కనీసం చమురు కొనలేని పరిస్థితి, ఆర్థిక పరిస్థితి కుప్పకూలింది: శ్రీలంక ప్రధాని

తమ దేశ ఆర్థిక పరిస్థితి పూర్తిగా కుప్పకూలిందని, కనీసం నూనెలు కూడా కొనుగోలు చేయలేని పరిస్థితిల్లో ఉన్నామని శ్రీలంక ప్రధాని విక్రమ్ సింఘె అన్నారు. ఆహారం, చమురు, విద్యుత్ కొరత కొన్ని నెలలుగా ఉందని, దీంతో ఆర్థిక వ్యవస్థ తీవ్రంగా దెబ్బతిన్నదని చెప్పారు. ఇప్పటి వరకు అప్పులతో నెట్టుకు వచ్చిన ఆ దేశానికి ఇప్పుడు ఆ మార్గాలు కూడా మూసుకుపోతున్నాయి.

ఈ విషయాన్ని కూడా రణిల్ విక్రమ్ సింఘె స్వయంగా చెప్పారు. ఆహారం, ఇంధనం, విద్యుత్ కొరతతో ఇబ్బందులు పడుతున్న తమ దేశ ఆర్థిక వ్యవస్థ పూర్తిగా కుప్పకూలిందని బుధవారం పార్లమెంటును ఉద్దేశించి ప్రసంగించారు. తమ దేశ పెట్రోలియం కార్పోరేషన్ భారీ అప్పుల్లో కూరుకుపోయిందని ఆవేదన వ్యక్తం చేశారు. దీంతో నగదు చెల్లించి కూడా ఇంధనాన్ని దిగుమతి చేసుకునే పరిస్థితి లేదన్నారు.

దేశ ఆర్థిక పరిస్థితిని గాడిన పెట్టే అవకాశాన్ని ప్రభుత్వం కోల్పోయిందని ఆందోళన వ్యక్తం చేశారు. ఆర్థిక వ్యవస్థ అత్యంత దయనీయ స్థితికి చేరే సూచనలు కనిపిస్తున్నాయన్నారు. ఈ సందర్భంగా భారత్ 4 బిలియన్ డాలర్ల క్రెడిట్ లైన్ కింద ఇచ్చిన ఆపన్న హస్తంను ప్రస్తావించారు. మరింత సాయం చేయాలని కోరారు. భారత్ సాయానికి కూడా కొన్ని పరిమితులు ఉంటాయని, వారు ఎంత కాలం సాయం చేయగలరన్నారు.