Market Timings: మార్కెట్ ఇన్వెస్టర్లకు కీలక వార్త.. ట్రేడింగ్ వేళలను పెంచనున్న SEBI..

Market Timings: భారత స్టాక్ మార్కెట్ల రేంజ్ పెరిగింది. మార్కెట్లలోకి లక్షల సంఖ్యలో కొత్త ఇన్వెస్టర్లు వచ్చి చేరారు. మార్కెట్ల పరిమాణం గతంలో కంటే చాలా పెరిగింది. ఇది నిజంగా భారత ఆర్థిక వ్యవస్థకు పెద్ద ఊతం ఇచ్చే అంశం. ఇలాంటి తరుణంలో స్టాక్ మార్కెట్ వేళలను మార్కెట్ రెగ్యులేటరీ సెబీ పెంచనున్నట్లు తెలుస్తోంది.

ఈక్విటీ మార్కెట్స్..

ప్రస్తుతం దేశీయ స్టాక్ మార్కెట్లు ఉదయం 9.15 గంటలకు ప్రారంభమై సాయంత్రం 3.30 గంటలకు మూతపడుతున్నాయి. అయితే రానున్న కాలంలో ఈ ట్రేడింగ్ వేళలను పొడిగించటంపై గత కొన్ని వారాలుగా స్టేక్ హోల్డర్లతో చర్చలు జరుపుతోంది. అయితే విడతల వారీగా ట్రేడింగ్ వేళలను సెబీ పొడిగించవచ్చని సమాచారం. మెుదటి విడతగా ఈక్వీటీ మార్కెట్ల ట్రేడింగ్ వేళలను సాయంత్రం 5 గంటల వరకు పొడిగించనున్నట్లు తెలుస్తోంది.

F&O ట్రేడింగ్..

రానున్న కాలంలో సెబీ ఎన్ఎస్ఈ ఆప్షన్ ట్రేడింగ్ మార్కెట్లను రాత్రి 11.55 వరకు తెరచి ఉంచుతుందని వినిపిస్తున్న పుకార్లపై ప్రముఖ బ్రోకరేజ్ సంస్థ జెరోధా సీఈవో నితిన్ కామత్ స్పందించారు. ఇది దీర్ఘకాలంలో ట్రేడర్ల జీవితాన్ని ప్రభావితం చేస్తుందని అన్నారు. ఈ వేళలను పొడిగించటం వల్ల దీర్ఘకాలంలో పార్టిసిపేషన్, లిక్విడిటీ తగ్గటానికి దారితీయవచ్చని అన్నారు. P&Lని ఎక్కువ గంటలు ట్రాక్ చేయడం ఒత్తిడితో కూడుకున్నదని అభిప్రాయపడ్డారు.

అధికారులు ఏమంటున్నారంటే..

భారత్‌లో ప్రస్తుత స్టాక్ మార్కెట్ల ట్రేడింగ్ వేళల వల్ల వాల్యూమ్‌లు ఆఫ్‌షోర్ మార్కెట్లకు మారుతున్నాయని ఎక్స్‌ఛేంజ్ అధికారులు చాలా కాలంగా చెబుతున్నారు. దీనిపై వాటాదారులు అందించిన అన్ని సూచనలను రెగ్యులేటరీ పరిశీలిస్తోంది. దీనిలో భాగంగా ఇండెక్స్ ఫ్యూచర్స్ టైమింగ్‌ను పెంచాలని ఒక ప్రతిపాదన ఉంది.

అమెరికా మార్కెట్లు..

రెండవ ప్రతిపాదన ప్రకారం.. కనీసం అమెరికా మార్కెట్లు ప్రారంభమయ్యేంత వరకు F&O సెగ్మెంట్‌ను తెరచి ఉంచాలని కొందరు అభిప్రాయపడుతున్నారు. ఇలా చేయటం వల్ల ట్రేడర్లకు రాత్రిపూట నష్టాలను తగ్గించుకోవటంలో సహాయపడుతుందని వారు అభిప్రాయపడుతున్నారు. మార్కెట్‌ ట్రేడింగ్ వేళలను పొడిగిస్తే ఎలాంటి ఇబ్బంది ఉండదని సెబీ చైర్‌పర్సన్‌ ఇటీవల స్పష్టం చేసిన విషయం తెలిసిందే.