గుడ్‌న్యూస్, త్వరలో డ్రైవింగ్ టెస్ట్‌కు హాజరుకాకుండానే డ్రైవింగ్ లైసెన్స్

డ్రైవింగ్ లైసెన్స్ తీసుకోవడానికి ఇబ్బందులు పడుతున్నారా? అయితే మీకో గుడ్ న్యూస్! త్వరలో ఎలాంటి టెస్ట్ లేకుండానే డ్రైవింగ్ లైసెన్స్ పొందవచ్చు. ఈ మేరకు కేంద్ర ప్రభుత్వం డ్రైవింగ్ ట్రెయినింగ్ సెంటర్ అక్రిడేషన్ కేంద్రాలకు సంబంధించిన డ్రాఫ్ట్ నోటిఫికేషన్ సిద్ధం చేసింది. మినిస్ట్రీ ఆఫ్ రోడ్ ట్రాన్సుపోర్ట్ అండ్ హైవేస్(MoRTH) డ్రైవర్ ట్రెయినింగ్ కేంద్రాల అక్రిడేషన్ కోసం డ్రాఫ్ట్ నోటిఫికేషన్‌ను జారీ చేసింది.

నాణ్యమైన శిక్షణ ఇచ్చేందుకు ట్రెయినింగ్ సెంటర్స్ అనుసరించాల్సిన విధివిధానాలను డ్రైవింగ్ శిక్షణ కేంద్రాల అక్రెడిటేషన్(గుర్తింపు)కు సంబంధించి డ్రాఫ్ట్ నోటిఫికేషన్‌లో పేర్కొంది. ఈ కేంద్రాల్లో శిక్షణ పూర్తిచేసుకున్న వారు డ్రైవింగ్ లైసెన్స్‌కు దరఖాస్తు చేసుకున్నప్పుడు ప్రత్యేకించి మళ్లీ డ్రైవింగ్ పరీక్షకు హాజరుకావాల్సిన అవసరం లేదని డ్రాఫ్ట్‌లో పేర్కొన్నారు.

ఉత్తమ డ్రైవర్లను తీర్చిదిద్దేందుకు ఈ నిర్ణయం దోహదపడుతుందని, దీని వలన రోడ్డు ప్రమాదాలు కూడా తగ్గుతాయని కేంద్రం చెబుతోంది. గత నెల 29న జారీచేసిన ఈ డ్రాఫ్టును, ప్రజాభిప్రాయం కోసం రవాణా శాఖ వెబ్‌సైట్‌లో పొందుపరిచారు. 2025 నాటికి రోడ్డు ప్రమాదాలను సగానికి తగ్గించాలని కేంద్ర రవాణా శాఖ లక్ష్యంగా నిర్దేశించుకుంది.