Layoffs News: గేమింగ్ రంగానికి పిడుగులాంటి వార్త.. ప్రముఖ కంపెనీలో భారీగా లేఆఫ్స్

Gaming Industry News: ఈరోజుల్లో ఏదో ఓ మూల నుంచి లేఆఫ్స్ అనే మాట వింటూ ఉండటం నిత్యకృత్యమైపోయింది. దిగ్గజ కంపెనీల నుంచి చిన్నపాటి సంస్థల వరకు ఖర్చులు తగ్గించుకునేందుకు ఉద్యోగాల్లో కోతలు విధిస్తున్నాయి. తాజాగా ప్రముఖ గేమింగ్ సంస్థ ఈ లిస్టులో చేరింది.

సోనీ గ్రూప్ కార్ప్ ప్రపంచవ్యాప్తంగా ఉన్న తన వీడియో గేమ్ విభాగంలోని ఉద్యోగులపై వేటు వేసేందుకు సిద్ధమైంది. దాదాపు 900 మంది వ్యక్తులకు ఉద్వాసన పలకనున్నట్లు ప్రకటించింది. దీంతో తన వర్క్‌ ఫోర్స్‌లో దాదాపు 8 శాతం మంది కొలువులు కోల్పోనున్నారు. దీనితోపాటు లండన్‌లోని ఓ గ్రూప్‌ను పూర్తిగా మూసివేయనుంది.

'నెలల తరబడి జాగ్రత్తగా పరిశీలించిన అనంతరం ఓ కీలక నిర్ణయానికి వచ్చాం. నాయకత్వంతో పలు ధపాల చర్చల తర్వాత వ్యాపారాన్ని అభివృద్ధి చేయడానికి, కంపెనీని ముందుకు నడిపించడానికి స్పష్టమైన మార్పులు చేయాల్సిన అవసరం ఉందని భావిస్తున్నాం' అని సోనీ ఇంటరాక్టివ్ ఎంటర్‌టైన్‌మెంట్ ప్రెసిడెంట్ మరియు CEO జిమ్ ర్యాన్ ఓ నోట్‌లో పేర్కొన్నారు. సిబ్బంది కోతలపై అందులో ప్రస్తావించారు.

ఈ తొలగింపులు 3 అత్యంత విజయవంతమైన తన గేమ్ మేకర్స్ పై ప్రభావం చూపుతాయని సోనీ తెలిపింది. ఇన్‌సోమ్నియాక్ (స్పైడర్ మ్యాన్ బ్యాక్డ్ స్టూడియో), నాటీ డాగ్ (ది లాస్ట్ ఆఫ్ అస్) మరియు గెరిల్లా గేమ్స్ (హారిజన్) అనే అనుబంధ సంస్థల ఉద్యోగులు బాధితులు కానున్నట్లు వెల్లడించింది. నివేదికల ప్రకారం గెరిల్లా గేమ్స్ సిబ్బందిలో 10 శాతం కోతలు సహా మల్టిపుల్ వర్చువల్ రియాలిటీ గేమ్‌లకు ప్రసిద్ధి చెందిన సోనీ ప్లేస్టేషన్ లండన్ కూడా మూసివేయబడనున్నట్లు పేర్కొంది.

ఆన్‌లైన్ గేమ్‌ల ద్వారా ఎక్కువ కాలం ఆర్జించడానికి ప్లేస్టేషన్ మేకర్ గతంలో పలు గేమ్స్ రూపకల్పనకు భారీగా పెట్టుబడులు పెట్టింది. కానీ ఈ గేమ్స్ మార్కెట్ ఇప్పుడు ఓవర్‌ శాచురేటెడ్‌గా మారింది. చాలా వరకు ఫ్లాప్ అయ్యాయి. సోనీ ఇటీవల స్పైడర్ మ్యాన్ మరియు ది లాస్ట్ ఆఫ్ అస్ ఆన్‌లైన్ గేమ్‌లను రద్దు చేసింది. కాగా కోతల్లో భాగంగా ట్విస్టెడ్ మెటల్ రేసింగ్ ఫ్రాంచైజీపై ఆధారపడిన సర్వీస్ గేమ్‌ను కూడా ఇప్పుడు నిలిపివేసింది.