా నుండి వెళ్లిపోవచ్చునని అధికారిక ఈ-మెయిల్ ద్వారా తెలిపారు.

కార్యాలయంలో కనీస గంటలు పని చేయలేని అసాధారణ వ్యక్తులను మాత్రం తాను స్వయంగా సమీక్షించి, అనుమతి ఇస్తానని తెలిపారు. ఆఫీస్ అంటే టెస్లా ప్రధాన కార్యాలయమని, ఏ ఇతర శాఖ కార్యాలయం కాదన్నారు. కాగా, స్పేస్ ఎక్స్‌ను ప్రారంభించిన తొలినాళ్ల‌లో అక్క‌డి ఇంట‌ర్న్స్ కొంద‌రు కాఫీ షాపు ముందు వరుస క‌ట్ట‌డం చూసిన మ‌స్క్ వారిపై మండిపడ్డారట. ఉద్యోగుల కదలికలను గుర్తించేందుకు ఎక్కడికక్కడ సీసీ కెమెరాలు ఏర్పాటు చేశారట.