రెండు నెలలుగా అలీబాబా జాక్‌మా మిస్సింగ్!

చైనా కుబేరుడు జాక్ మా నేతృత్వంలోని అలీబాబాకు వరుస షాక్‌లు తగులుతున్నాయి. జాక్ మాతో పాటు అతని ఫైనాన్షియల్ సామ్రాజ్యాన్ని గత కొద్ది రోజులుగా చైనీస్ అధికారులు టార్గెట్ చేస్తున్నారు. అలీబాబా గుత్తాధిపత్య నిబంధనల కింద దర్యాఫ్తుకు కూడా ఆదేశించాయి. ఇటీవల యాంట్ గ్రూప్, అనుబంధ సంస్థలపై దర్యాఫ్తు చేస్తున్నాయి. వివిధ కారణాలు చూపించి యాంట్ గ్రూప్ అతిపెద్ద ఐపీవోకు షాక్ తగిలింది. అంతేకాదు, అలీబాబా అధినేత జాక్ మా గత రెండు నెలలుగా బయటకు కనిపించకపోవడం ఇప్పుడు చర్చనీయాంశంగా మారింది.

జాక్ మా దాదాపు రెండు నెలలుగా ఎక్కడికి వెళ్లాడు, ఏమైపోయాడో తెలియని పరిస్థితి!! ఆయన బయటి ప్రపంచానికి కనబడి రెండు నెలలు అవుతోందట. గత ఏడాది అక్టోబర్ నెలలో చైనా ప్రభుత్వ ఆర్థిక విధానాలపై, బ్యాంకు రెగ్యులేటరీపై ఆయన చేసిన వ్యాఖ్యలు దుమారం రేపాయి. దీంతో అతనిని డ్రాగన్ దేశ ప్రభుత్వం టార్గెట్ చేసిందనే వాదనలు ఉన్నాయి.

ఆయన వ్యాపారాలపై విచారణలకు ఆదేశాలు జారీ చేశాయి. ఆ తర్వాత ఆయన బయట కనిపించకుండా పోయారు. జాక్ మా స్వయంగా నిర్వహించే ఆఫ్రికన్ బిజినెస్ హీరోస్ అనే టాలెంట్ షోలో పాల్గొనవలసి ఉంది. ఆయన తరఫున అలీబాబా ఎగ్జిక్యూటివ్ పాల్గొన్నారు.